euskal diaspora eta kultura
2013/06/27
Ekainaren 20tik 23ra euskal kulturari buruzko lantegi bat egin zen Poloniako Wroclaw-en, hiri honek Donostiarekin partekatuko duen 2016ko Europako Kultura Hiriburu izendapena kari. Aukera zabala izan zen egitarauan: euskal jantzietan oinarritutako moda ikastaroak, sukaldaritza klaseak, zinea eta musika, besteak beste. Ilustrazio tailer bat ere egin zuten, Patxi Zubizarretaren idazlearen "Magalik badaki" ipuinean oinarrituta. Idazlea bera bertan izan zen, lantegiko partehartzaileei laguntzeko.
2013/06/27
Izen handiko tango musikariek osatzen duten ‘Los Solistas de D’arienzo’ orkestra famatuak emanaldi bat eskainiko du bihar Tandil hirian. Gure Etxea Euskal Etxea antolatzaile, kontzertua ohorezko aurresku batekin hasiko da '2x4 erritmoan'. Ondoren, bertako eta nazioarteko ospea duten abeslariak entzun ahal izango dira Teatro del Fuerte Antzokian. Bildutako dirua hiriko Osasun Mentalaren Elkartearentzat izango da. Berri honekin batera, datorren astean Sanferminak direla eta burutuko dituen ekintzetan parte hartzeko gonbitea zabaldu du Tandilgo euskal etxeak.
2013/06/26
Food and Travel aldizkari britaniarrak Getariako hotel hau hautatu du munduko onenen artean, Reader Awards txapelketaren barruan. Orain bozketa jarri dute abian internetan finalisten artean gustukoena aukeratzeko. Abuztuaren 25ean bukatzen da lehiaketa eta irailean izango da sari banaketa. Klik bat eginez lagun diezaiokezu hotel honi irabazlea izaten. Artikulu honetan azalduko dizugu nola.
2013/06/26
Utah Basque Club elkarteak iragan ekainaren 23an ospatu zuen bere urteroko Udako Piknika, aire zabalean egin zen bazkari eta ekitaldiekin. Topaketan parte hartu zutenen artean Utah'ko Triskalariak taldeko dantzariak izan ziren. Taldea New Yorkera bidaia antolatzen ari da eta horretarako dirua biltzeko kanpaina abiatu du. Berriki euren euskal dantza errepertorio zabala erakusteko aukera izan zuten Salt Lake City-ko "Living Traditions" kultur jaialdian.
2013/06/26
Turismoa eta bertako elikagai eta ekoizleak sustatzeko asmoa duen Ekoizleen eta Diseinu Azoka, "Madryn Platerean" ekitaldiaren baitan burutzen da urtero Puerto Madryn-en. Hiriko beste hainbat enpresa eta erakunderekin batera, aurtengo edizioan, bertako euskal gizataldeak ere hartu zuen parte Azokan, proposamen gastronomiko batekin. Antolatzaileek gonbidaturik, euskal stand bat muntatu zuten Etorritakoengatik-eko lagunek eurak prestatutako pintxo eta dilistak saltzeko. Ekoizleen eta Diseinu Azoka 84. zenbakiko Eskolako instalazioetan burutu zen eta pasa den asteburu luzeko hitzordu erakargarrienetako bat suertatu zen Patagoniako hiri honetako lagunentzat.
2013/06/25
Ekainaren 18 eta 19an egin zen Bilbon Euskal Herria Mugaz Gaindi mintegiaren bederatzigarren edizioa, eta antolatzaileen esanetan "arrakastatsua izan da, bai arlo zientifikoan, bai zabalkuntzan eta baita parte hartzeari dagokionez ere". Pedro Oiarzabal historialariaren esanetan, entzuleen artean "Euskal Herrira itzuli diren emigrante eta erbesteratuak izan ziren; Argentinatik, AEBetatik, Mexikotik eta Venezuelatik etorriak", eta hizlariak "Argentina, Kanada, Espainia, Euskal Herria, Italia edo Poloniako unibertsitatetakoak" izan ziren. Mintegia finkatu egin da eta aurten bertan egingo du hamargarren edizioa New Yorken, hiriko Euzko Etxea elkartearen Mendeurreneko ekitaldien baitan.
2013/06/25
Munduko beste hainbat euskal etxetan bezala, suaren inguruan eta jantzi koloredunak soinean, aspaldiko tradizioa eguneratu dute aurten ere Necocheako dantzariek euren betiko grazia eta alaitasunez. Jaia joan den ostegunean burutu zen euskal etxearen aurreko plazan eta herritar anitz bildu ziren su eta dantza ikuskizunaz gozatzera. Sorgina erraldoia erre ondoren, erromaeriak erakundearen egoitzan jarraitu zuen programa berezi batez. Izan ere, 2013ko Hator Hona programako partaideek Euskal Herrian eskainiko duten emanaldia aurkeztu zieten euskal etxeko kide eta lagunei. Necocheako Udalak ‘Interes Publikokoa’ izendatu du gazte necocheatarren Euskal Herrirako bidaia.
2013/06/24
Ekainaren 12an, William Douglass Nevadako Euskal Ikasketen Unibertsitateko zuzendari ohi eta irakasle emerituaren hitzaldia izan zen Habanan. Azken hilabeteotan Kubako Ongintzako Euskal Elkartea berrabiatzeko asmoarekin hainbat ekitaldi prestatu dira. Esate baterako, San Fermin ospakizuna uztailaren 6an eta bazkideentzako txangoa Matanzaseko probintziara hil horren bigarren hamabostaldian, antzinako euskaldunen kokalekuak ikusteko.
2013/06/24
Iragan maiatzaren 19an ospatu zen Txilen lehen aldiz Txistulari Eguna, Hilario Olazaran dantza eta txistu taldeak eta Gure Etorkia kultur taldeak antolatuta. Partehartzaileek kalejira egin zuten Viña del Mar-eko kaleetan, euskal dantza eta txistuaren doinuak bertakoen artean ezagutzera emateko. Horren aurretik, "Centro Cultural Amigos de Galicia" taldeak antolatutako Galiziar Letren Egunean parte hartu zuten, Joseba Sarrionandiaren poema bat irakurriz.
2013/06/24
Arrakastaz eta bizi-bizi joan da aurten ere Mallorcako Artea Euskal Etxeak antolatu duen asteburu bateko Euskara Barnetegia, aurrekoek bezala Mallorcan 48 orduz euskaraz bizi eta euskal hizkuntza eta kultura landu, praktikatu eta biziaraztea helburu zuena. Parte hartu dutenen artean, bertako ikasle eta irakasleekin batera, Kinku Zinkunegi HABEko irakasleak, Donostiatik; Madrildik Ane Bastida irakasleak eta hiru ikaslek; Gorka Salas Iruñeko txalapartariak eta, Bordeletik, Ander Salazar dantzariak, bakoitza bere arloko tailerren emaile. "Pozik gaude lortutako emaitzekin", aitortu dio EuskalKultura.com-i Manoli Korta Mallorcako euskara irakasle eta arduradunak.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
