euskal diaspora eta kultura
2014/02/25
Ez zaio sobera falta Arrecifeseko Euskaldunak Denak Bat-i ehun urtetik gorako Argentinako euskal erakundeen multzoan sartzeko; epe horretan, kultura mantendu ez ezik, zabaldu ere egin du, euskal jatorrizko etorkinak babesteko Buenos Aires probintzian sortu zen instituzioak. Historia luzea da, urratsez urrats egina. Hori ospagai harturik, euren 92. urtemuga ospatzera bildu berri dira euskal etxeko kide eta betiko lagunak. Urtebetetze jaiarekin batera, udan egindako beste ekintzen berri jakinarazi digute euskal elkartetik.
2014/02/24
Boise State University-k euskal ikasleei zuzenduriko doktoretza beka sortu du, unibertsitateko Euskal Ikasketa Programaren eta Idahoko euskal komunitatearen babesarekin. Bekek urtebeteko iraupena izango dute eta ikasleak doktoretza egin ahal izango dute Boiseko Ingeniaritza eta Elektronika arloko sailetan. Bekak matrikula osotasunean ordainduko du eta, horrez gain, ikasleak 18.000 eta 25.000 dolar bitarteko diru-laguntza jasoko du ostatu eta gastuetarako. Eskabideak martxoaren 15a baino lehen aurkeztu behar dira.
2014/02/24
30 urte beteko ditu aurten Joseba Gotzon portugaletetarrak (Bizkaia) kantagintzan eta beste ekintza batzuen artean Argentinako bira batekin ospatuko du apirilaren amaieran. Euskal etxeen eskutik eskainiko dituen kontzertuetan bi helburu izango omen ditu nagusi; batetik, bere errepertorioa birpasatu eta ‘Erotisme’ album berriko kantu batzuk aurkeztea eta bestetik, Xoan Curiel kantautore galiziarrarekin garatzen ari den proiektua ezagutaraztea. Bira apirilaren 24tik maiatzaren 3ra arte luzatuko da eta datak oraindik erabat zehaztuta ez egon arren, San Nicolas, Rosario eta Parana hirietan aurkeztuko dira ziur aski.
2014/02/21
Victor Esain hil da 2014ko otsailaren 16an Fresnon, 80 urte zituela. Fresnon bertan 1933ko ekainaren 6an jaioa, euskaldun petoa zen, bere gurasoek, Felix eta Lyda (Martinto) Esainek Fresnon 1935ean sortu eta kudeatu zuten Basque Hotel ostatuan hazia. Fresnoko Euskal Etxeko sortzaileetakoa, NABOko ordezkaria eta urte askoan Mus arduraduna izan zen. 2004an Society of Basque Studies in America-k bere Pertsonaien Galerian (Hall of Fame) sartu zuen. NABOk Bizi Emankorra saria eman zion 2011ean.
2014/02/21
Argentinako eta Euskal Herriko kostaldeek bat egin dute berriro ere sukaldean. Izan ere, urtarrilaren 4tik aurrera euskal sukaldaritza dastatzeko leku berri bat inauguratu da Buenos Aires probintziako gune turistiko garrantzitsuena den Mar del Platan. Hondarribian trebaturik, jatetxeko jabeek arraina, arroza eta itsaski freskoak eskaintzen dituzte plater nagusi; baina haragi gorria ere badago aukeren artean. Bizigarri jatetxea asteartetik igandera dago irekita, gauez, Mar del Platako Avellaneda eta San Luis kaleen izkinan.
2014/02/21
Euskal kultura eta literatura Italiako Modena hiriko liburu azokara eramando dute asteburuan Itxaro Borda idazleak eta Pantxoa Etxegoin Euskal Kultur Erakundeko zuzendariak. Euskal ordezkaritzak "Il testo infinito" izeneko sorkuntza eta komunikazioari buruzko mahainguru batean parte hartuko du eta Euskal Herriari buruzko argazki erakusketa bat inauguratuko du, besteak beste. Bestalde, bihar Anne Etchegoien kantariak kontzertua emango du "Le Voix Basques" ikuskizuna Italian aurkeztuz.
2014/02/20
Pariseko Eskual Etxeak marka utziko du aurten hiriko Inauterietako desfilean, Lamina eta Basajaun buru dituelarik. Euskal elkarten jo eta ke ari dira lanean azken asteotan euskal kulturaren pertsonaia mitologiko hauen bi figura erraldoi sortzeko. Emeki emeki, forma hartzen hasi dira biak eta datorren martxoaren 2an, igandean; Pariseko kaleetara ateratzeko prest egongo dira, euskal etxeko Gazteria dantzariekin, Gernika koruko kantariekin eta eurekin bat egin nahi duten lagunekin. Hitzordua eguerdiko ordu batetan da, Place Gambettan; zatoz eta disfruta itzazu Pariseko Inauteriak euskal erara!
2014/02/20
2006an sortua, antzerki amateurraren erreferente bilakatu da azken urte hauetan Entre Rios probintziako Paranako Urrundik Elkarteko Antzerki Taldea. Izan ere, hirian ez ezik, hiritik kanpoko jaialdietan ere ordezkatu izan du taldeak euskal erakundea. Hori dela eta atsegin handiz gonbidatzen du elkarteak bere 2014ko egitaraua irekitzeko aktoreek eskainiko duten emanaldia. Augusto Carballal-en zuzendaritzapean, euskal etxean burutuko da obra, ostiral honetan, egoitzako patioan zehatz mehatz. Bertan ere taberna bat prestatuko da, gonbidatuek janari eta edari onez gozatu ahal izateko.
2014/02/19
Miamiko Euskal Etxeak gogotsu darrai Joseba Andoni mutikoari laguntzeko kanpainarekin eta iragan igandean, otsailaren 16ean, jarduera berri bat egin zuen haren tratamentua ordaintzen laguntzeko dirua biltzeko. San Valentin egunaren aitzakian, elkarteak festa egin zuen eta ia 1.500 dolar bildu zituen. Mutiko bakioarrak istripu larria izan zuen hamaika hilabete zituenean eta harrezkero garapen arazoak ditu. Miamin bizi da 2007az geroztik, eta familia euskal etxearen parte da.
2014/02/19
Sao Paulotik, Brasilen, bertan egoitza duen Eusko-Brasildar Etxea/Casa Basco-Brasileira euskal etxetik, elkarteko azken berriak dakartzagu Oskar Goitia lehendakariak. Izan ere, Zuzendaritza Batzordea berritu du euskal etxeak, Goitia bera berretsiz lehendakari, eta elkartearen egoitza Sao Pauloko Andrea Del Sarto, 198 helbidera pasatuz.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
