euskal diaspora eta kultura
2014/03/10
Martxoaren hasierarekin batera, kaskoak jarri ditu berriro ere Federico Borras-ek 'Presencia Vasca' irratsaioaren 24. denboraldiari ekiteko. Entre Rios probintzia argentinarreko Parana hiritik, harrera paregabea izan zuen emanaldiak entzuleen artean. Izan ere ehun bat lagun jarri ziren kontaktuan programarekin agurtu eta ziklo berrian zorte ona opatzeko. Borrasek EuskalKultura.com-i azaldu dionez, saioak bere ohiko formatuaei eutsiko dio, Mikel Ezkerroren zutabea, elkarrizketak, berriak eta euskal musika barne; eta nobedade gisa, euskara zabaltzeko proposamen berri bat ere egongo da.
2014/03/07
Azkue Fundazioak, Argia astekariaren laguntzarekin antolatu duen "Blogetan!" lehiaketaren sari banaketak euskal blogosferako adituak eta zaletuak bildu zituen atzo Bilboko Euskararen Etxean. Ekitaldian, saridunen izenak iragarri ziren eta sari banaketaz gain, euskarazko blogen egoerari eta etorkizunari buruz solastu ziren partehartzaileak.
2014/03/07
Iragan martxoaren 2an, Pariseko Eskual Etxeak (PEE) Inauterietako desfilean parte hartu zuen lehen aldiz eta nola! Elkartearen ordezkaritzak kolorez eta giro bikainez bete zuen kalejira, Basajaun eta Lamina erraldoiak buru zituelarik. Elkarteko kideak jo eta su ibili dira azken asteetan lantegi batean erraldoi hauek sortzen, Pariseko kaleetara euskal mitologia apur bat ekartzeko. Eurekin batera elkarteko bazkideak, Gazteria taldeko dantzari eta musikariak eta lagun asko, denak ala denak goitik behera mozorroturik. Euskal Etxeak jai egun eder honen argazkiak sareratu ditu bere Facebook orrian; jarraian, horietako batzuk.
2014/03/07
Lan isila baina ezinbestekoa egiten duten andreei omentzea helburu duen La Platako 'Emakume Nabarmena' saria Maria Josefa “Mari” Lazcano Aramayori emango diote aurten. “Hilosteko saria izango da baina duela gutxi Mariren jaiotzaren ehun urte bete direnez, oso egokia iruditu zaigu bere izena proposatzea”, azaldu diote Euzko Etxea Euskal Etxetik EuskalKultura.com-i. Sari-emanaldia datorren astelehenean izango da, martxoaren 10ean, Emakumearen Nazioarteko Eguneko ekitaldien baitan.
2014/03/06
Rosarioko Zazpirak Bat jatetxeko sukaldetik, Euskal Herrira etorri da Itziar Aguirre argentinarra aspaldiko amets bat betetzera: euskal gastronomia "master" bat ari da egiten Arzak eta Azurmendi jatetxeetan. Abegikor hartu dute Juan Mari Arzak eta Eneko Atxa sukaldariek; izan ere, Itziarren ibilbidea berezia da: euskaraz ederki mintzatzen da rosarioarra eta Argentinako bihotzean euskal jatetxea zuzentzen du. "Zu ez zara bakarrik ikastera etorri, irakastera ere etorri zara", esan zion Arzakek. Orain, bertan ikastakoa Argentinako euskal etxeetako jatetxeetan zabaltzea eta irakastea da Itziarren asmoa.
2014/03/06
Zozketa berria antolatu du EuskalKultura.com-ek eta gaur zabalduko da bertan parte hartzeko epea. Zozketagai, hiru liburu eta DVD bat: euskaraz, Diasporaren eta euskal emigrazioaren lekukotasun zuzena ematen duen 'Urruneko mendebalean artzain', Mattin Etchamendyren liburua; ingelesez, Pedro Oiarzabalen 'Gardeners of identity', San Frantziskoko euskal komunitateaz; gaztelaniaz, 'Vascos en Buenos Aires' liburua, hiriburu horretako Udalak bertako euskaldunez argitaratua; eta DVD bat, 'Zerutik sua dator', 1937an Bizkaiko zenbait herriren bonbardaketen lekuko izan zirenen hitzarekin.2014/03/06
Azken egunotan, euskal argentinarrok Euskal Herriko Inauteriak nolakoak diren ikusi ahal izan dugu interneten agertutako hainbat iruditan. Eta ohitura, erritmo eta eguraldi erabat ezberdinekin, baina Argentinan ere oihartzun handia izan du, hemen otsail osoan luzatu eta joan den asteartea honetan bukatu den jaiak. Urtero bezala, euskal etxeek ez diote hitzorduari huts egin eta parte hartzeaz gain presentzia gailena izan dute ekitaldietan. Adibide gisa, Cañuelasko Denak Bat-ek saria eskuratu du; Saladilloko Itxaropen-ek aurkeztutako hautagaia erregina bilakatu da eta Villegas’ko Euskaldunak erakundeak taberna zerbitzu bikaina eskaini dio komunitateari.
2014/03/05
Liverpoolgo Unibertsitateak Euskara eta Euskal Kultura irakurle postua betetzeko deialdia egin du. Hautagaiek betebeharreko baldintzen artean honakoak dira: PhD edo Doktoretza maila irakasgaiarekin harremana duen arlo batean, EGA, nazioarte mailako argitalpenak eta euskara irakaskuntzan eskarmentua. Etxepare Euskal Institutuak sustatzen du irakurletza, baina kasu honetan unibertsitatea bera da hautatze-prozesua kudeatzen duena, postua Liverpool University-ko barne postu finkoa bilakatuko baita. Hautagaitzak bidaltzeko epea apirilaren 4an itxiko da.
2014/03/05
Aitor Alava dantzari arabarrak sorturik, 'Dantz-ango' blogak Euskal Herriko eta Argentinako folkloreen hedadura zabaltzeko helburua du. Esperientzia handiak bermatzen du Ekin Dantzari Taldeko zuzendariaren lan berria; izan ere, urteak daramatza tauletan zein dantza eskolak ematen 2004tik Buenos Airesen bizi den gazte euskaldunak. Proposamenak beste asmo bat ere badu: “Dantzari ona izateko, entseatzea ez da nahikoa; irakurri ere egin behar da ikas-prozesu on bat izateko”, proposatzen du Alavak. 'Dantz-ango' sarean dago, doan.
2014/03/04
Merezitako omenaldia jasoko du bihar Amaya Garritz historialari euskal-mexikarrak, Mexikoko UNAM unibertsitateko Ikerketa Historikoen Institutuak antolatuta. Omenaldiak Garritzen ibilbide profesionala eta baita pertsonala ere aintzat hartuko ditu. Garritz aditua da Mexikoko euskaldunen historian eta arlo honetan erreferente nagusienetakoa. Omenaldia Coyoacango Unibertsitate Hirian egingo da eta bertan historia eta genealogia arloko adituek hartuko dute parte.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
