euskal diaspora eta kultura
2014/03/14
Rosarioko Zazpirak Bat Euskal Etxeak eta hiriko Humanitate eta Arteen Fakultateak sinatutako hitzarmenaren baitan, datorren apirilaren 4an jarriko da abian Unibertsitateko Euskara eta Euskal Kulturaren Katedra. Zikloari ekiteko, Hizkuntza Minorizatuen Topaketa burutuko da hilaren 4ean, ostirala Fakultatearen egoitzan. Euskara klaseak, berriz, 8an hasiko dira eta astearte eta ostiraletan gauzatuko dira. Gaia aldatuta baina oraindik Rosarion, Zazpirak Bat euskal etxea bere burua gogoz ari da prestatzen mozorro-jai bat ospatzeko datorren asteko larunbatean.
2014/03/13
Kaliforniako Bakersfield hiriko hiru zinemagile dokumentala egiten ari dira Ameriketako Oesteko euskaldunei buruz. "Disappearing West" izenburua du filmak eta Estatu Batuetako historiaren parte hau argitara ekarri nahi du, nahiko ezezaguna delako euskaldunen gizataldeetatik at. Beaux Mingus, Philippe Duhart eta Gina Napolitan dira lanaren zuzendariak. Une honetan euskaldunen ondorengoak elkarrizketatzen ari dira Kalifornian, eta aurki Nevada, Idaho eta Arizonan ere izango dira. Zuzendariek gonbitea luzatzen diete dokumentalean parte hartu eta euren familiaren historia kamara aurrean kontatu nahi duten euskaldunei.
2014/03/13
Koordinatzaile postua bete nahi du Bartzelonako Euskal Etxeak eta lan honetan jardun nahi dutenei lehenbailehen CVa bidaltzeko deialdia egin die. Koordinatzailea Euskal Etxearen programaketa kulturalaz arduratuko da, eta horrez gain elkartearen ekonomiaren, kanpo harremanen, komunikazioaren zein juntaren koordinazioa ere hartuko du bere gain. Horrekin batera, Euskal Etxearen ekitaldi, ziklo eta jaialdien programaketa, produkzio eta posprodukzioa ere bere kargu izango ditu. Hautagaiek antzeko lanetan eskarmentua izatea eta titulazio egokia izatea eskatzen da.
2014/03/13
Iluntzeko 7etan egingo da gaur Gure Arropa-Nuestra Ropa euskal erakusketaren irekitze ekitaldia Argentinako hiriburuko Dekorazio-Arte Museo Nazionalean. Laurak Bat-ek antolaturik, Magdalena Mignaburu-ren bilduma apirilaren 27ra bitartean egongo da ikusgai, arratsaldero. Erakusketaren baitan, Euskal Herriko kultura ezagutarazteko beste proposamen batzuk eskainiko zaizkio publikoari, hala nola saio artistikoak, Gernikako Bonbardaketaren urteurrena gogoratzeko ekintzak eta Aberri Eguneko ospakizuna. Gaurko ekitaldian parte hartu nahi dutenek, euren izenak eman ditzateke Laurak Bat-eko idazkaritzan.
2014/03/12
Boiseko Estatuko Unibertsiteak genealogiari buruzko mintegia egingo du datorren igandean eta astelehenean, martxoaren 16 eta 17an, alegia. "Discover your roots" izena du topaketak eta bertan euskal, irlandar eta eskoziar genealogiaz arituko dira hainbat ikertzaile eta aditu. Hizlarien artean izango da, besteak beste, Lisa Corcostegui historialaria, The Basque Branch egitasmoaren sustatzailea eta Ontarioko Euskal Etxeko kidea.
2014/03/12
2013ko edizioa Euskal Herrian burutu ondoren, Necocheako Euzko Etxea-ko gazteek sortutako Hator Hona programa Argentinara bueltatuko da aurten uztailaren 18tik abuztuaren 10ra bitartean. Hiru aste horietan, hainbat euskal kultur adierazpen konpartituko dituzte Euskal Herritik bertara joandako zenbait gaztek euskal etxeko komunitatearekin, tartean, dantzak, musika, euskara, kirola eta sukaldaritza. Hator Hona 2014ko edizioan izena emateko epea apirilaren 20an bukatuko da; animatu, esperientzia bikaina baita!
2014/03/11
Lehendakariak Selma Huxley ikerlaria sarituko du, Lagun Onari bereizgarria emanez gaur arratsaldean Gasteizko Lehendakaritzan egingo den ekitaldian. Selma Huxley ikerlari anglokanadatarraren izena euskal arrantzale eta bale harrapatzaileek XVI. mendetik aurrera Kanada iparraldeko Labradorren utzitako arrastoei lotua da, Amerika eta Euskal Herriaren historia uztartzen dituen garai eta leku hari buruzko ikerketetan ekarpen garrantzitsuak egin baititzituen, zenbait bale-estazio eta untzi --San Juan izenekoa bereziki-- argitara ekarriz. Ekitaldia arratsaldeko bostetan izango da eta Irekiak zuzenean eskainiko ditu bertako irudiak.
2014/03/11
"Erbesteratuen oroimenak-Memoria y exilio" liburuarekin Gregorio Arrien historialariak erbesteratuen oroimena berreskuratzeko azken 30 urteetan egin diren ekimen eta jardueren testigantza jaso nahi izan du. Ekimen horietako asko erbesteratuek eta gerrako haurrak izan zirenek sustatu zituzten, bai Euskal Herrian zein atzerrian, 1982az geroztik. Arrienen esanetan elkarte hauek aitzindariak izan dira erbestearen oroimena berreskuratze prozesu horretan.
2014/03/11
Iazko arrakastaren ondoren, Triki-poteo berri bat antolatzeko erronka hartua zuen aurten ere bere gain Buenos Airesko Euskaltzaleak Euskaltegiak. Deialdiak erantzun ezin hobea izan zuen joan den larunbatean eta euskaltegiarekin bat eginez euskal instituzio gehiagoko kideak atera ziren hiriburuko kaleetara, tartean Laurak Bat, Nafar Etxea eta Iparraldeko Euskal Etxea erakunde hiriburutarren artean. Barnealdeko euskal etxeek ere izan zituzten ordezkariak ekitaldi berezi honetan, tartean Arrecifes, La Plata, Mar del Plata, Necochea eta San Nicolas hirietakoek. Iaz bezala, gainera, "Buenos Aires Tartan Army" elkarte eskoziarrak ere hartu zuen parte ekimenean.
2014/03/10
Ostiralean South San Francisco-ko Basque Cultural Center euskal etxea zine emanaldi berezia egingo da, Basque Educational Society elkarteak antolatzen duen euskal zinema sailaren baitan. Fermin Muguruza musikaria bertan izango da "No More Tour" dokumentala aurkezteko. Irundarraren azken bira jasotzen du lanak: 55 kontzertu bost hilabetetan, egileen esanetan "erresistentzia eta elkartasun mapa bat".
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
