euskal diaspora eta kultura
2014/04/09
Bordeleko Eskual Etxeak bizikleta martxa bat antolatu du, Aquitaniako eta Euskal Herriko hiru txirrindulari elkarteekin lankidetzan: Bordeleko Stade Bordelais - ASPTT, Bera Bera (Donostia) eta Urgozo Iturriko Txirrindulari Elkartea (Bilbo). Martxa maiatzaren 8tik 10era bitartean egingo da, Bordelen hasi eta Bilboraino. Jarduerak kirola, kultura eta bi eskualdeen arteko harremana sustatzea du helburu. 150 txirrindularientzako lekua dago eta gutxieneko maila duten kirolarientzako irekia da, nahiz eta talde antolatzaileetako kide ez izan.
2014/04/09
Eusko Jaurlaritzak interneten eskura daiteken euskarazko doaneko itzultzaile automatiko berria aurkeztu du. Aplikazioaren hiru bertsioek ordenagailuetarako ez ezik android edo IOS sistema erabiltzen duten mugikorretarako ere balio dute.
2014/04/09
Zerrenda bakarra aurkeztuko da FEVAren buruzagitza berritzeko bi aste barru Buenos Airesen egingo diren hauteskundeetara. Eta zerrendako buru, Hugo Andiazabal lehendakarigai, Javier Ederra idazkaritzarako eta Pedro Mauregui Larranda diruzain. Biltzarra bukatutakoan Eusko Jaurlaritzako Sara Pagola Argentinako ordezkariaren eta Asier Vallejo Kanpoan den Euskal Komunitatearentzako zuzendariaren bisita jasoko du Biltzarrak. Hitzordua apirilaren 26an izango da, goizeko 9:30etan, argentinar hiriburuko Laurak Bat euskal etxean.
2014/04/08
Poznango Adam Mickeiwicz unibertsitateko Euskara eta Euskal Kultura irakurletzak urtero legez Euskal Jaia antolatu du, ikasleen partaidetza eta laguntzarekin. Helburua euskal kultura unibertsitatetik atera eta gazteen artean ezagutzera ematea da. Horretarako, egitarau zabala eta gozagarria dute aurtengo "Dni Baskijskie" edo Euskal Egunek: ipuin kontalariak, "Gazta zati bat" dokumentalaren emanaldia, janari beganoa eta euskal pintxoak, euskal kulturari buruzko online lehiaketa, dantza tailerrak eta hitzaldiak, besteak beste.
2014/04/08
Urtero bezala, 2014 honetan ere ospatu du Cañuelasko Denak Bat euskal etxeak bere Aberri Eguneko Dantzarien Topaketa. Jaialdia pasa den asteburuan burutu zen eta eguraldia gorabehera, bi egun eder igaro zituzten herritar eta bisitariek. Euriagatik, Cañuelas Futbol Club elkarteko instalazioetan egin behar izan zen dantza erakustaldia. Aurten aurreko urteetan baino dantza talde gutxiago bildu dira topaketara. Antolatzaileen esanetan, urrun dauden euskal etxeentzat, bertaratzeko garraio gastuen kostu altua da urtero etorri ezin izanaren arrazoia.
2014/04/07
Boise State University-ko Euskal Ikasketa Programak udaberrian burutuko diren zenbait ekimen eta deialdiei buruzko informazioa zabaldu du. Batetik, sarean eskuragarri dela dagoeneko Boga aldizkariaren bigarren alea eta, bidenabar, baita datorren alerako artikuluak bidaltzeko epea irekitzen dela ere. Bestetik, Euskal Literatur Lehiaketa jarri du abian Programak: lanek euskal gaia izan behar dute eta ingelesez idatziak izango dira. Garaileak 500 dolarreko saria eta lana argitaratzea irabaziko du.
2014/04/07
Gurera dakarkigu gaur Miren Perez Eguireunek Conde Nast "Traveler" aldizkarian idatzi duen artikulu bat, Idahoko euskaldunei buruzkoa. Gaztelaniaz eman da argitara, baina guk euskarara itzuli dugu zati bat: "Idaho, Estatu Batuetako barnekaldeko iparmendebaldean, batasuneko estatu ezezagunenetariko bat da, eta euskal komunitate dinamiko eta arrakastatsua du. Euren jatorriaz harro, bost urtero euskal jaialdi handi bat egiten dute eta mundu osoko euskaldunak biltzen dira euskal Mecca antzeko honetara. Hain da eraginkorra euskal komunitate hau, ezen 2002an Idahoko Legebiltzarra, euskal lobbyak sustatuta, AEBetako Espainiako Enbaxadarekin liskar diplomatiko batean sartu zela eta orduko Etxe Zuriko Estatu Segurtasunerako Aholkulariak, Condoleezza Ricek, parte hartu behar izan zuela. Welcome! Edo, agian hobe, ongi etorri!".
2014/04/07
Argentinako euskal erakunde ugariko agintariak bertaratu ziren hiriburuko Centro Vasco Frances-Iparraldeko Euskal Etxera erakundearen 119. urteurrenean parte hartzera. Topaketa egoitzako kintxoan burutu zen, ‘giro informalean’, etxeko kide eta lagunak partaide. Gonbidatuen artean, aipa daiteke Eusko Jaurlaritzaren Ordezkari Sara Pagolak bat egin zuela, eta hitz batzuk egin zituela euskal etxekoen aurrean euren urtebetetze jaian.
2014/04/04
Euskal sortzaileek Mintzanet bidezko prestakuntza saioak eskainiko dizkiete munduko unibertsitateetako euskara eta euskal kultura ikasleei bihartik aurrera Sei idazle, unibertsitateko bi aditu eta bertsolari bat zuzenean solastuko dira Etxepare Euskal Institutuak Paris, Boise, Poznan, Brno, Bartzelona, Leipzig, Berlin, Konstantza eta Bologna hirietan dituen irakurletzetako ikasleekin. Mark Kurlansky, Eider Rodriguez, Unai Elorriaga, Itxaro Borda, Arantxa Urretabizkaia eta Karmele Jaio idazleak, Iván Igartua eta Iñaki Martinez de Luna irakasleak eta Miren Amuriza bertsolaria izango dira aurtengo hizlariak.
2014/04/04
Menu tentagarria eskainiko du Buenos Aires probintziako Olavarria herriko Gure Etxe Maitea Euskal Etxeak Aberri Eguna ospatzeko bihar burutuko duen festan. Aktibitatea elkarteak otsailean hasitako programa oparoaren barruan gauzatuko da. Izan ere, proposamen berriak ditu aurten euskal etxeak, batez ere txikienei begira. Urtean zehar, bestalde, Udalak antolatutako ekitaldi ofizialetan parte hartzeko konpromisua hartua du instituzioak euskal gizataldearen ordezkari; hori dela eta etxeko talde bat Malvinen Monumentura bertaratu zen apirilaren 2an, Malvina Irletako Gerrako Beterano eta Hildakoen omenezko zeremonian euskaldunen presentzia bermatzeko.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
