euskal diaspora eta kultura
2009/03/25
Aste honetan aurkeztu dute Donostian Basque Culinary Center proiektua, Europan egiten den bigarrena izango den gastronomia zientzien fakultatea (Italiako Piamonten dago lehena). Zentru berriak 2011. urtean irekiko ditu ateak eta bi arlo izango ditu: alde batetik ikerketa gunea bat eta bestetik fakultatea bera. Donostiako Miramon Parke Teknologikoan egongo da. Euskal Herriko sukaldari nagusiek babesa eman diote proiektuari eta arduradunek ekimen honek Euskal Herria 'nazioarteko goi mailako sukaldaritzaren meka' bihurtuko duela uste dute.
2009/03/24
Sandra Ott ikerlariak, Nevadako Unibersitateko Center for Basque Studies-eko irakasleak, 6.000 dolarretako dirulaguntza jaso du National Endowment for the Humanities erakundeak emandako beka bati esker. Ott euskal kulturan eta euskaldunek Frantzia, Espainia eta Alemaniarekin 1930 eta 1940 artean izan zuten harremanetan aditua da. Beka honi esker bi hilabete oso erabili ahal izango ditu bere azken ikerketa prestatzen. 'Unibertsitatearen ordezkari izateaz oso harro nago', azaldu dio Ott-ek Nevada News aldizkariari. 'Sari hau jasotzeak asko pozten nau eta onena ematen jarraituko dut nire ikerketak eta unibertsitateko argitalpenak garatu ahal izateko'.
2009/03/24
Chascomuseko Zingirako Euskaldunak Euskal Etxeak, Buenos Aires probintzian, Juan Alberto Gobbi diputatuaren bisita jaso zuen joan den martxoaren 13an. Gobbi medio dirulaguntza bat eman zitzaon euskal-argentinar elkarteari eta euskal etxeko instalazioak ikusteko interesa zeukan. Elkarteko Zuzendaritzak eta talde desberdinek (dantzariak, bazkideak) egin zioten harrera; bildutakoak datozen hilabeteetan Zingirako Euskaldunakek eskainiko dituen jarduera eta ekitaldiei buruz mintzatu ziren.
2009/03/23
Diasporako euskal etxe eta elkarteek azaldu duten jakinminari erantzunez Eusko Jaurlaritzak euskal etxeentzako diru laguntzen deialdiak martxoaren 31an argitaratuko dituela iragarri du. Laguntza hauek eskatzeko epea apirilaren 1etik maiatzaren 5a bitartean egongo da irekita. Premia larrian dauden pertsonei zuzenduriko laguntzen kasuan, argitalpena apirilaren 4ean izango da eta laguntzak eskatzeko epea apirilaren 5etik maiatzaren 5a bitartean luzatuko da. Data horietan laguntzak eskatu nahi dituzten lagun eta elkarteek Euskal Herriko Agintaritzaren Aldizkarian aurkituko dituzte oinarri eta imprimakiak (eta betiko legez EuskalKultura.com-en ere).
2009/03/23
Sarean, nahi duenarentzat ikusgai ipini du Oier Gorosabel Larrañaga internauta euskaldunak bere familiaren istorio argentinarra. Lekeition bizi den eibartarra da Gorosabel, eta bere familiaren zati bat Baztandik eta Euskal Herriko beste leku batzuetatik Argentinara pasatu zen. Lekukotasun interesgarria eskaintzen duen bideoa da, partikular batek egina, dokumentazio lan aipagarri batez eta egileak berak Argentinara eginiko bidaia baten ondotik landua. Bere herenaitona Hilario Berasueta Meaka eta ondorengoen historia eta istorioak kontatzen ditu.
2009/03/20
Bartzelonako Euskal Etxeak antolatu duen Korrika Kulturala azken egunetan sartu da, datorren asteko larunbatean egingo den 'Korricursa' edo lasterketaren bertsio euskal-kataluniarraren zain. Euskal Etxeko arduradunak oso pozik agertu dira orain arte egindako ekitaldiek erantzun bikaina izan dutelako. Hurrengoak elikaduraren inguruko solasaldia, .EUS domeinuaren proiektuaren aurkezpena eta Mikel Laboari eskeiniko zaion omenaldia izango dira.
2009/03/20
Korrikaren 16. edizio honetan AEK-k antolatzen duen euskararen aldeko lasterketa erantzun ezinhobea izaten ari da Diasporako euskaldunen aldetik. Londres, Madril, Shanghai eta Bartzelonako euskal etxeek iragarri dituzten ekimenei, orain Mexikoko Euskal Etxearen proposamena batu behar zaio, izan ere, arduradun mexikarrek diotenez 'aurten Korrika Mexikotik pasako da!'. Jarduera egitaraua oparoa da eta asteartean hasiko da afari batekin. Hurrengo egunetan mintzaldiak, zinea eta aurkezpenak izango dira; eta larunbatean jai handia: Korrika hiriko kaleetan zehar, txikientzako rally-a, bazkaria, txalaparta eta gehiago.
2009/03/19
Euskal literatura zaleek eta Diasporan euskara ikasten ari diren lagunek topagune berria dute UNED-eko euskal literatura klub birtualean. Bertan euskal idazleen lanak komentatu eta aztertzeko beta dute, doan eta era erraz batean. Iker Azkue, Brasilgo Euskal Etxeko euskara irakasle ohia eta egun UNED-eko euskara ikastaro birtualen koordinatzaile, da klubaren gidaria eta hilabetean behin elaberri bat proposatzen du irakurgai bezala. Orain Juan Kruz Igerabideren 'Hauts bihurtu zineten' lanarekin ari dira.
2009/03/18
Valladolideko Gure Txoko Euskal Etxea bere sorreraren 25. urteurrena ospatzen ari da aurten eta hori dela eta kultur aste bat antolatu du martxoaren 28tik apirilaren 4a bitartean. Baina ospakizunak hasiak dira jada Gure Txokon, eta joan den otsailaren 27 eta 28an elkarteak bazkideentzako afaria, eskertza meza eta hiriko bizilagunei irekitako jardunaldia eta hamaiketakoa egin zituen. Hil honen 28tik aurrera, gehiago: herri kirol erakusketak, harrijasotzaile eta aizkolariekin, gastronomia topaketa eta elkarteko koruaren emanaldiak, besteak beste.
2009/03/18
London Basque Society elkarteak etorkizunerako berebiziko garrantzia zuen bilkura berezia egin zuen joan den martxoaren 8an. EuskalKultura.com-ek orduan azaldu zuenez, elkartea arazo ekonomiko larria bizitzen ari da eta bazkideek arazo horri irtenbidea bilatu nahian dabiltza. Datozen hilabeteetan elkarteak hartuko dituen neurrien artean besteak beste bazkideek urtean 15 liberatako kuota ordaintzea proposatu zuten bileran. Momentuz, elkartean bizitzak indartsu darrai eta apirilaren 3 eta 4ean laburmetrai emanaldia eta Korrika 16 lasterketaren jaia egingo dituzte.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
