euskal diaspora eta kultura
2011/01/21
Patxi Alvarez apez bilbotar gaztea izendatu dute Jesusen Konpainiako Justizia Sozial eta Ekologia Idazkaritzako zuzendari. Karia horretara Erromara aldatuko da eta bertatik eta tartean hamaika bidaia eginez koordinatuko du Konpainiak munduan barreiaturik dituen 320 obra sozialen lana. Telekomunikazioan lizentziaduna, bulegoan sartu eta berehala tokatu zaizkio lehenengo bidaiak, hasteko India, Kanbodia, Suitza...
2011/01/21
Berri onak ari dira pilatzen Floresko Euskal Etxean. Alde batetik, Uruguaiko Flores departamentuko elkarte gazte honek izaera juridikoa eskuratu du eta datozen hilabeteetan Eusko Jaurlaritzako Euskal Etxeen erregistro ofizialean onartuak izatea espero dute arduradunek. Bestetik, Euskal Aste bat ari dira antolatzen Trinidad hiriburuan apirilerako eta programa ikusgarria iragarri dute: gaucho erakustaldia, pilota, musa, argazki erakusketak, euskal etxeari buruzko liburu baten aurkezpena... Apirilaren 2tik 10era.
2011/01/21
Hegoalde Argentinarra, munduko euskal etxerik australena,osatzen duten euskaldunek indartsu bukatu zuten 2010 urtea, Rio Gallegos hirian Gizataldeei eskainitako pasealeku baten inaugurazioan parte hartuz. Hegoalde Argentinarra omenaldiaren sustatzaileetako bat izan zen eta inaugurazio jaialdian parte hartze nabaria izan zuen: dantza erakustaldiak, gastronomia dastaketa eta euskal liburutegiaren inaugurazioarekin, besteak beste.
2011/01/18
Joan den urtarrilaren 12an hil da Habanan Carlos Astigarrabia. Diasporan hazia, 1962az geroztik bizi zen Kuban Astigarrabia. Bere historia euskal diasporako beste askoren antzekoa izan daiteke, baina gertutik begiratuz gero lagundu egingo digu ulertzen Marc Legassek zioen "esistitzen ez den herrialde baten parte izatea" zer den. Juan Astigarribia Jose Antonio Agirreren Eusko Jaurlaritzako kide komunistaren semea zen Carlos, eta jaiotzeko unetik bertatik jakin zuen politikak eta erbesteak markatuko zuela bere bizitza: bere erditzean Guardia Zibila egon zen, gurasoen etxea okupatua zuelako ihesi zebilen aitaren bila.
2011/01/17
Txileko Santiagon argitaratzen den Berriketari buletin digitalak Santiagoko Euzko Etxearen azken ekimenen berri dakar azken zenbakian, abendukoan. Urtearen hondarrean oso aktibo aritu zen, adibidez, elkarteko Euskal Abesbatza, besteak beste, Santiagoko Katedralean egin ohi den Gabonetako kontzertuan parte hartuz. Horrez gain, Itxaropen Gaztea dantza taldeak erakustaldia eskaini zuen Auco-ko santutegian eta Euskararen Eguneko ospakizunak euskal etxean gazte jende ugari bildu omen zuten, "Euskara ahoan, zer buruan?" lelopean.
2011/01/17
Urte Zahar gaueko argiak eta hotsak itzali eta gutxira, San Sebastian eguna ospatzen dugunok zirrara berezia sentitzen hasi gara: danborrari eragin eta Sarriegiren doinuak jotzeko gogoa. Donostian, Azpeitian, Argentinako Necochean, Mexiko Hirian, Madrilen, Parisen, Shanghain (lehen aldiz aterako dute danborrada) eta beste makina bat lekutan bada emozio hori danborrada entseguetan sentitu duenik. Diasporako beste hainbat euskal etxetan, nahiz eta danborradarik atera ez, San Sebastian bezperan afaria egin eta danborra modu inprobisatuan joaz ospatuko dute jaia: Bartzelonan, New Yorken... Gu San Sebastian eguneko biharamunean bueltatuko gara (biharamunik gabe, espero) eta pixkanaka horien guztien berri emango dizuegu.
2011/01/15
Eusko Jaurlaritzak Euskal Herriko Agintaritzaren Aldizkarian (EHAA) abenduaren 31an argitaratu zituen 2011. urteari dagozkion Diasporari zuzenduriko dirulaguntzen deialdietako bi. Eskabideak aurkezteko epea irekia dago, beraz, euskal etxeei zuzenduriko dirulaguntzak eskatzeko eta baita ere atzerrian egoera larrian eta asistentzia faltan dauden Diasporako kideentzako laguntzak eskatzeko. Bi kasuotan eskabideak aurkezteko epea otsailaren 28an itxiko da. Paperak prestatzen hastea komeni da, edozein arazoren aurrean eskabideak epez kanpo hel ez daitezen. Abisatuko dugu Gaztemundu deialdia argitaratzen denean.
2011/01/14
Urtarrilaren 13ko Euskal Herriko Agintaritzaren Aldizkarian dator berria. Etxepare Euskal Institutuak euskara eta euskal kultura munduan zabaltzeaz arduratzen den erakunde honetako lantaldeko zortzi lanpostu betetzeko deialdia egin du. Hautaketa-prozesua oposizio-lehiaketa bidez egingo da eta bertan izena emateko epea otsailaren 1ean itxiko da. Lanpostuak honakoak dira: Idazkari teknikoa; Komunikazio, prentsa eta interneteko presentziaren arduraduna; Euskara eta kultura sustatzeko eta hedatzeko teknikaria (lau plaza); Zuzendaritza-idazkaria eta Kudeaketa-administraria.
2011/01/12
Etxepare Euskal Institutuak Euskara eta Euskal Kulturako irakurlegoen kargu egingo diren bi irakasle aukeratzeko deialdia egin du; bata Txileko lau unibertsitatetan eta bestea Argentinako unibertsitate batean ariko da. Irakurle hauek 2011, 2012 eta 2013ko ikasturteetako klaseak emango dituzte. Postuen urteko soldata 18.000 eta 21.600 euro bitartekoa izango da. Eskabideak aurkezteko epea ostiral honetan bertan itxiko da.
2011/01/10
La Platan, Buenos Aires probintzia argentinarreko hiriburuan jaio ziren, eta gurasoek, arbaso euskaldundunak, erabaki zuten, Azulgo Euskal Etxeko kide den birramonak utzitako liburu batean begiratu ondoren, euskal izenak ipintzea bi anaia bizkiei: Iker eta Aitor. Hasieran auzokoek, sendikoek eta lagunek oro harriduraz hartu zituzten izenok, baina dagoeneko ohitu dira. Artikulua eman zen argitara Iker eta Aitorri buruz atzo Buenos Airesko Diario Popular kazetan.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
