euskal diaspora eta kultura
2011/02/23
"Xume-xume baina indartsu" abiatu da 'Xiberoa Zinez' luzemetraia egiteko diru bilketa, ekimeneko partaide den Mixel Etxekopar musikari eta euskaltzalearen esanetan. Filma zubereraz eginiko lehen luzemetraia izango da eta Muskildiko Peio Cachenaut gazteak zuzenduko du. Lanak idazle izan nahi duen gazte baten eta AEBetatik eskarmentua hartuta bueltatu den 'Hollywood' osabaren arteko harremana irudikatzen du. Proiektuak 45.000 euroko aurrekontua du eta, euskal-amerikar istorio bat islatzen duenez, Hebentik elkarteak munduko euskaldunen sostengua eskatu du. Parte hartu nahi duenak 50 euroko laguntza eman dezake eta Xiberoko "euskal munduaren ilusioa piztu" duen proiektu honetako 'ekoizle' izango da.
2011/02/23
Egunak aisa pasatzen dira eta Diaspora alorrean eskabideak aurkezteko zabalik zeuden epeak ixtear daude ia. Izan ere, euskal etxeei zuzenduriko dirulaguntzak eskatzeko eta baita ere atzerrian egoera larrian eta asistentzia faltan dauden Diasporako kideentzako laguntzak galdegiteko epea datorren astelehenean, otsailaren 28an, amaituko da. Jaurlaritzatik gogora ekartzen da ezinbestekoa dela eskabide orri originalak data horren zigilua eta lehenagokoa izatea. "Bidali, posta zerbitzu publikoz, courier pribatuz edo eskuz Euskadiko Ordezkaritzetan edo kontsulatu eta enbaxadetan entregatuz" egin daiteke, diote.
2011/02/22
Une historikoak ari dira gertatzen Afrika Iparraldeko eta Ekialde Hurbileko herrialde arabiarretan eta Korrontzi euskal taldeko kideek gertu gertutik bizitzeko aukera izan dituzte, Marokon bukatu berria duten biraren baitan. Taldeak Casablancan, Tangerren eta Rabaten jo zuen, Cervantes Institutuak gonbidatuta, eta Marokoko gizartearen bi alderdi ikusi dituzte: batetik, antzokietan ikusleek euren musikari eginiko harrera ona, zutik eta gogo biziz dantzatzen, eta bestetik, agian ikusle horiek berak kalean manifestaziotan gobernuaren aurka protestan.
2011/02/22
Mexikoko Guadalajarakoarekin batera, Buenos Airesko Nazioarteko Liburu Azoka da Latinamerikako garrantzitsuena. Aurten, eta Azokaren ibilbide nabaria goititzeko asmoz, Liburuaren Munduko Hiriburua izan da izendatua Argentinako hiri nagusia. Ekitaldi bereziak egingo dira testuinguru horretan, tartean bertako artista plastikoa den Marta Minujin-ek egingo duen 'Buenos Airesko liburu Babel Dorrea', hainbat hizkuntzatan argitaratutako 20 mila libururekin eraikitako dorrea. Proiektu erraldoi honetan Euskadik ere hartuko du parte; Euskadiren Argentinako Ordezkaritzak testuak bidaltzeko gonbitea luzatu die euskal erakundeei.
2011/02/22
Joan den larunbatean, otsailaren 19an, 89 urte bete dira Arrecifes herri argentinarreko euskaldun koadrila bat bildu eta 'Elkarri Laguntzeko Elkarte bat', Socorros Mutuos izeneko laguntza-elkarte horietako bat sortzea erabaki zuenetik. Urtebetetzea gogoan atxikiz, eta Buenos Aires probintzia iparraldeko herri honetako euskal historiako zati batzuk mahaigaineratuz, elkartea sortu zutenetako batzuen ondorengo den Juan Lucio Agotegarayk honako artikulua partekatu nahi izan du EuskalKultura.com-eko irakurleekin.
2011/02/22
Beijing-en bi hilabeteko egonaldi artistikoak sustatzen dituen 'Goazen Txinara 2011!' programaren bultzatzaile nagusia da Judas Arrieta artista hondarribiarra. 2005eko otsailean heldu zen bera lehen aldiz Txinako hiriburura, hamar egunetarako printzipioz, eta bertan jarraitzen du oraindik ere, hiriak liluratuta. "Segituan konturatu nintzen hemen zeozer berezia gertatzen ari dela", dio. Ziztu bizian aldatzen ari den gizarte honetan milaka urteko historiaren ondarea, iraultza kultural bat eta kapitalismo basatia nahasten dira. Arte sorkuntzarako ingurune bikaina. Arrietak bi euskal sortzaileri esperientzia hau bizitzeko gonbitea egiten dio.
2011/02/22
Joan den otsailaren 12an Salt Lake City-n egindako bilkuran, NABOk (Ipar Amerikako euskal erakundeen federazioak) elkarte berri bat onartu zuen bere kideen artera: 'Rhode Island Basque Club' euskal etxea. New Yorketik iparraldera dagoen estatua da Rhode Island eta 90. hamarkadaz geroztik bertako Newporteko frontoiaren inguruan biltzen ziren euskaldunek osatzen dute euskal etxea. 2011rako gauzatu nahi dituen ekimenak: Aberri Eguna eta beste jai batzuk ospatzea, euskara eta dantza ikastaroak antolatzea eta kultur ekitaldiak egitea.
2011/02/21
Patxi Lopez lehendakaria ostiralean Legebiltzarrean mintzatu ostean agerpen horri buruzko kronikak irakurri ditugu asteburuan Euskal Herriko komunikabideetan. Carmelo Barrio PPko legebiltzarkidearen galdera bati erantzunez, Lopezek Jon Uriarte Argentinako EAJ-PNVko 'Extraterritorial'eko lehendakariorde den Jon Uriartek plazaratutako artikulua aipatu zuen, gogor kritikatuz jeltzale argentinarrak esandakoak. Lopezen hitz horiez David Guadillak El Correo egunkarian sinatzen duen kronika ekarri dugu hona bere horretan.
2011/02/21
Nafar ordezkaritza bat, Miguel Sanz presidentea buru, partaide arituko da aste honetan New Yorken garatuko den 'Nafarroaren Astea'ren VII. edizioan. Bihartik hasita, otsailaren 22tik 27ra bitartean, energia berriztagarriak, ardoa, gastronomia eta kultura nafarra hartuko dira aipagai edota dastagai, batetik erakunde eta solaskide nafarrek gauzatuko dituzten bileretan, eta baita publiko espezialduari zein orokorrari begira egindako ekimenetan ere. Besteak beste, New Yorkeko 13 jatetxek 'nafar menuak' eskainiko dizkiete igandea bitartean Sagar Handian jaki eta ardo nafarrei ohore egin nahi dietenei.
2011/02/21
FEVAren kultur eskaintzaren baitan, bost euskal etxetara zabaldu zuen iaz 'Seme-alabek ahaztu nahi dutena, bilobek gogoratu nahi dute' izeneko mintzaldia Laura Nobilek. Lagun anitz bildu ziren leku bakoitzean interes berezia pizten duen gai honen oinarri eta xehetasunak ezagutzeko, eta proposamenaren arrakastak aurten ere gaia eskaintzera eraman bultzatu du Argentinako Euskal Federazioa. Hitzaldian genealogiaren arloan ikerketak nola egiten diren azaltzen du Nobilek eta euskal genealogian sakontzen duen arren, jarraipideek jatorri guztien iraganean miaketak egiten hasteko balio dute.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
