euskal diaspora eta kultura
2007/05/28
Alarma gorria piztu du Izurako (Nafarroa Beherea) Haize Berri kultur etxeak, laster 30 urte beteko baditu ere, arazo ekonomiko eta politikoengatik bere geroa ez du segurtatua. 'Ni ez naiz frantses kulturaren kontra. Anitz kontsumitzen dut, ez da hori. Ikusten duguna da Euskal Herrian oraino frantses kulturaren hedatzeko dela ematen dirua, ahantziz hemengo kultura bat badela', dio bertako arduradun Maixan Merkapidek. 'Ulertu behar da euskal kulturaren bizia dela jokoan' aitortu dio Nora Arbelbide kazetariari, Berriak duela egun gutxi argitara eman eta guk hona ekarri dugun elkarrizketan.
2007/05/28
Valparaisoko Euskal Etxeak 1943an elkartea sortzeko abenturari ekin zioten bazkideetako bat galdu du. Pedro Maria Elorriaga Echevarria joan den maiatzaren 12an hil zen, Viña del Mar-en. Hileta Valparaiso ondoan dagoen hiri honetan egin zen eta bertako eta Txileko euskal komunitateko ordezkaritza mardula izan zen bertan. Archibaldo Uriartek, Valparaisoko Euskal Etxeko lehendakariak, hitz batzuk eskaini zituen hiletan, Elorriagaren bizitza eta ibilbidea gogoratuz. Zornotzan (Bizkaian) jaioa 1923an, Elorriaga frankismo eta nazismoarengandik ihesi heldu zen Txilera.
2007/05/26
Zinemaldia, Literaldia, EH Sona!... urtean zehar Bartzelonako Euskal Etxeak hamaika jaialdi antolatzen ditu Euskal Herriko musikari, idazle eta zinemagileei euren lana Katalunian erakusteko aukera emanez. Horiez gain, urtean zehar ere egitarau zabal eta anitza dauka, bertako langileek eta kultur taldeak antolatuta. Orain kultur koordinatzaile lana beteko duen pertsona baten bila dabil Euskal Etxea. Eskabideak lehen bait lehen bidali behar dira, lanpostua berehala erabaki eta hastekoa baita.
2007/05/26
Donapaleun sortu kantariak ostegunean hasi zuen abantxu hamar egunez Argentinan eginen duen itzulia. Buenos Aireseko debutaren ondotik, atzo Rosarion ari izan zen, Zazpirak Bat Euskal Etxeak bere egoitzan antolatu bestan, eta heldu den ostegunean Entre Ríos probintziako Paranán eskainiko du emanaldia, bertako Urrundik Euskal Etxearen eskutik. Parisen bizi den Felipe Saldivia gitarrajole txiletarra lagun --jatorri euskaldunekoa hau ere--, EuskoSarek lagundu duen itzuli honekin Etchegoyenek bere lehenengo kontaktua ukan du Argentinako publikoarekin, izan ere, Euskal Herritik eta Frantziatik kanpo egiten duen lehenengo tour tipia baita, eta kontent ageri da. EuskalKultura.com-i adierazi dionez, nahiko luke heldu den urrian berriz etorri, Rosarioko Euskal Aste Nazionalean parte hartzeko hain zuzen.
2007/05/25
Asteazkenean hasi zen 'Euskaldunen ekarria XIX eta XX mendeetako Mexikon' kongresuak euskal komunitateko kide ugari bildu zituen lehen egunean, Mexikoko historian euskaldunen papera aztertu zuten adituen hitzaldiak entzuteko gogoz. Hizlarien artean Euskal Herritik heldutako Beñat Cuburu historialari lapurtarra izan zen, besteak beste. Mintzaldiek atzoko eta gaurko euskaldunen istoriak ekarri zituzten, ia-ia gaur egungo euskal komunitatearen historiaraino helduz.
2007/05/25
Bukatu berria da Bartzelonako euskal literatur jaialdia --EH! Literaldia-- eta Euskal Etxekoek lanean segitzen dute, hurrengo ekimena aurkezten: Zinemaldia'07. Euskal zinemagintzari eskainitako jaialdi honek bere bigarren edizioa izango du artengoa, maiatzaren 29an hasi eta ekainaren 9a bitartean. Dokumentalak izango dira Zinemaldiko izar, 'Nomadak TX' eta 'Agian' bezalako lanekin, baina 'Kutsidazu bidea, Ixabel', iazko euskal filme arrakastatsuena ikusteko aukera ere izango da, besteak beste.
2007/05/25
Miguel, edo Mike, Olano hil da. Berez Euskal Herrian jaioa (Busturia, 1923), 1948an etorri zen Estatu Batuetara eta urte batzuetan Idahon eta Washington estatuetan ibili ondoren, Winnemucca Hotel euskalduna erosteko aukera sortu zitzaion 1963an, eta Nevadako herri honetara aldatu zen, hotelero bihurtzeko. Bertan bizi izan da geroztik, Estatu Batuetan gelditzen den garai bateko moduko azkeneko euskal ostatu xaharrarekin xahartzen. Molde xaharreko gizon ona, hotelerua eta langile fina, NABOk omenaldia egin zion 2005ean, 25 urtez Winnemuccako euskal etxeko NABO delegatua izan ondoren. Lagun ugari utzi ditu. Guztiei, eta seme Mikeri, gure doluminak. Goian bego.
2007/05/24
Euskal Liburutegiaren ardura hartuko duen profesional baten bila ari da Nevadako Unibertsitatea. Renoko Basque Library Euskal Herritik kanpo euskal gaiei eskainitako liburutegi nagusiena da eta Center for Basque Studiesekin batera euskal Diasporari buruzko ikerketetan erreferentzia gune. Liburutegi honen ardura bere kargu hartu eta proiektu erakargarri hau garatzeko aukera izango du AEBtako zein Euskal Herriko edo Diasporako profesional batek, Basque Library-k egin duen lan eskaintzari erantzunez. Kurrikulumak bidaltzeko epea ekainaren 18an bukatuko da.
2007/05/24
Ikerbasque-k, Zientziarako Euskal Fundazioak, esperientziadun ikertzaileentzat 30 lanpostu eskaintzen ditu. Proposamena atzerrian dauden goi-mailako ikertzaileei zuzentzen da, euskaldun zein atzerritar, euren ikerketa-ibilbidea Euskal Herrian egiten jarrai dezaten. Hautagaiek bete beharreko baldintzen artean, honokoak: doktore-tesia gutxienez 2003ko otsaila baino lehen amaitua izan eta Euskal Sistema Zientifikotik kanpo gutxienez lau urteko esperientzia izatea kalitate goreneko mundu mailako ikerketetan. Argibide gehiago, artikulua honetan.
2007/05/24
Joan den larunbatean egin zitzaizkion elizkizunak. Arrecifes-en (Argentina) sortua, Adalberto Pedro Loyola, Potxolo, oso gazterik sartu zen bertako Euskal Etxean, eta herriko euskaldunen artean instituzio bat izan zen Tiburcio Bilbaorekin --don Tiburcio-- ikasi zuen txistuan. Euskal Herrian jaioa zen hura eta harengandik jasoko zuen berak, gero, bera bezala Argentinan jaiotako gazteei transmititzen jakin zuen txistularitzaren lekukoa eta garra. Urtetan, berak jotako aireak Arrecifes eta inguruko dantzari belaunaldien inspirazio eta babes izan ziren. Amelia Irigoyen-ekin ezkondua --hemendik besarkada bero bat-- ez zuten berez familiarik izan. 'Bertako gazteria, Euskaldunak Denak Bat-eko gazteak izan dira euren seme-alabak, egun bere falta somatzen dutenak'. Halaxe aitortu zuten bere lagunek Arrecifeseko euskal komunitateak larunbatean egindako omenaldian.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
