euskal diaspora eta kultura
2007/04/20
Azken egunotan Aberri Eguneko bilkura eta ospakizunak izan dira nagusi munduko hainbat euskal etxeetan, eta gutxinaka gutxinaka ekitaldi hauen berri heltzen ari da BasqueHeritage.com-era. Argentinan, adibidez, joan den astean Buenos Aireseko Euskaltzaleak eta Eusketxe, Emakume Abertzale Batza eta Acción Vasca de la Argentina edota José C. Pazeko Toki Ederrek lagun eta kideak bildu zuten beste behin ere egun handi hau ospatzeko. Perun, Limako Euskal Etxeak ere bilkura egin zuen, eta ospakizunak izan ziren baita ere Caracasen (Venezuela) eta Santiagon (Chile).
2007/04/19
Patxi Baztarrika, Hizkuntza Politikarako sailburuordea Boisen dago, hango Estatu Unibertsitateak antolatu duen International Conference of Basque Studies delakoan parte hartzeko. Baztarrikak euskararen egoerari buruzko hitzaldia emango du mintegian eta Basque Studies Consortium taldea sortzeko egingo den bilkuran parte hartuko du. Talde honek Eestatubatuetako unibertsitateetan Euskal Ikasketa Programak sortu eta bultzatzea du helburu.
2007/04/19
New Yorkeko Eusko Etxeak ehun bat bazkide eta lagun bildu zituen joan den apirilaren 8an elkartearen Brooklyngo egoitzan, Aberri Eguna ospatzeko asmoz. Bertaratu zirenen artean Bizkaiko gazte talde bat eta Kirmen Uribe poeta izan ziren, azken hau egunotan AEBtan egiten ari den aurkezpen biran tartetxo bat eginez. Idazle ondarrutarrak poesi batzuk irakurri zituen eta artez deskribatu zuen Eusko Etxean bizitako giroa: 'New Yorken badago Euskal Herri txiki bat'.
2007/04/18
Euskal Herriko Aldizkari Ofizialak (EHAO) datozen egunetan argitaratuko du Gaztemundu 2007 programarako hautatuak izan diren pertsonen zerrenda. Aurtengo Gaztemunduk 30 lagun bilduko ditu uztailaren 2tik 14ra Euskal Herrian. Parte hartzaileak euren herrietako euskal etxeetako kide dira eta egonaldian zentruetako jarduerak dinamizatzeko trebakuntza jasoko dute. Artikulu honetan 30 pertsona hauen izenak ematen ditugu, gehienak Argentinakoak eta besteak Uruguai, Kolonbia, Peru eta Estatu Batuetakoak.
2007/04/18
Edorta Jimenez (Mundaka, 1953) Argentinan dabil egunotan 'Tifusaren urtea' bere azken lana aurkeztuz hainbat euskal etxe eta kultura etxeetan. Liburua 'thriller historiko' bat da eta Txalaparta argitaletxearen adar argentinarrak argitaratzen duen lehenengo lana da. Gaur arratsaldean Jimenezek Rosarioko Zazpirak Bat Euskal Etxea bisitatuko du, Gernikako bonbardaketaren 70. urteurrenari buruzko mintzaldia eskainiz. Datozen egunetan idazle bizkaitarra Córdoba, Villa Carlos Paz, Santa Rosa, La Plata eta Buenos Airesen ere arituko da.
2007/04/18
Datorren uztailean 10 eta 13 urte bitarteko gaztetxoak abentura eta naturan murgildu ahal izango dira astebetez Urbasako Parke Naturalean, Udalbide Elkarlanean Elkarteak antolatu dituen Udalekuei esker. Zortzi herrialdeetako gazteek parte hartu ahal izango dute bertan, hau da, bai Euskal Herriko eta baita Diasporako gazteek ere. Eskalada, espeleologia, bizikleta eta mendi txangoak egingo dituzte, besteak beste, euskara hutsezko testuinguruan. Astebeteko kanpalekuaren prezioa 100 eurokoa da eta izena emateko epea maiatzaren 11an bukatuko da.
2007/04/17
Ekitaldi xume baina emozioz betearekin, garai desberdinetako dantzariak bildu ziren Arrecifeseko Euskal Etxean egoitzako areto nagusiaren inaugurazioaren 60 urteurrena ospatzeko. Joan den apirilaren 7an izan zen ekitaldia eta aspaldiko 'Itxarkundia' dantza taldeko kideak eta gaur egungo 'Ugarritzak'-eko dantzariak batu ziren hainbeste saio eta dantzaldi hartu zituen aretoan. Afalostean Euskal Etxeko egoitza eraiki eta euren lanarekin mantendu zuten hainbat euskal-argentinar belaunaldiengatik topa egin zuten bertan bildutakoek.
2007/04/17
Datorren apirilaren 26ean 1937ko bonbardaketa gogoratuko dute Gernikan, 70 urteurrena betetzean. Munduko herrialde desberdinetatik euskal etxe asko batuko zaizkio urteurrenari. Horietariko batzuk, Lapridako Arturo Campion Zentrua eta Villegasko Euskal Etxea bezala, hasiak dira jada ekitaldiekin eta beste batzuk, San Frantziskoko Basque Cultural Center-a kasu, gaur bertan hasiko dira. Baina gehiago dira, hala nola, Río Cuarto, La Plata, eta datozen egunotan informazioa hain segur bidaliko diguten beste hainbat. Gehienek apirilaren 26aren inguruan egingo dituzte ekitaldiak.
2007/04/16
Magdalena Mignaburu irakaslea da eta Diasporan aditua. 2005ean FEVAk botatako erronka hartu zuen bere gain: erakundearen mende erdiko historia jaso eta liburu batean biltzea. Lan horren fruitua Buenos Aireseko Liburu Azokan aurkeztuko du idazleak bihar zortzi, 24an. Egun, beste bi proiektuetan murgilduta dabil Mignaburu, hauek ere FEVAren eskutik: Argentinan euskarak zein euskal dantzek izan duten bilakaeraren historia ikertzea. Guzti hau Diaspora Vasca Argentina webgunetik egiten duen lana albora utzi gabe. 'Gure memoria gordetzea izan da nire betiko kezka', azaldu dio BasqueHeritage.com-i.
2007/04/16
Buenos Aires probintziako Maipú herrian finkatu dute datorren igandean hitzordua Argentinako Alza familiakoek. 1875 eta 1885 bitartean argentinaratu ziren Pedro, Juan Mari eta Francisco Alza Elosegui-ren ahaideak, eta apur bat geroago gauza bera egin zuten euren bost iloben ondorengoak daude bertara deituta. Alza edo Altza konexio honetako kideak Gipuzkoako Irunen daukate jatorria eta eutsi nahi diote familia harremanari. Elkarretaratzea, 'geure familiaren jatorriarekin eta geure erro euskaldunekin batzen gaituzten loturak sendotzearren' antolatu dutela aitortu diote BasqueHeritage.com-i antolatzaileek.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
