euskal diaspora eta kultura
2007/11/30
Europako euskal etxeek Parisen egingo dute bihar euren orain arteko lehen bilera. Topaketaren asmoa esperientziak trukatu eta elkarren babesarekin ekimen amankomunak bultzatzeko medioak jartzea da. Ideia Pariseko Eskual Etxetik sortu zen eta joan den uztaileko Mundu Biltzarrean Europako beste euskal etxeei gonbitea luzatu zieten. Lehenengo bilera honetan Paue, Montpellier, Bordele, Parise, Madril, Bartzelona, Valentzia, Murtzia, Erroma, Zurich eta Londreseko euskal etxeetako ordezkariek hartuko dute parte.
2007/11/30
Ia hogei urtez izan da 'Eusko Jaurlaritzaren ordezkaria' Iparraldean eta Europako foroetan. Gurasoak gipuzkoarrak Pauen jaioa, frantsesa berezko hizkuntza du, euskara eta gaztelaniarekin batera, eta horrek, bokazio europarrarekin batera, gauzak erraztu dizkio bere lanean. Lehendakariaren Kanpo Harremanetarako Komisionatua da, eta ALDE (Demokrata eta Liberalen Europaren aldeko Batasuna) talde politiko europarreko bigarren presidenteordea. Atzo esan zituen despedida hitzak Lurralden Batzordeko partaideen aurrean. Izaskun Bilbao eusko legebiltzarburuak bere urtetako lana eskertu zuen atzo Bruselan, honako hitzez: 'Europako ateak zabaldu dizkiozu Euskadiri'.
2007/11/29
Badator Euskararen Nazioarteko Eguna eta munduko euskal etxe eta komunitateek prest dituzte data ospatzeko hainbat ekitaldi. Jaia berez abenduaren 3an, hau da, datorren astelehenean ospatzen bada ere, euskal etxe askok asteburu honetara aurreratu dituzte euren ekimenak. Frantzia, Mexiko, Estatu Batuak, Uruguai... dira euren bitartez euskararen aldeko adierazpenaren oihartzuna entzungo duten herrialdeetako batzuk.
2007/11/29
Abenduaren hiruan ospatuko den festa honek Euskal Herriko mugak gaindituko ditu aurten ere, munduko lurraldeen artean Ameriketako Hegoalderaino ere iritsz. Urte asko daramatzate Argentinako euskal etxeek besta hau ospatzen eta jaiak bukaera bikaina emango die 2007 ikasturteko euskara klaseei. Abenduaren 1a eta 8aren arteko astean anitz jarduera izango dira Argentina euskal etxeetan, joku, musika, antzerki eta bateko eta besteko emanaldiz biziaraziz Aitorren hizkuntza zaharra.
2007/11/28
Iñaki Plaza eta Ion Garmendia O+Hatz (HogeiHatz) taldea osatzen dute. Ekimen berezi honetan txalaparta, txistua, panderoa eta alboka bezalako euskal instrumentuen kontzertuak eta ikastaro praktikoak eskaintzen dituzte. Euren asmoa ikusleei instrumentu hauek erakutsi, esku artean hartzen utzi eta kasu batzuetan --panderoa, txistua-- jo ere egin ditzaten da. Datorren astelehenean taldea AEBetara abiatuko da, bertako euskal etxeetan bira bat egiteko, NABOren eskutik. Reno, San Francisco, Boise, Chino eta Washington DC-n eskainiko dituzte emanaldi eta ikastaroak.
2007/11/28
Pertsona aktibo eta langilea da Olga Aurtenechea. Argentinako Arrecifesen sortua, besteak beste, Lehen Hezkuntzako andereño, Arrecifeseko Museoaren Lagunen Elkarteko eta Artxibo Historikoko presidente, eta honen barnean Arte Museoko sustatzaile, Euskaldunak Denak Bat Euskal Etxeko lehendakariorde... honelako zenbait lanetan ibilia da. Haatik, garatu eta landu dituen alorren artean, margolaritza, pintura, izan da seguruenik oihartzunik handiena ekarri diona, Arrecifesen bertan eta Buenos Aires probintziako zenbait erakustokietan lanak eskegitzeko aukera eman baitio.
2007/11/28
Unión Vasca Euskal Etxeko arduradunak pozik agertu dira elkarteak aurtengo Kolektibitateen Azokan eskuratu dituen emaitzekin eta esker ona azaldu diete ekitaldirako lanean jardun duten kide eta lagunei. Azokaren 7. edizio honetan elkarte euskaldunaren postuak Stand Onenaren saria jaso zuen, iaz lortutako postu bera berretsiz. Gainera, Kolektibitateen Erreginaren aukeraketan, euskal ordezkariak, Antonela Caponik, Lehen Aipamena jaso zuen.
2007/11/27
Maila goreneko bisita izango da datorren asteko astelehenean Gloria Macapagal-Arroyo filipinar presidenteak Ordiziara egingo duena. Arrazoia, Andres de Urdaneta itsasgizon eta bidaiari ordiziarraren jaiotzaren 5. mendeurrena. Urdanetak Filipinetatik Mexikora bueltatzeko itsasbide azkarrena aurkitu zuen, 250 urtez merkataritza bide zinez garrantzitsua izan zena. Ibarretxe lehendakariak Ajuria Enean hartuko du Macapagal presidentea, agintari filipinarrak Euskal Herrira egingo duen lehen bidaia honetan, ondoren Ordiziara elkarrekin biltzeko, hasiera ematearren Urdaneta Urteko ekitaldiei.
2007/11/27
Caracaseko Eusko Etxeak hilabetero antolatzen duen mezetara joan ohi direnek, eta Venezuelako hiriburuko euskal erakundea berau, partaide izan nahi izan dute azaro honetan aita Martin Larrainzar Goñi, apeztu zela 50 urte bete direla-eta, bere lagun, ikasle-ohi eta Santo Tomas de Villanueva Eskolako lankide eta eskola-komunitatearen aldetik jasotzen ari den omenaldiaz. Karia hortara, hilaren 4ean, hilabeteroko mezarekin batera, igandez beraz, bere omeneko ekitaldia antolatu zen Eusko Etxean eta oroigarri txiki bat eman zitzaion, lagun eta adiskideen esker oneko txalo artean, euskal komunitateak dion estimua erakutsi nahian.
2007/11/27
Argentinan Euskaraz programaren 2003-2007 planaren barruan trebakuntza jaso duten berrogei inguru euskera ikasle-irakasleek lau urte horietan lortutako mailaren arabera bi modalitate ezberdinetan jarraituko dute beraien formakuntza. Diaspora 1 taldeak orainarteko modalitatean jarraituko du bere ikaskuntza prozesua eta Argentinan trebakuntza jasoko dute, internet eta barnetegien bitartez, hurrengo urtean 1B maila lortu arte. Diaspora 2 taldeko hogeitabost lagunek, berriz, bi hilabeteko prestakuntza ikastaro bat egingo dute Euskal Herrian, Lazkaoko Maizpide Barnetegian. Euskal inguru batean jasoko dituzten klaseen bidez euskara maila hobetzeko aukera bikaina izango dute.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
