euskal diaspora eta kultura
2007/08/29
Milaka eta milaka bisitari bildu ziren joan den larunbatean Main ibaiaren ertzean Museums-Ufer-Fest jai erraldoiaz gozatzeko grinez. Hogei agertokitan banaturik, kontzertu eta ekitaldiak txandakatzen joan ziren asteburu osoan zehar, tartean euskal musikarienak, Hemendikan taldea eta Rafa Rueda eta Petti musikarien eskutik. Unibertsitateko euskara ikasleek egiten duten Irrati X saioak antolatu zuen emanaldia.
2007/08/29
Bogotán bildu ziren herenegun, astelehena, Kolonbiako Pilota Federazioko goi buruzagiak eta bertako Euskal Etxeko zuzendariak, elkarrekin lan egin eta euskal pilotari bultzada bat ematearren Ekintza Plan Nazional bat abiarazteko aukera aztertzeko. Euskal Etxeak pilota eskolak eskaintzen ditu egun Bogotáko kantxetako batean eta litekeena da Federazioak 2008an Nazioarteko Pilota Norgehiagoka bat Pasto hirian antolatzea. Herrialde osoan, ordea, ez omen dago gaur araudipeko kantxa bakar bat ere, Nazioarteko Euskal Pilota Federazioko iturriek adierazi dutenez.
2007/08/29
Gustura gelditu dira Ayacuchoko Euskal Etxeko kideak, Buenos Aires probintzia hegoaldeko elkarte honek joan den abuztuaren 18, 19 eta 20ean antolatu zuen Argentinako Mus Txapelketarekin. Partehartzaileak ere pozik, Ayacuchon izan zuten harrera eskertuz. 18 euskal etxetako ordezkariek parte hartu zuten txapelketan eta lehia gogorraren ostean Rosarioko Eduardo Imperale eta Domingo Legarretak osatzen zuten bikotea izan zen irabazle.
2007/08/28
Estatu Batuetako San Frantzisko hiria izango da irailaren 6tik 15ra I. Euskal Pilota Txapelketaren egoitza. Munduko Pilota Batzarrak --World Pelota Council, ingelesezko bertsioan-- antolatu du txapelketa eta zortzi herrialdeetako federakunde eta taldeen partaidetza izango du. Hiru modalitateetan jokatuko dute pilotariek: eskuz, larruzko paleta eta nesken gomazko paleta. Partidak South San Francisco Basque Cultural Center-en izango dira ikusgai.
2007/08/28
Habanan ibilia da uda honetan (ipar hemisferiokoan; negua, australean) Gaztelu Zahar Hendaiako korala. Koru kantua eta euskal aireak maite zituzten multxo bat gizonek 1946an sortua, orain artean 12 disko grabatu ditu, horietarik azkena iaz, elkartearen 60. urteurrenarekin bat eginez plazaratutakoa. Heldu den artikulua Michel Hernandezek sinatua da Gramman.
2007/08/28
Jaiotzez zarauztarra, badira ia 56 urte Miren Alazne Iruretagoiena Argentinara heldu zela eta hortxe, Macachin-en, bere egin zuen Panpako herrian, euskal komunitateari lotu eta bertako zutabe bilakatu da, bere lana eta euskal kezka hurrengo belaunaldiei hedatuz. Miren Alaznek lanean dihardu gaur egun ere Macachingo Eusko Alkartasuna Euskal Etxearen barnean eta, internet lagun, harremanetan beste euskaldun askorekin, Argentinan eta mundu zabalean. EuskalKultura.com-en irakurle zintzoa, uda (europar) honetan Zarautzera heldu zelarik, egunero bere ordenadorean hartzen dituen e-mailak bidaltzen dizkiotenetako batzuei arpegia jarri nahi izan die, eta gure zuzendaria, Joseba Etxarri, kostaldeko herri gipuzkoar horretara hurbilarazi zuen.
2007/08/27
Berrogeita hamar bat pertsonak interesgarri izango zela iritzi eta Bogotá-ko Euskal Etxeak eskaintzen dituen euskara eskoletan parte hartzeko eman zuten izena. Eskolak zuzenekoak dira, irakaslea bertan, eta baita ere CD eta internet bidezkoak, eta txat batean parte hartzeko aukera ere badakarte, ikasleek, egunero, sartu ahal izan daitezen eta ikasitakoa ikaskideekin ordenagailu aurrean praktikatu, etxetik, lantokitik edota cyber batetik. Bestalde, Kolonbiako Euskal Etxea tratutan dabil Cundinamarcako Unibertsitatearekin eta SENArekin, irakasten dituzten hizkuntzen artean euskara ere eskain dezaten.
2007/08/27
Txileko Bosgarren Erregioko gazte talde batek osatzen du 'Euskal Gazteak'. Joan den larunbatean, haragi errealdi bat tarteko, abuztu hasieran Iñaki Deuna izeneko jaia antolatu zuen batzordearekin bildu ziren. Iñaki Deuna, esan beharra dago, Eusko Etxeko jai historiko nagusia da. 'Txinberoen musikarekin batera, helduenentzat, eta gazteenen irri eta kantuen artean, V Erregioko euskal familia Iñaki Deuna jaiaren inguruan arrakastaz bildu ahal izana ospatu genuen, eta datorren ostegunean egingo dugun Euskal Zine saioari ere (filma, Kutsidazu bide, Ixabel) azken ikutuak eman genizkion', adierazi dio EuskalKultura.com-i Francisco Javier Pinedo, gazte taldeko buruak.
2007/08/27
Hiru gerla borrokalari ohi hauen lekukotasuna 'Palabras Mayores' delako ekimenaren baitan behar da kokatu. Duela urte t'erdi abiarazia, ekimena arrakastatsua suertatu da orain artean. Azkeneko saio honetan, gonbidatuek, Argentina eta Erresuma Batuak 1982an izan zuten gatazkan zibilek izan zuten partaidetza aipatu zuten, baita atzerritarrena ere eta iraganean zein gaur egun zertan den 'Malvinen afera' azaldu zuten. Solasaldia filmatu egin zen eta Euskal Etxeko Liburutegian egongo da eskuragai.
2007/08/25
Partaidetza berezia Hiru Erreka Euskal Etxe argentinarreko dantzariena, Buenos Aireseko probintzian, jantziak estreinatu baitzituzten hiriburu federaletik bostehun bat kilometro hegoaldera dagoen herri honetan urtero antolatzen den Gizataldeen Azokaren baitan. Honako edizioan ere, eta gainerako standetan ohi bezala, gastronomiak leku propioa hartu zuen euskaldunenean ere, sukalde aktibo batekin batera Euskal Herria eta euskaldunei buruzko informazio ematen ahalegin polita egin zutelarik Hiru Errekakoek, zenbait mapa, argazki, marrazki, liburu eta objektuen bidez. Euskal Etxeko dantzariak --guztiak neskak-- ikuskizun orokorreko partaide izan ziren, Udal Balletarekin, eta Danimarka, Siria, Espainia, Frantzia, Italia eta Libanoko elkarte eta ordezkariekin batera.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
