euskal diaspora eta kultura
2007/11/16
Aurreko urteotan bezala, euskarak presentzia ukanen du gaur hasi eta datorren igandera arte Berlinen gauzatuko den Expolingua hizkuntzen Azokan. Honakoan, ordea, presentzia hori gutxienez bikoitza izango da, ohiko Eusko Jaurlaritzakoaz aparte --aurten Galiziako Xunta eta Kataluniako Lull Institutuarenarekin batera eratua-- Nafarroako Gobernuak ere bidali baitu ordezkaritza eta erakustokia ipiniko baitu bertan, Nafarroako Euskararen Institutu sortu berriak. Hezkuntza kontseilari nafarra ere, Carlos Perez-Nievas, bertaratuko da Azokara eta, Jaurlaritzaren aldetik, presentzia instituzionala Patxi Baztarrika Hizkuntza Politikarako sailburuordeak eta Lorea Bilbao Kultura aholkulariak ekarriko dute.
2007/11/16
Lagunt eta Maita Paueko Euskaldunen Elkarteak berrogei urte bete ditu eta Izar Bide ikuskizun berezia aurkeztuko du gaur urteurrena ospatzeko. Dantzek eta kantuek osatutako erakustaldia aurrera eramateko ehun pertsona baina gehiago aritu dira lanean ia urtebetez. Emaitza gaur ikusi ahal izango den ikuskizun landua izan da, erbesteratzearen aipamen poetikoa. Bertan oso modu berezian azalduko dute Euskal Herriko puntu desberdinetatik Diasporara emigratu zutenek bizitakoa eta nola zabaldu diren euskaldunak gaur egun arte.
2007/11/16
Joan den asteburuan, Maria Blanca Irusta irakasleak koordinaturik, FEVAk Kultura Tailer bat bideratu zuen Buenos Aireseko Laurak Bat-en. Tailerraren helburua, "euskal identitatea zabaldu eta honi buruzko gogoeta bultzatzea" zen. Taldeka eta bakarkako lana egin zuten ikastaroan parte hartu zutenek, hainbat gai aztergai. María Blanca Irustak positibo baloratu du esperientzia, "ideia ezberdinak errespetuz eztabaidatu ditugulako, gazte eta helduen ekarpenen aberastasunagatik eta ekimenak berak piztu zuen interesagatik", laburbildu dio EuskalKultura.com-i.
2007/11/16
Badira hamaika urte Viedma eta Patagoneseko euskaldunak biltzen dituen 'Beti Aurrera Aberri Etxea' Euskal Etxea sortu zenetik. Urte berri bat betetzen duten bakoitzean festa jendetsua prestatzen dute bertakoek eta aurten ere jaialdi ederra antolatu dute biharko, afaria hain zuzen, Necocheatik etorriko den 'Otxote Osasuna'ren partaidetzaz, dantzaldi herrikoiaz amaitzeko, jendeak gau gogoangarria pasa dezan. Hitzordua, gaueko bederatzi t'erdietatik aurrera izango da, Viedmako Mutual Obreros de la Cosntrucción delako aretoan, eta bertara herritar guztiak daude gonbidatuta, euskal jatorrikoak izan ala ez.
2007/11/16
Bolivar-eko Nafar Etxeak, Buenos Aires probintzia argentinarrean, zenbait dirulaguntza banatu ditu joan den azaroaren 2an herriko zenbait proiektu eta gizarte ekimenen artean, ia 40.000 peso argentinar orotara. Dirulaguntzak Nafar Etxean eginiko ekitaldi batean banatu ziren, Miguel Angel Lasa erakundeko presidentea buru, zuzendaritza batzordeko kideen aurrean eta laguntza hartu behar zuten honako elkarte onuradunetako ordezkariak bertan: Alegrías Eguneko Zentroa, ALCECAB, Asisko San Frantzisko Jantokia, San Carlos Zaharretxea eta ITO Nesken Etxea.
2007/11/15
Judas Arrieta artista hondarribitarra Beijing-en bizi da eta Asia, Europa eta Euskal Herriko kultura islatzen ditu bere lanetan. Orain, Shanghaiko Euskal Etxearen eskutik bere azken lanak aurkeztuko ditu Asia Draws izeneko erakusketan. Ostiral honetan bertan inauguratuko dute, Shanghaiko Euskal Etxean. Karia hortara elkarteak ateak irekiko ditu asteburu osoan, erakusketa ikusi nahi duenari ongi etorria eginez. Asia Draws erakusketa urte bukaera arte luzatuko da.
2007/11/15
Santiagoko Euzko Etxea Txileko 2007ko Euskal Astearen egoitza izan da egunotan eta bertako euskaldunek hamaika ekitaldiz gozatzeko parada izan dute: zinema, mintzaldiak, kontzertuak, 'Akelarre' bat eta euskararen aldeko lasterketa, besteak beste. Santiagoko euskaldunek euren Korrika propioa egin dute --beranduago, bai, baina gogoz gainezka-- eta euskararen aldeko aldarria eta besta giroa hiriko kaleetan zabaldu dute. Euskal Asteari bukaera emanez, Enrike Zelaia soinujole nafarrak 800 lagun bildu zituen kontzertua eskaini zuen.
2007/11/15
Eusko Jaurlaritzak euskara zabaltzeko kanpaina berria jarri du abian eta ekimen desberdinen artean proposamen orijinal bat prestatu du: euskararen 'zaporea' dastatzera emango duen pintxo bat egitea. 'Ukan pintxoa' da eta Edorta Lomo eta Iñigo Cojo sukaldariek asmatu dute (Euskal Herriko bigarren pintxo lehiaketaren irabazleak). Jarraian euskarari 'gustua' hartu ahal izateko pintxoaren errezeta ematen dugu --txitxarroa, ahuntz gazta eta fruituak-- Diasporako euskal etxeek ere kanpainarekin bat egin ahal dezaten eta Euskal Herritik kanpo ere 'euskararen zaporea' zabaltzeko.
2007/11/15
Bilkura San Isidroko Marín Ikastetxean egin zen, Buenos Aires probintzian, aurreko topaketaren egoitza errepikatuz. Aurtengoan ere Argentina eta Uruguaiko Saralegitarrak bildu ziren bertara. Oroitzapenak, emozioak, senideekin berriro aurkitzearen poza eta familiako kide berrien ezagutzeak izan ziren eguneko protagonista. Ehun lagun baino gehiago bildu ziren eta elkarren berri eman zuten ondo atondutako mahai baten inguruan. 1998an, Buenos Aireseko Laurak Baten egin zen lehen topaketa eta, bosgarrena eginik, hitzordua urte askotan eta osasuntsu mantentzeko asmoa agertu dute antolatzaileek.
2007/11/15
Emilia Doyaga said multiple times on Sunday that we were hoping to see 50 people attend the Hall of Fame banquet in Ontario Oregon. So when 200 showed up, she and the others from the Society of Basque Studies in America (SBSA) were pleasantly surprised. The entire Basque American community honored six Basque women from Ontario, Oregon last Sunday. They are Grace Lacouague Mainvil, Timmie Yraguen Echanis, Juanita Yraguen Ybarzabal Hoff, Martina Yraguen Echanis, Josephine Echanis Keim, and Lourana Priston Echanis. Basques from several Western states and New York attended.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
