euskal diaspora eta kultura
2007/12/27
Mundu osoko 25 herrialde eta kulturatako haur eta helduek --Argentinatik hasi eta Errusiaraino, tartean Alemania, Polonia, Txekia, Kosovo, Saudi Arabia, Serbia eta Mexiko-- ikusi ahal izango dituzte euskal ikazkinaren gabonetako abenturak, beste hainbeste telebistek Baleuko ekoiztetxe bizkaitarraren marrazki bizidun filmaren emisio eta DVD eskubideak erosi eta gero. Olentzerori buruzko trilogia baten bigarren emaitza da honakoa, euskarazko eta gaztelaniazko bertsiotan ekoitzia. Euskal Herrian egundoko arrakasta lortua dute lehenengo biak eta hirugarren emaitza, 'Olentzero eta oparien ordua' izenpean, 2008rako dago aurreikusia.
2007/12/27
Euskal Herriko kale eta bazterrak jostailu berriak probatzen ari ziren umeez josita agertu dira egunotan, baina Diasporan ere antzeko zerbait gertatu da, Olentzero gero eta euskal etxe gehiagotara heltzen delako. Euskaldunen Gabonetako pertsonaia maitagarrienetakoa inoiz baino lanpetuago ibili da aurten eta opariak eraman ditu Argentina, Mexiko, Estatu Batuak, Australia eta beste hamaika bazterretaraino.
2007/12/27
Zabalik dago datorren igande gauerdira arte EuskalKultura.com-ek bere irakurleen artean antolatu duen 'Manual de genealogía e historia de la familia en Euskal Herria' liburuaren zozketan parte hartzeko epea. Hala nahi duenak, aski du email bat bidaltzea, argi adieraziz bere izena eta posta helbide arrunta, herrialdea barne. Orain artean honako herrialdeetatik ari dira parte hartzen: Argentina, Uruguai, Txile, Mexiko, AEB, Brasil, Alemania, Kolonbia, Peru, Brasil, Katalunia, Galizia, Espainia eta Frantziatik, eta Euskal Herria, jakina. Emaitzak abenduaren 31ean argitaratuko dira.
2007/12/26
Euskal literatura munduratu eta beste herrialdeetan ezagutzera emateko makina bat lan egiten ari dira idazle eta aditu asko azken urteotan. Bide horretan hiru aste barru Harkaitz Cano, Miren Agur Meabe eta Rikardo Arregi idazleak Austrian izango dira, Viena hiriburuan hain zuzen ere, euren poesiak irakurri eta 'Montañas en la niebla' poesia antologia aurkezteko. Cervantes Institutuaren egoitzan izango da irakurraldia eta eurekin batera Jon Kortazar kritikoa eta liburuaren koordinatzailea egongo da.
2007/12/26
Estatu Batuetako euskal etxeen artean dekanoa den Eusko Etxea of New York erakundea euskara irakasle bila ari da eta deialdi bat plazaratu du bere babespean eskaintzen diren euskara eskolen ardura hartuko lukeen pertsona baten bila. Euskara irakasle honek New York, New Jersey, Connecticcut edo edonola ere Eusko Etxeak Brooklynen daukan egoitzatik hurbil bizi beharko luke eta bere ardurapean egongo litzateke HABErekin elkarlanean bertatik ematen diren Boga sistemapeko eskolen ardura.
2007/12/26
Euskal Ikasketa Zentrua, Juan de Garay Fundazio Euskal-Argentinarraren interneteko gunea da eta online ikastaroak eskaintzeko sortu berria da 2007ko urrian, sortu ere Buenos Airesetik kanpo egonik Fundazioak antolatutako ikastaroetan parte hartu nahi zutenei erantzun nahirik sortua. Euskal Deituren Mintegia da, Jorge Beramendiren eskutik, on-line eskaintzen duen aurreneko ikastaroa. Hogei ikasle dauzka orain arte izena emanda Argentinatik, bakarra Kubatik, eta beste bat Estatu Batuetatik.
2007/12/25
Heldua da berriz ere Eguberria. Aukera ederra maite ditugunak bereziki gogoan hartu eta agiantza edo desiorik onenak bidaltzeko. Beste urtebete eta hemen segitzen dugu, irakurle. Urtebete emendatu diogu elkar ezagutuz daramagun denborari eta pozez ikusten dugu EuskalKultura.com-eko txokotik hazten doazela Euskal Herriari, munduko bazter guztietatik, bere seme-alabek eskaintzen ari zaizkion ekarpenak. Handituz baitoa munduko euskaldunen familia...2007/12/24
Gabonak hemen dira jadanik eta horrekin batera gertu zein urrun bizi diren senide eta lagunez gogoratzeko eta agur bereziak bidaltzeko usadioa. Gabonak zoriontzeko edota urte berri ona opatzeko milaka postal bidaltzen dira urteko azken txanpa honetan. Oraintsu arte postariak erotu beharrean ibiltzen ziren egun gutxiren buruan milioika karta zegozkien helbideetara hel zitezen. Egun, ordea, postal birtualek dexente jan diete terrenoa paperezkoei. EuskalKultura.com-ek Olentzero eta euskal Eguberria islatzen duten postal birtualen esteka selekzio bat ekarri du datozen lerrotara.
2007/12/24
2007ko jarduerak ixteko eta Euskararen Egunarekin bat eginik, Arrecifeseko euskal etxeak omenaldia eskaini zion urtetan bertako txistulari eta txistularien maisu izandako Adalberto Pedro Loyola, Potxolo-ri, plaka bat ipiniz hain zuzen, hemendik aurrera bere izena eramango duen etxeko tabernan. Ekitaldi hunkigarria izan zena amaituta, Patin eta Taekwondo Eskoletako ikasleen txanda heldu zen eta gauari agurra emateko Euskal Etxeko Ugarritzak dantza taldeko gazte eta txikien dantzak izan ziren ikusgai.
2007/12/24
Egiazko data baino pare bat aste lehenago, Buenos Aireseko Iparraldeko Euskal Etxeak urteari azken agurra emateko festa egin zuen hiriburu argentinarreko Moreno kaleko bere egoitzan. Euskal Etxeko Kultura Batzordeko partaideek prestatu zuten afaria erakundearen kintxoan --erretegian-- eta gaua musikaz, dantzaz, zozketez eta suaren indarraz jantzi zuten. Ekitaldiko erabateko protagonista Olentzeri izan zen alabaina. Bertaratu zirenei, bere istorioa eta kontuak kontatu eta sua piztu eta txotxak eta egur pusketak bota zituen bertara, guztia asmo batekin. Geroztik, joan den asteazkenean, Juan Carlos Ibarrolak emandako azken hitzaldi batekin hasi dira hemen udako oporrak.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
