euskal diaspora eta kultura
2008/03/11
Entre Ríos-eko gobernu probintzialaren gonbidapenari erantzunez, Paranako Urrundik Euskal Argentinar Elkarteak 'Emakumea eta kultura' izeneko topaketan parte hartu zuen iragan asteazkenean bertako beste zenbait elkarterekin batera, musika, dantza eta poesia emanaldiak eta janari tradizionala dastagai izan zituen ekitaldian. Larunbatean gauzatu zen Emakumearen Nazioarteko Eguna zela-eta, euskal etxeak ez zuen emakumea omentzeko aukera galdu nahi izan.
2008/03/10
Garaipen sozialista nabaria atzo Hego Euskal Herrian Espainiako Gorteetara eginiko hauteskundeetan. Igoera argia izan zuen PSOEk, Hego Euskal Herrian gainerako beste guztiak adina diputatu atereaz eta, lehenengo aldiz, Bizkaian lehenengo indarra bihurtuz. EAk bere diputatu bakarra galdu zuen eta Nafarroa Baik bereari eutsi zion. Espainiako Estatuan oro har, PSOE irabazle PPri aurrea hartuz. Bi alderdi horien artean 350 diputatuetatik 322 batzen dituzte, bipartidismoa zinez indartuz, Izquierda Unida eta Esquerra Republicana bezalako alderdien porrota ekarriz. Iparraldean, berriz, gutxiengo diren zerrenda abertzaleek aurrerakadatxo bat izan zuten Frantzia mailan eginiko herri eta kantonamendu hauteskundeetan.
2008/03/10
Cañuelaseko Euskal Etxeak Dantzari Egunaren bigarren edizioa izango denaren programa aurkeztu berri du. Jaialdia apirilaren 12 eta 13an izango da eta Argentinako euskal etxeetako dantza taldeen topaketa irekia bilakatzeko asmoz sortua da. Jaialdiaren helburua euskal etxeetako dantzariei bilgune eta topalekua eskaintzea da, adiskidetasuna eta taldeen arteko harremanetan sakontzeko. Parte hartu nahi duten taldeek datorren larunbata bitartean, martxoak 15, dute epea izena emateko.
2008/03/10
Bertsoplaza.tv, bertsoarekin zerikusia daukaten bideoak ikusi, komentatu, bozkatu edota norberak egindakoak igotzea ere ahalbidetzen duen interneteko ekimena da. 'Edozeinek, munduko edozein lekutik ikusi, komentatu eta bozkatu ditzake bideoak eta berak grabatutakoak ere igo, euskal bertsoekin edo, Diasporatik, esaterako, baita ere, beste kulturetako inprobisatzaileen bertsoekin', azaltzen du proiektuaren bultzatzaile den Ion Ansak. Otsailaren 22an sareratu zuen Bertsozale Elkarteak, bost hizkuntzetan izan ere: euskaraz, ingelesez, frantsesez, gaztelaniaz eta katalanez. Lehenengo bi hilabeteak proba gisa erabiliko dira eta orain arte 11 eta 310 ikustaldi artean izan ditu bideo bakoitzak.
2008/03/10
Liburutegi arruntetan aurki ez daitezkeen 300.000 irudi eta 1.246 liburu zahar argitaratu berri ditu Euskadiko Liburutegi Digitalak. Era honetan, 1830. urtea baino lehenagoko obra-bilduma eta XX. mendera arteko euskarazko erlijio-obren biblioteka batera sarbide erraza izan dezake edozeinek. Nabarmendu daitezkeen obren artean, Axularren "Guero" obraz gain, Betolazaren "Doctrina Christiana" dago, Hegoaldean argitaratutako euskarazko lehen katiximaren ale ezagun bakarra. Obra elebidun hau 1596an argitaratu zen Bilbon, eta garrantzitsua da XVI. mendean euskaraz idatzi ziren zortzi obretako bat delako.
2008/03/08
La Platako Euzko Etxeak kide maitatua galdu du joan den astelehenean, Bixente Ibarguren Unanue gipuzkoarraren heriotzarekin. 1926an jaio zen Ibarguran Bergaran eta 1952an heldu zen Argentinara. La Plata hartu zuen bizileku eta 50 urtetan lan eskerga egin du Euzko Etxean, elkarteko lehendakari izatera ere heldu zelarik. Bere engaiamendua eredu bihurtu da elkarteko gazte zein nagusientzat. 'Euskal Etxea eta Euskal Herria maitatzen erakutsi zigun', gogoratzen dute bere lagunek.
2008/03/08
Filme eta laburmetraia batek eman zioten amaiera joan den ostegunean New York International Independent Film & Video Festival jaialdiari; laburmetraian, Pello Varela gasteiztarra gidari, Txema Blasco eta Rafa Martin aktoreak ziren protagonista, Badaezpada, el vecino afectuoso izenpeko lanean. Obrak oso kritika ona jaso ditu jaialdian eta medio bereko profesionalekin harremantzeko eta etorkizunerako lankidetzak lortzeko aukera izan dute arduradunek. Pello Varela euskaraz grabatuko den filme luze batean ari da lanean dagoeneko. Barton Films enpresa izango du banatzaile eta 2009ko martxorako amaituko dutela iragarri dute.
2008/03/07
Nevadako Unibertsitateak nazioarteko aditu taldea eta sei euskal idazle errezibituko ditu datorren maiatzaren 15etik 17ra Renon egingo den mintegian, euskal literaturak mundu globalizatuan duen lekuari buruz hausnartzeko. Aurelia Arkotxa, Rikardo Arregi, Bernardo Atxaga, Mariasun Landa, Miren Agur Meabe eta Iban Zaldua idazleak bertan dira eta euren esperientziari buruz hitz egingo dute AEB, Eskozia, Espainia, Katalunia eta Euskal Herriko adituen aurrean. 'Euskal literaturak testuinguru globalean duen tokia aztertuko dugu, baina azterketa kanpotik barrura eginez', azaldu du mintegiaren antolatzaile den Marijose Olaziregik.
2008/03/07
Aurten lehen aldiz FEVAko hauteskundeetan lehendakaritzarako bi zerrenda aurkeztu dituzte eta horrek azken egunetan bi hautagaitzen arteko eztabaida publikoa ekarri du. Otsailaren 28an bi zerrendak ofizialki aurkeztu zituztenetik batzuk eta besteek hika-mika hasi dute elkarren proposamenen inguruan. Ideia eta proiektu desberdinei buruz eztabaidatzea --gizalegez eta errespetuz egiten den bitartean-- aberasgarria denaren ustearekin, bi aldeek esan dutena jarraitzeko datuak eta loturak bildu ditugu segidan.
2008/03/07
Jon Alañak, duela bi urte eta erdi Shanghain bizi den bilbotar gazteak, hemendik hilabete eta erdira, 'apirilaren 15erako gutxi gora behera', euskal jatetxea zabalduko du Shanghain (Txina), bertako lehenengo euskal jatetxea. Sukaldariak, emaztea eta zazpi txinatar langilerekin batera, Euskal Herriko platerak eskainiko ditu gauerako prestatutako terraza duen 30 pertsonentzako lokal batean. Tabernako barraren zazpi metroetan euskal tabernetan eskaintzen diren ohiko euskal pintxoak jateko aukera izango dute bertaratzen direnek: patata tortila, piper beteak...
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
