euskal diaspora eta kultura
2009/07/06
Mountain Home-ko Historia Museoak, Estatu Batuetako Idaho estatuan, euskaldunei buruzko erakusketa edo erakusleiho bat aurkeztu du, eta zabalik izango du uztaileko hilabete osoan, euskaldunei buruz, bertako zinegotzi Richard Urquidik prestatu eta moldatua, duela gutxi familiarekin batera arbasoen herria duen Euskal Herrira bidaiatu ondoren. Urquidi, pertsona gaztetandik aktiboa Mountain Home-ko euskal komunitatean, baita ikerlari gisa ere, izango da baita ere, datorren ostegunean, uztailak 9, Museoko lagunen aurrean hitzaldia emango duen gonbidatua, arestian aipatu gai beraren inguruan.
2009/07/06
Paranáko Urrundik Euskal Etxearekin urtetan kolaboratzaile ari den Hector Baigorria doktorearen hitzaldi batek berrabiarazi du Paranán, Argentinako Entre Rios probintzian, 'Urrundik komunitatean' ekitaldi zikloa. Power point batek lagundurik, Baigorriak kutsatuta egon daitezkeen janari eta edariekin hartu beharreko aurrezainketa neurriez aritu zen. Lehenengoz 2005ean eratu zen ziklo honen hurrengo hitzorduak Argentina A gripeari dagokionez bizitzen ari den larrialdiaren eboluzioaren arabera iragarriko dira.
2009/07/03
Astigarragako Aire Aire trikitixa taldeak Txile bisitatuko du heldu den astean. Ostiralean, uztailaren 10ean, musikajole gazteek Santiago hiriburuko Euzko Etxean joko dute, bertako Itxaropen gaztea taldeko dantzariak emanaldikide. Bertatik
Valparaíso/Viña del Mar-era pasatuko dira, azken herri honetako Cine Arte delakoan kontzertu berri bat eskaintzeko hilaren 13an. Trikitixarekin batera, panderoa, egurrezkoa goilareak eta txalaparta daramatzate eurekin. Entzulegoan dantzan hasi nahi duenak ez du aitzekirik behar izango, haste-hastetik dantza erritmo biziak agindu baitituzte astigarragatarrek.
2009/07/03
Zalantzarik ez da Shanghaiko Euskal Etxekoei ez zaiela irudimena eta ekimena falta egiten dituzten gauzetan. Amaitu berria den ekainean burutu dituzten ekintzen artean Idiazabalgo gazta dastaketa bat egon da, eta baita Txile-Katalunia eta Euskal Herriaren arteko futbol txapelketa triangeluar bat. Biak arrakastatsuak izan dira, euren helburu nagusia bete baitute: ongi pasatzea lagunartean, hurkoekiko harremanak landuz eta Txinan egonik ere bertako ohiturekin batera euren sorterrikoak ere praktikatuz.
2009/07/03
Mar del Platako Denak Bat Euskal Etxeak, Buenos Aires probintzia argentinarrean, egin berria du joan den larunbatean, ekainaren 27an, bere Ohiko Batzar Nagusia eta, besteak beste, estatutuek esandakoaren arabera Zuzendaritza Batzordea berritzeko hauteskundeak egin ditu. Ondorioz, berrautatua izan da erakundeko lehendakari Jose Marin Azarloza. Berarekin batera ari dira Zuzendaritza Batzordean: Ana Maria Irigoyen, lehendakariorde lehena; Horacio Ayesa, lehendakariorde bigarrena; Gustavo Elichiribehety, idazkaria; Adriana Hernandorena, idazkariordea; Francisco Valencia, diruzaina; eta Juan Gonzalez, diruzainordea, beste zenbaiten artean.
2009/07/02
Joan den igandean hasi ziren iristen Kaliforniako Chino herrira eta, astelehenetik aurrera, NABOk, Ipar Ameriketako Euskal Erakundeak, haur eta gaztetxoentzat antolatzen duen euskal udalekuko parte dira. Bi astez, ekainaren 29tik uztailaren 14era, euskal giroan bizi izango dira, Ameriketako eta Euskal Herriko irakasle eta begiraleekin, beste neska-mutiko euskal-amerikarren artean lagunak euskal kultura lokarri egiten. Ongi pasa, lagunak egin, euskara eta euskal kulturan urrats berriak eman eta Kaliforniako alde hau ezagutu... Hau bai pagotxa Estatu Batuetako hamaika bazter urrun eta hurbiletatik Udalekura bildutako haur euskal-amerikarrentzat!
2009/07/02
Berria atzo egun hondarrean iritsi zitzaigun Mexikotik, bertatik eta internetez Jaione Arrieta Galarraga euskal mexikar aktiboak kudeatzen duen VascosMexico posta zerrendaren bidez. Getxon jaioa, Jose Maria Basagoitiren bizitza Mexikorekin zinez lotua garatu da, gazterik iritsi baitzen bertara, XIX. mende erdialdean bere aitona Antonio Basagoitik ipinitako bideari jarraiki. Ekonomian pertsona esanguratsua izatearekin batera, Mexikoko euskal presentzia eta komunitatearen alde egindako lanagatik nabarmendu zen.
2009/07/02
Hamabost urte izango dira gaur Justo Garate, Diasporari hain lotutako idazle, mediku eta ikaslari handia hil zela. Bergaran 1900ean jaioa, 1936ko gudaren ostean erbestera jo behar izan zuen Garatek, eta Argentinako Mendoza hirian aurkitu zuen bizilekua, bertako Unibertsitateko medikuntza irakasle, dekanorde eta kontseilari izan zelarik. Argentinatik ere euskal kulturaren alde lan eskerga egiten jarraitu zuen eta 1979an euskaltzain urgazle izendatu zuten. Bere pertsona oroitu nahi izan dugu gaurko egunez.
2009/07/02
Euskal Gizataldeen arteko Munduko Mus Txapelketaren 32. edizioa Bizkaiko Balmaseda herrian jokatuko da. Hamabi bikoteren arteko lehia izango da. Iazko txapelketa Bartzelonan egin zen eta irabazleak Euskal Herriko ordezkariak izan zirenez, Iñaki Abendibar eta Antonio Vicente, bertakoei tokatzen zaie norgehiagoka nagusiaren antolaketa. Garaiz eta itxuroso ibili dira prestaketa lanetan Balmasedan eta oso garaiz adierazi dituzte egitaraua eta muslarientzat zein laguntzaile etorriko direnentzat prestatutako bestelako ekintzak. Besteak beste egitarau osoa bildu dugu hona.
2009/07/01
'Etxe hau, maitasunez eta errespetuz, euskaldun guztien aterpe izango da, inongo bereizkeriarik gabe'. Elkarte antolatzailearen ezaugarriei buruzko adierazpen honekin ekin zion María Elena Etcheverry Eusko Kultur Etxearen lehendakariak, joan den asteko asteazkenean, ekainaren 24ean egin zen euskal kultur ekitaldiari. Eusketxeren egoitza txikia geratu zen bertaratutako guztiak biltzeko, baina gonbidatuak zein antolatzaileak asmatu zuten moldatzen ikuskizuna eta oro har programa osoa ondo ikusteko, eta afaltzeko orduan zerbitzatu zen euskal menua dastatzeko. 'Jende berri asko etorri da. Batzuk lehenengoz zetozen gure egoitzara eta zeharo harritu dira bizi dugun giroa ikustean. Hori guretzat ezin da pozgarriagoa izan', aitortu dio Etcheverryk EuskalKultura.com-i.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
