euskal diaspora eta kultura
2010/01/29
Ezaguna da Fabio Echarri Argentinako euskal komunitatean gisa batera edo bestera egin dituen lanengatik, izan Chacoko 'Kotoiaren Lurra' Euskal Etxeko kide gisa edo, azken urteotan, beste elkarte euskal-argentinar batzuetatik ere garatu duen lana medio. Kazetari edo ikertzaile moduan, edo Museoen eta ondarearen eremuari buruzko idazle, fikzioa ere gustatzen zaionez, literatur sariren bat irabazki eta kontaketaren bat ere liburu gisa argitaratu izan du bestela ere euskal gaiei buruz lan frango egin duen nafar jatorriko euskal-argentinar honek. 'Vasco' Echarriren lanak irakurri nahi dituenak, aukera handiagoa izango du aurrerantzean, webgune berri honi esker.
2010/01/29
Boiseko Euskal Museo eta Kultur Etxeko zuzendari den Patty Miller euskalamerikarrak 'Idaho Humanities Council' erakundearen sari berezia jasoko du otsailaren 19an, bere ekarpen ezohikoarengatik eman baitio izen bereko erakundeak urtean behin banatzen duen ohore berezi hau, Humanitateen alde eta Idahoko euskal kultura eta historia gordetzen eta zabaltzen egindako etengabeko ahalegina aintzat hartuz. Estatuan euskal jatorriko pertsona bati lehenengoz egotzi zaion sari hau ekitaldi ireki batean emango zaio, Boiseko Euskal Etxearen egoitzan, otsailaren 19ko arratsaldeko zortzietan, agintari, herritar eta lagunez inguratuta.
2010/01/28
Montevideon puri-purian jarraitzen du Argentina, Brasil, Kolonbia, Txile eta Uruguai bertako euskara irakasleak bertara bi asterako ekarri dituen euskara barnetegiak, baina ekimen hau aste honetan amaitzeke, FIVUk, Uruguaiko Euskal Erakundeen Federazioak, aurrez aurre dauka ia bere hurrengo hitzordua, alegia: urtero 6-12 urteko neska-mutikoentzat Rio de la Plataren ertzeko Campamento Artigas delakoan antolatzen duen Udaleku. Izan ere, bere seigarren ediziora heldu da aurten hemengo Udaleku, eta ohi bezala, ziento erdi bat partaide espero ditu.
2010/01/28
Bogotako Euskal Etxetik aditzera eman dutenez, euskal erakundeko zenbait kidek modu berezian ospatu zuten urtarrilaren 6an Errege Eguna, karia horretara Ciudad Bolivar-ko auzoetara joan eta opariak banatu baitzituzten baliapide gutxiko familietako haurren artean. Txotxongilo bidez gabonetako ipuin bat antzeztu eta Errege Magoen festa zertan datzan azaldu zuten eta, bazkaldu eta gero, opariak banatu zituzten 'euskal moldean', diote. Bestalde, eta Euskal Etxe berean, Euskara klaseak joan den larunbatean hasi ziren berriz ere, Asier Bilbao Salazar irakasle eta 35 bat ikaslerekin. Ines Bermudez eta Alejandro Ricaurte gazteak izan dira Kolonbiako ordezkariak Montevideoko barnetegian.
2010/01/27
Ez daude Euskal Herritik urrun eta kasuren batean, hala nola Pauekoan, 'juxtu aldamenean'. Urtean zehar hainbat ekimen garatzen dituzte, izan ere euren egoitza daukaten hirietan 'betidanik' egon baita Euskal Herriaren eta euskal kulturaren zimikoa barnean sentitu izan duen euskal komunitate zabala. Frantziako euskal etxeei buruz ari gara, horietarik hiru, Paris, Bordele eta Pauekoa, Eusko Jaurlaritzaren erregistroan daudela. Pauekoa, joan den abenduaren 9tik. Hirurak jaso zuten joan den azaroan Jaurlaritzako ordezkari batzuen bisita, Julian Celaya Kanpoko Euskal Herritarrentzako eta Gizataldeentzako zuzendaria buru, eta Benan Oregi eta Andoni Martin teknikariak laguntzaile.
2010/01/27
Damian Cebey epaileak segitzen du izaten Buenos Aires probintziako San Nicolas de los Arroyos herriko Euskal Etxeko lehendakari, euskal elkarte horrek abenduan eginiko Urteko Batzar Nagusia eta gero. 2005ean hautatu zuten lehenengo aldiz ordura arte lehendakariorde zen Cebey eta geroztik urtero berritu diote konfidantza San Nicolaseko euskal etxeko bazkideek. Berarekin batera arituko dira Zuzendaritza Batzordean, besteak beste: Manuel Eugenio Brogliatti, lehendakariorde; Marcelo Gabriel Barrangu, idazkari; Maria de los Angeles Domenech, idazkariorde; Maria Francisca Aramburu de de Cara, agirietako idazkari; Maria Teresa Aramburu, diruzain; eta Ana Maria Erausquin, diruzainorde.
2010/01/26
"Lopez-en Jaurlaritzako Kanpo Harremanetarako idazkaritzak argi ikusten du. Euskadi autonomia erkidego bat da, ez estatu bat. Beraz bere lanak kanpoan bere interes ekonomikoak defenditzea baino ez du izan behar. Ikusmolde honek gidatzen du buru duen Guillermo Echeniqueren egitekoa". Hitz hauekin hasten du Noticias taldeko Marta Martin kazetariak Eusko Jaurlaritzako Kanpo Harremanetarako idazkari nagusiarekin joan den igandean igandean argitaratu zuen elkarrizketa.
2010/01/26
Datorren astelehenean, otsailaren 1ean, hasiko da Buenos Airesko Sarandi kaleko Euskal Echea Ikastetxean Argentinako Euskal Unibertsitateko 2010eko edizioa. Joan den urtean eginiko lehenengo esperientziaren ondotik, antolatzaileak bigarren edizioari eutsi diote, orain artekoa sendotu eta ildo honi jarraituz bide luzea gelditzen dela pentsatzen baitute, Enrique Aramburu koordinatzaileak EuskalKultura.com-i adierazi dionez. Izena emateko epea bulatutakoan ziento erdi bat ikasle bilduko dela pentsatzen da, Argentinako zenbait lekutatik etorriak, Buenos Aires hiriburutik eta ingurutik gehienbat, baina nazioko beste probintzia batzuetatik ere, orain arteko datuak argitzen dutenez. Ikasleek "Euskaldunen ibilbidea eta kultura" ikastaroa segitu ahal izango dute bi astez, edo astebeteko beste ikastaro batzuk, hala nola euskal etnologia, geografia, musika, dantzaz eta abar. Irakasleak, gai bakoitzean adituak dira, baitetsi du Aramburuk.
2010/01/26
Urtero bezala, Txileko Santiagoko Euzko Etxeak urte osoko balantzea eginez bukatu du abenduan urtea, eta udako opor aurreko azken ekitaldiak eginez, tartean elkarteko Bazkideen Biltzar Nagusia. Vicuña Mackennako euskal egoitzatik, bertako 'Berriketari' buletinak urteko bere azkeneko kronika bidaltzen zuen, 2009ko abenduko alearen barnean, bi hilabeteko bakantzak hartu eta martxoan, indarberriturik, berriz agertzeko. Hona Maria Angelica Carrasco eta Ignacio Bastarrica senar-emazteek argitara ematen duten buletin hortarik atera dugun testua.
2010/01/25
Euskadik hartu du bere gain AEMIk --migrazioa ikergai edo langai daukaten elkarte eta erakunde europarren batasunak-- datorren irailean egingo duen Urteroko Bilkura antolatzeko ardura. Aipatu elkarte edo erakunde hauek gehienetan nazio edo gizatalde bakoitzeko museoak edo ikerketa etxeak badira ere, euskal kasuan Eusko Jaurlaritzako 'Kanpoan diren Euskal Herritarrentzako eta Gizataldeentzako Zuzendaritza' eta Kanpo Harremanetarako Idazkaritza Nagusia dira euskal ordezkariak. "Migrazio Azterketak eta Informazio eta Komunikazio Teknologiak (IKT)" da Bilkurak mintzagai hautatu duena irailaren 29tik urriaren 2-3ra luzatuko diren saioetan. Halaxe azaltzen du ingelesez, euskaraz eta gaztelaniaz dagoeneko banatu den Bilkurako lehenengo oharrak.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
