euskal diaspora eta kultura
2010/02/12
Otsailaren 6tik 14ra gauzatzen ari da Mendozako Nafar Etxean Nafar Dantzen 9. Ikastaroa. Urtero antolatzen den bilkura honetan, Txile eta Argentinako Nafar Etxeetako dantzariek hartzen dute parte, pauso berriak eta koreografiak ikasi eta hobetzeko. Aurten, etxe bakoitzeko 6 ordezkari bidaiatu dira Andeen magaleko hirira. Irakasleei dagokienez, Nafarroatik propio etorri dira ikastaroa ematera. Laurak Tuterako udal dantza taldean aritzen dira. Topaketa dantza erakustaldi batekin bukatuko da bihar larunbata. Gau hortako ikuskizunean dantzari guztiak pasatuko dira tauletatik. Ondoren, bisitariek eta Nafar Etxe anfitrioiko kideek afari bat partekatuko dute.
2010/02/11
Urtarrilaren 24an ospatu zen Necocheako Kolektibitateen Azokako azken eguna eta amaierarekin batera, jaiaren erregina hautatu zen ohi bezala. Tradizio handiko azokaren 28. edizio honetan, euskal etxeko ordezkaria zen Ayelen Hernandezek izan zuen erregina bilakatzeko ohorea. Printzesak, berriz, Italiako Elkartekoa eta arabiarren ordezkaria izan ziren. Herrialde ezberdinetako hamaika bat taldek hartu zuten parte aurtengo azokan eta beste ekintza batzuen artean bildutako publikoak --bertakoek eta baita turistek ere-- janari eta musika tipikoaz gozatzeko aukera izan zuen.
2010/02/11
Asel Luzarraga idazle euskalduna, abenduaren 31etik Temucoko (Txile) espetxean behin-behineko atxiloketaldian zegoena, atxiloketaldi hori etxean segi dezala onartu zuen atzo Temucoko Entzutegiak, idazle bermeotarra epailearen aurretik pasa ostean. Eraikin ofizial baten aurka eztanda egin ez zuen lehergailu bat jartzearekin zerikusia izateaz dago akusatua Luzarraga, maputxeen eskubideen aldeko burrukaren testuinguruan. Poliziaren ikerketa buru arte, hiru hilabeteko atxiloketaldia erabaki zuen urtarrilean epaileak, Temucoko espetxean, atzokoan atxiloketaldia etxean egin dezakeela deliberatu arte. Idazlearen egoera berriaren albistea berehala zabaldu zuten Luzarragaren alde ari den Asel Askatu plataformako lagunek.
2010/02/10
Joan den larunbatak aurpegi berezia azaldu zien Ellis Island-eko euskal erakusketaren inaugurazio ekitaldietara hurbildu zirenei. Gauzak ongi atera ziren eta, besteak beste, eguraldia ere portatu zen, elurtea, hotza eta ekaitza iragarrita baitzeuden, eta hala izan zuten Ellis Island eta Manhattan aldameneko herri eta barrutietan, euskal erakusketa zabaldu behar zen eremua errespetatuz, ordea. Beste leku batzuetan bi hildako utzi zituen ekaitzak, geruza txuri mehe bat baino ez zuen utzi bertan. Ferry-rako ilada osatzen zihoazen jendeen artean nabaria zen airean arnasten zen emozio puntua. Euren artean, dantzariz jantzitakoak zeuden, horretarako, dantza egiteko, propio AEBetako beste puntan dagoen Boisetik etorriak. Idaho, Kalifornia, Nevada, Wyoming... eta Quebec-ekorik ere bazen. Bidaia eta erakusketa Estatu Batuetako egungo euskal komunitatearen oinarria ezarri zuten euskal emigrante guztiei, eta egungo euskal komunitateari ere eginiko omenaldia bada.
2010/02/10
Txilen atxilotutako Asel Luzarraga euskal idazlea espetxetik Temucoko Entzutegira eramango dute berriro ere gaur asteazkenez. Euskal Herrian zein Argentinan eta Txilen ongi ezagutzen duten Diasporako lagunek, eta lagunek oro, garbi ikusten dute molestatu eta traba egiten zielako atxilotu dutela eta horregatik asmatu dituztela batere sinesgarriak ez diren Karguak. Luzarraga aska dezaten indarrean dagoen kanpainako parte, Laura Mintegi idazleak honako iritzi artikulua idatzi eta zabaldu du, 'Asel Luzarraga edo hitzaren arriskua' titulupean, Asel Aske-Asel Libre ekimeneko parte.2010/02/09
New York, 1913tik bere baitan euskal etxe bat daukan hiria --Estatu Batuetako euskal etxerik zaharrena da New Yorkeko Eusko Etxea-- euskal ekitaldi ezohiko baten lekuko izan da joan den asteburuan, berau gauzatu eta ospatzeko AEBetako Eki zein Mendebaldeko eta Europako euskaldunak ere bertara bildurik. 1892tik 1954ra bitartean Europatik etorritako 12 milioi immigranteren sarreragune eta galbahe izan zen Ellis Island, gaur egun turisten bisitaleku bihurtua, euskaldunei buruzko erakusketa adierazgarri eta esanguratsu baten egoitza bilakatu da. Larunbatean inauguratua, hiru hilabetez egongo da bertan, eta 300 mila bisitari espero zaizkio. Ellis Island pasabide gisa indarrean egon zen bitartean, euskaldunak jantzitakoa ondasun bakartzat heltzen ziren etorkizun bila AEBetara. Iragan asteburuan, euren ondorengo euskal-amerikarren omena jaso dute, bat eginik Euskal Herriko euskaldunekin. Itsasoz bi aldeetako euskaldunek bat egin dute euren historia eta nortasun propioa aldarrikatu eta --italiarrek, irlandarrek, poloniarrek edo armeriarrek bezala-- gainerako amerikarrekin partekatu nahi izaterakoan.
2010/02/09
Joan den ekainaren 21ean jaio zen, Buenos Aires probintziako San Miguel hirian, Askatasunaren Bidea, "euskal kultura zabaltzea eta bide aske batetik ibiltzea helburua duen elkarte euskal argentinarra". Instituzioaren ibilbidea oraindik laburra den arren, lanean daraman urte erdi honetan jende anitz bildu ditu egindako ekitaldietan. Orain, urte berriari begira, beste proposamen batez plazaratu dira elkartearen sortzaileak. Instituzioaren aktibitateak eta baita Euskal Herriko hainbat kultur gai ere blog bat medio zabalduko ditu erakunde gazteak. Blog-a Santa Ageda Bezperan jarri da sarean eta dagoeneko bisitari asko eta laguntzaile euskaldunak ditu.
2010/02/08
2008tik 2011ra finkatuta dagoen ikasaldiaren erdian daude Hego Ameriketako euskara ikasle/irakasleak eta programaren arduradunen arabera, "oso momentu garrantzitsuan". "Giroa, klaseetan zein klaseetatik kanpo, ezin hobea da eta nabaria da taldea sendotzen ari dela". 2010eko ikastaro trinko hau –'Udako barnetegia', Hegoamerikan esaten zaion bezala– iaz Montevideon sasoi berean gauzatu zenaren esperientzia ona errepikatzeko asmoz egin da. Hortaz, anfitrioiak harro daude klaseak eta ikasleriaren egonaldia denen gustukoa eta probetxukoa izan delako.
2010/02/08
Buenos Airesko Eusko Kultur Etxeak (Eusketxe) eta Euskaltzaleak Euskaltegiak euskal dantza talde berria sortu zuten 2008an. Aitor Alava irakasle, taldea sendotuz joan da eta gaur egun Buenos Airesko eta baita Buenos Airestik kanpoko ekintza garrantzitsuetan hartzen du parte. 'Ekin' izena Andres de Irujoren eta Ekin Argitaletxearen omenez daramatzan talde honek datorren otsailaren 12an ekingo dio aurtengo ibilbideari. Entseguak –otsailean eta martxoan– ostiralero izango dira, arratsaldeko 7:30etatik 9:30etara. Apirilean, berriz, larunbatetan. Klaseetan parte hartzeko, ez da aldez aurretik ezer jakin beharrik. Inguruan bizi bazara, 'anima zaitez' diote Ekin-go lagunek.
2010/02/05
“Begibistan ezkutatuta: euskaldunak” , bihar New Yorkeko Ellis Island-en inauguratuko den erakusketak euskaldunek munduan zehar izan duten eragina nahi du erakutsi. Ekimenak, Euskal Herritik Estatu Batuetara alde egin zuten euskal herritarren bizipenak helarazi nahi dizkio bisitariari. New York-eko Ellis Island museoan egongo da zabalik bihartik, otsailaren 6tik, apiriliaren 6ra arte. Hizkuntza, ohiturak eta euskaldunen baloreak aurkeztea eta Estatu Batuetara pasatzeko izan zituzten arrazoiak azaltzea da erakusketaren helburua. Euskal herritarrek munduan zehar izan duten eragina azaldu nahi die hurbilduko zaizkion bisitariei.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
