euskal diaspora eta kultura
2010/03/03
160 bat lagunek hartu zuten parte otsailaren 27an Euskaldunak Denak Bat Euskal Etxean, dantzariei, antzinako eta gaurkoen omenez, egindako jaian. Izan ere, Itxarkundia-k, etxeko lehenengo dantza taldeak, 65 urte bete zituen iaz eta Ugarritzak-ek, aurrekoari segitu zion taldeak, hogei. Hamaika dantzari pasatu dira bi taldeetatik. Batzuk ez daude jadanik gurekin baina hormetan jarritako argazkietatik izan ziren festaren lekuko. Beste batzuk, kasu batzuetan kanpotik etorriak, bertan ziren eta nahiz eta bat baino gehiago 'sasoian' ez egon animatu ziren pistara atera eta dantzatzera. Alaitasuna gailendu zen gau osoan, baina oroitzapenerako momenturik ere egon zen. Hunkigarria izan zen, esaterako, jendearen bihotzetan bizi diren Celestino Etxaniz, Lucio Etxaniz Iturria, Tiburcio Bilbao eta Potxolo Loyolaren izen historikoak aipatu ziren unea.
2010/03/02
Atzo zen azken epea FEVArako hauteskundeetarako zerrendak aurkezteko. Jakina zenez eta buletin honek aurreratu bezala, zerrenda ofizialistarekin batera --jarraikorra Federazioaren orain arteko kudeatzaileekin-- bigarren zerrenda bat muntatua zen, 'Renovación Vasca' izenpean, duela bi urteko bozketan zerrenda alternatiboko lehendakigai aurkeztutako Alejo Martin buru. Lanean zebiltzan, beraz, bi zerrendak, jarraikorra eta berritzailea, atzo bigarren honek lehiatik erretiratzea erabaki zuen arte. Hori iragartzen duen agirian, ordea, presioa, txantajea, mehatxuak eta Inkisizioa bezalako hitzak aipatzen ditu erretiratutako hautagaitzak (edo hobe esan, ez aurkeztutakoak). Agiri hori ekarri dugu hona.2010/03/02
Atzo hautagaitzak aurkezteko azken eguna zelarik, bi kontaktu genituen egiteko, bana zerrenda bakoitzeko, zerrenda bakoitzak biltzen zituen hautagai guztien izenak jakiteko. Zerrenda alternatiboa erretiratu delarik, hautagaitza bakarrari galdetu dizkiogu bere zerrendakideen izenak eta zein karguetara aurkezten diren. Aukera baliatu dugu Ricardo Basterrari lehiakidea erretiratzeari buruz galdetzeko, horri buruzko komentariorik egiteko ba al duen galdegiteko. Artikulu honetan, beraz, iruzkin horiek eta lehian geratu den zerrenda bakarra osatzen duten hautagaien izen eta postuak.2010/03/02
Sustu soila baina gehiago izan zitekeen, baina aurten ez zen tokatzen. Andeen magalean, Txileko Coquimbo erregioa mugakide, Argentinako San Juan hiriak bere Eguzkiaren Festa Nazionala ospatzen ari zen joan den larunbatean, lurra goizaldeko 3:34etan dardarka hasi zenean. Lurrikaretara ohituta, oraingoan epizentroak ez zirudien bertan: Txilen Richter eskalan 8:8ra igo bazen ere, San Juanen 5 'besterik ez', Mercalliren eskala aldatuan. "Lurra lekuz aldatuko balitz bezala izan zen... oholtzako argiak kulunka hasi ziren... minutu batzuk ikuskizuna geldituta egon zen... gobernadorea mintzatu zen, segurtasun neurriak hartuta zeudela esanez... eta minutu batzuren ostean, show-ak segitu zuen", dio EuskalKultura.com-i Eusko Etxeko kide den Carina Oyolak. Hori, larunbat goizaldean. Ordu batzuk lehenago, ostiral iluntzean, San Juango euskaldunek aurrera pauso polita eman zuten Eguzkiaren Festa Nazionalean partaide jalgiz, euskal-argentinar bategitea ohoratuz Bigarren Mendeurrenaren urtean.
2010/03/01
Aitzeki edo arrazoi estra bat izan daiteke laguntzak areagotzeko, baina Txile Richter eskalako 8.8 neurriz erasotu duen lurrikarak Constitucion izeneko kostaldeko herri txikia jipoitu du gehien, fundazio izenez Nueva Bilbao de Gardoqui izan zuen herria, Santiago Oñederra Alvizu kapitainak 1794an fundatua, orain olatu erraldoi batzuek jota 350 hildako eragin eta herrigunea txikituta eta deseginda geratu den herria. Ahizpa nagusia duen Euskadiko Bilborekin armarri beretsua ere partekatzen duen herri honek 1828ra arte eutsi zion bere euskal izenari, urte horretan Valparaison Txileko Konstituzioa onartu zenez, euskal jatorriko Jose Francisco Gana kongresalak izen berria proposatu zuen arte. Behin-behineko zenbakien arabera, lurrikara eta honek eragindako olatu erraldoiak bereziki astindu dute Constitucion, Bachellet presidenteak goizaldean aipatu dituen 711 hildakoen artean ia erdia bertan izan direlarik. Euskal Etxe argentinar batzuk, hala nola Villa Mercedesko Euskal Etxeak neurriak hartzen eta proposamenak egiten hasi dira kaltetuak laguntzeko. Baita Eusko Jaurlaritzatik ere.
2010/03/01
Martxoaren 29tik hasita, Bernardo Atxagak euskal kultura ikastaro bi emango ditu Estatu Batuetako Stanford Unibertsitate ospetsuan, "Visiting Professor of Basque Culture" gisa, Eusko Ikaskuntzak unibertsitate kaliforniar horrekin karia horretara, euskal kultura landu eta hedatzeko sinatutako hitzarmeneko lehenengo irakaslea izango delarik. Hauek izango dira euskal idazleak emango dituen ikastaroen izenburuak: 'The Hedgedog's Awakening: Euskal Kulturaren itzulera' eta 'Kultura eta Politika aldaketa Euskal Herrian'.
2010/03/01
Ekitaldi apal baina esanguratsun batekin [honelakoek behar dituzten nagusiena zeukan: Aleja beraren presentzia eta lagun eta familiakoen maitasuna eta atxikimendua] ospatu dute amaitu berria den otsail honetan Uruguaiko Isla Mala-n Argiñarena-Biurrundarrek, euren ondorengoek, auzokoek, lagunek eta Europatik elkarrekin etorri ziren familietako kideek 'Amatxi' Alejaren ehungarren urtebetetzea. Bere deitura bereko herrian jaioa, Ignacio Arguiñarena Ochotorena errazkindarraren alarguna da Aleja Biurrun eta harekin eta elkarrekin zeuzkaten bost seme-alabekin abiatu zen 1949an Uruguaira, bizimodu berri bat hastera. Izan ere, euren bizitza eleberri gisa idatzi eta argitaratua du Alberto Irigoyen Arteche idazle euskal-uruguaitarrak 'El requeté que gritó Gora Euskadi!' liburuan. Familiakoez eta lagunez gain, euskal dantzariak ere izan zituen urtebetetzeak partaide --Montevideotik etorritako Eusko Indarra taldekoak--, baita herriko abesbatza eta hamaika euskal apaindura ere, tartean, Uruguaiko bandera handi batekin batera, ikurrinak eta lauburu handi eta txikiak. Guztiak Amatxi Alejaren gorazarre.
2010/02/26
Hamar urte bete zituen iaz Eusko Aterpea Euskal Etxeak eta hamarkada osoan etengabeko lanean egon dira murgilduta erakundeko lagun eta bazkideak. Euskal jarduera guztietan ikusi ahal izan dira: Euskal Echea Institutuak antolatutako umeen topaketetan, Euskal Astean, Argentinan Euskaraz programan, eta beste euskal etxe batzuen jai eta elkarretaratzeetan. Horretaz gain, poliki-poliki amaitzen ari diren euren egoitzan ere aktibitate asko antolatu dituzte, besteak beste, 'Hitz Nagusiak' zikloa, zine emanaldiak, hitzaldiak eta kontzertuak. Orain, urte berriari begira, zenbait proposamen helarazi dizkete herriko euskaldunei eta euskaldunen lagunei.
2010/02/26
Argentinako Entre Ríos probintziako Paraná hiriburutik astero aireratzen den 'Presencia Vasca' irratsaioak gogora ekarri du joan den asteburuko saioan Pello Mari Irujo, asteartean, otsailaren 23an, ehun urte bete baitira Lizarran jaio zela. Urtebetetze hori dela-eta, irratsaioko historia gaiei buruzko iruzkingile Mikel Ezkerrok lagun izan zuen Pello Mariren oroitzapen berezia eta haren bizitzaren ibilbide kontaketa hunkigarria egin zuen. Irujoren aita, Daniel Irujo, Sabino Aranaren abokatu izan zen; bere anaia Manuel, foru diputatu, parlamentari eta Justizia ministro Madrilen; Andres, zinez aktiboa euskaltzale gisa, Buenos Airesko Ekin Euskal Argitaletxeko sortzaile. Hona Ezkerrok esandakoaren laburpena, Paranátik 'Presencia Vasca'k igorria.
2010/02/26
Diasporan otsail honetan urteak bete dituzten bi emakumeri buruzko berriak heldu zaizkigu, urte kopuru aski biribilez, hala baitira zalantzarik gabe 90 urteak eta 100 urteak. Lerro hauen bitartez geure omenalditxoa eskaini nahi diegu. Gaur, euretako 'gazteaz' arituko gara, Maria Alicia Echaniz, Chacoko probintzia argentinarrean jaioa, baina gazterik Arrecifesi lotua eta on Lucio Echaniz Iturria nafar ospetsuaren alaba, bi urte besterik ez zituela aitak Arrecifesko 'Euskaldunak Denak Bat'eko kide egina. Aleja Biurrunek, berriz, 100 urte bete ditu. Abizenean daraman Biurrun herri nafarrean sortua, Aleja, Inazio Argiñarena Otxotorena bertsolariaren alarguna da eta Alberto Irigoyen idazke euskal uruguaitarrak idatzi zuen 'El requeté que gritó Gora Euskadi' eleberriko protagonista. Zorion bero-beroak biei. Lehenengo artikulu hau Maria Alicia Echanizi eskaini diogu.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
