euskal diaspora eta kultura
2010/06/07
Luis Archibaldo Uriarte elkarteko lehendakaria buru zuela errezibitu zuen Viña-Valparaisoko Eusko Etxeak Kanpoko Euskal Herritar eta Gizataldeentzako zuzendari Julian Celaya, Jaurlaritzako kargudunak joan den urritik hona kostaldeko hiri eta eskualde txiletar honetara bigarrena duen bisitaldian. Uriartek azpimarratu zuen Bosgarren Erregioko euskaldunen artean gero eta indar handiagoa hartzen ari dela berriz ere egoitza propioa izateko xedea, begibistakoa baitute "ospakizun tradizionalak eta kultur ekimenak garatzeko gune fisiko bat"en beharra, "behar horrek oinarri sendotzat baitu Eusko Etxeak etxe handia izan zueneko garaiko oroitzapena, gaur inoiz baino larriagoa dena joan den otsailaren 27ko lurrikarak Eusko Etxearen bulego instituzionala zinez kaltetu ostean".
2010/06/07
Buenos Aires probintziako Cañuelasko 'Denak Bat' Euskal Etxeak hartu du bere gain aurtengo Argentinako Mus Txapelketa Nazionala antolatzeko lana. Hitzordua ekainaren 19, 20 eta 21ean da eta lehiaketatik Mundialerako ordezkari argentinarrak aukeratuko dira. Txapelketa Nazionalarekin bat, mus eta canasta lehiaketa paraleloak ere antolatu dituzte; parte hartu nahi dutenentzako baucherra 550 pesokoa izango da eta izena emateko epea bihar asteartea, ekainaren 8an, bukatuko da. Gainerako herrialdeei dagokienez, ari dira pixkanaka euren txapelketak egiten. Aurten Mundiala antolatuko duen herrialdearen kasua aipatzearren, Estatu Batuek (AEB) bere Txapelketa datorren larunbatean egingo dute, Nevadako Winnemucca herrian, bertako euskal festekin batera.
2010/06/04
Eusko Jaurlaritzako Kanpoko Euskal Herritar eta Gizataldeentzako Zuzendaritzak gaur plazaratu du mundu osoko euskal etxeetatik etorririk 2010eko Gaztemundu egitasmoan parte hartuko duten 18-30 urte arteko gazteen zerrenda. Uztailaren 1etik 15era bitartean gauzatuko den ekimen honetara 30 gazte etorriko dira, honela banatuta: Txiletik, 2; Argentinatik, 24; Estatu Batuetatik, 2; eta Kolonbiatik, 2. Hamar ordezko ere hautatu dira, aurrekoetako inork huts egingo balu-edo. Zorionak guztiei.
2010/06/04
Azken egunotan izandako gertaeren karietara, Mikel Urdangarin kantari zornotzarrak Betleem herri palestinarrean datorren astean eman behar zuen kontzertua bertan behera gelditu da, hasieran iragarrita zegoen uztailaren 10eko datan bederen, eta gauzak zehazteke baina oraingoz uztailaren 23ra pasatu da, orduan posible izango delakoan, kantariaren ekipoko iturriek adierazi dutenez. Horren aurretik, Urdangarinek kontzertua behar du eman datorren igande honetan, uztailaren 8an, Moskuko Malin Zal Kontserbatorioan. Betleemgo emanaldiari dagokionez, agertokian Maria del Mar Bonet (katalanez), Cristina Pato (galegoz) eta Ismael Serrano (gaztelaniaz) lagun dituela arituko da, kontzertua Gazako zerrendarako telebistaturik.
2010/06/04
Atal berriak datoz Euskal Herriko gaurko prentsan Bizkaiko Foru Aldundia eta Eusko Jaurlaritzaren artean sortutako tirabiran Bizkaiko diputatu nagusiak Boisera Jaialdi denboran egin behar duen bidaia dela-eta. Dirudienez, gaiak sozialisten arten sortu duen haserrearen gainetik, Lopez lehendakariak hiru diputatu nagusiak gonbidatuko omen ditu bidaia berarekin egitera. Legebiltzarrean gaur Andoni Ortuzarrekin izango duen galdera-erantzun saioan egingo omen du, Ortuzarrek Kanpo Harremanen arloari loturik Lopezi egin dizkion galderei erantzuteko txandak.
2010/06/04
Elvira Kortajarena Argentina, Brasil, Paraguai eta Uruguairako Euskadiko Ordezkariak Euskadiren promozio turistikorako hilabete osoko egitasmoa aurkeztu zuen atzo Buenos Airesko Paseo La Plaza Kulturgunean. Arlo askotako gonbidatuak hurbildu ziren ekitaldira, horien artean euskal enpresariak, tokiko agintariak, hedabideak, beste kolektibitate batzuetako ordezkariak eta euskal gizataldeetako kideak, hala nola Juan de Garay Fundazioko lehendakaria den Jorge Zorreguieta, Buenos Airesko Gure Echea-ko lehendakaria, eta Ekin eta Eusketxeko lehendekari María Elena Etcheverry. Ekimenaren garrantzia azpimarratu eta babestu zuen Rafael Estrella, Espainiako enbaxadaria ere bertan izan zen. Datozen hilabeteetan eta leku berean, Katalunia eta Galiziako gizataldeek antzeko ekimenak egingo dituzte.
2010/06/04
Euskaldunak eta aldi berean bertakoak dira Tres Arroyos herri argentinarreko euskal gizataldekoak. Joan den azaroan, Natalia Cubiatebehere-ren aholku profesionala lagun, herriko Hiru Erreka Euskal Etxearen egoitzan euskal komunitateko zenbait pertsona eta eragile bildu ziren --EuskalKultura.com ere partaide eta lekuko-- euskal ekarpenetik inguruko landa-turismoa sustatzeko asmotan. Euskaldunen presentzia ugaria duen eskualde honetako historia, berezitasun eta baliabideak oro azaleratzea eta bertakoen zein bisitan etor daitezkeenen eskura ipintzea zen erronka, euskal erkidegotik ekarria egitea inguruko landa-turismoari. Hainbat bilera eta hilabeteak eta gero 'Pampa Euskalduna' proposamena jarri da abian, lehenengo emaitza ekainaren 25ean, igandea, bertako bizitzan eragin handia izan zuen Juan Bautista Istilart-en ibilbidea eta herriko zenbait tokitan lapurtar gizon handi honek utzi zuen arrastoa segituz antolatutako bisita gidatua eta egunpasa iragarri delarik.
2010/06/03
Bi euskal ordezkaritza paralelo, Eusko Jaurlaritzarena bata, Lopez lehendakaria eta Blanca Urgell Kultura sailburua buru, eta Bizkaiko Foru Aldundiarena bestea, Jose Luis Bilbao diputatu nagusia eta Josune Ariztondo Kultura diputatua buru, batuko dira uda honetan Idahoko Boisen, Estatu Batuetan, hiriburu horretan Jaialdi izeneko euskal festa erraldoia --munduan Euskal Herritik kanpo egiten den handiena-- ospatuko den egunetan, uztaileko hondarreko astean. Zenbait iturriren arabera, lehia eta pultso modura uler daiteke bi ordezkaritzen presentzia leku eta egun beretsuetan Boisen. Orain artean beti jeltzaleen esku egon den euskal ordezkaritza ez omen du soilik Patxi Lopezen gobernuaren eskuetan utzi nahi izan EAJ-PNVk aurtengo Jaialdin. Gaiak prentsarainoko jauzia egin du Bilboko Correo egunkariak gaurkoan argitara eman duen artikulu bat medio.
2010/06/03
Euskal etxeen munduan oso galdera ohikoa da hau: “Zer zara zu, argentinarra ala euskalduna?” Erantzuna ez da erraza euskara ikasle eta irakasle garenean; dantzari, txistulari eta txalapartari garenean; pilotari garenean; Euskal etxe bateko batzordekide garenean eta geure 'euskal lanak' aurrera ateratzeko denbora nondik ateratzen dugun ere ez dakigunean. Baina agian galdera hasia da erantzunik lortzen Argentinako Bigarren Mendeurrenaren inguruan: Argentinan jaio garen euskaldunak gara, Argentinaren historia eta eguneroko bizitza eraikitzen dihardugun euskaldunen ondorengoak. Bi aberri ditugu baina engaiamendu bera. Maiatzean zehar Argentinako hainbat euskal etxetan Maiatzeko Iraultzaren Bigarren urtemuga ospatu da, Euskal Herritik etorritako immigrante haiek gabe historia argentinarreko berrehun urte hauek oso ezberdinak izango zirelakoan. Euskal-argentinar bihotz baten hitzak dira honakoak. Gaur, Corpus Christi, Victoria, Tandil eta Chivilcoy.
2010/06/03
Joan den larunbatean, maiatzaren 29an, omenaldia egin zioten bere lagun eta adiskideek Mexiko DFko Euskal Etxean iragan martxoaren 3an hiriburu mexikarrean hil zen Juantxo Viguria Iribarren musikari elizondarrari. Lekarozen aita Donostiaren ikasle izan zen pianojole eta musikaria zendu zen egunean bertan bere emazte Eva Aguilar-ek eta zenbait lagunek omen ekitaldia antolatzea pentsatu zuten, merezi zuen gisako azken-agurra egitearren. Ehundik gora izan dira hitzordura hurbildutakoak, musika, adiskidantza eta omenduarekiko konplizitatea ezaugarri izan dituen maitasun agerraldian. Maite izango zuen Juantxok, doaike.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
