euskal diaspora eta kultura
2010/07/01
Pasa den ekainaren 18an, La Platako Unibertsitate Nazionalean, omenaldia egin zitzaion Pello Mari Otaño Barriola poeta, bertsolari eta Argentinako lehen euskara irakasle legez hartua denari, berenheriotzaren mendeurrenean. Otaño Zizurkilen (Gipuzkoa) jaio zen 1857an eta Rosarion (Argentina) hil zen 1910ean. Aztarna utzi zuen Otañok bere poesia eta bere jarrera abertzale, euskaltzale eta euskaldunen eskubideen eta identitatearen segidaren aldekoarekin.
2010/07/01
Mikel Urmeneta marrazkilari eta sormen-lan zuzendariak eta Javier Agirresarobe fotografia zuzendariak Euskaldun Unibertsalaren 2009ko saria jasoko dute gaur osteguna, uztailaren 1ean, arratsaldez, Patxi Lopez lehendakariaren eta Txomin García Euskadiko Kutxaren presidentearen eskuetatik. Argazki-zuzendaria ez da sari banaketan izango, Euskaditik kanpo baitago lan kontuak direla-eta eta bere emazteak jasoko du saria bere izenean.
2010/06/30
New Yorken denetatik aurki daiteke eta urriaren 9tik aurrera bertako hotel batean bizkaitar sukaldaritza dastatzeko aukera ere izango du bisitariak. Izan ere, euskal eta bizkaitar sukaldaritza eskainiko duen Bar Basque delakoa zabalduko da Manhattanen. Pasa den asteazkenean akordioa sinatu dute Bizkaiko Foru Aldundiak eta New Yorkeko Seigarren Hiribideko 851.ean ireki berria den luxuzko Eventi Kimpton hotelak. Hitzarmen hori medio, hotelak aukeratutako bertako sukaldariak Bizkaira bidaiatuko dira eta aldi berean Bizkaiko bi sukaldari bi hilean behin New Yorken izango dira, Etxeorratzen Hirian bizkaitar eta euskal gastronomiaren astea antolatu eta hoteleko ohiko kartan bi plater txertatzeko.
2010/06/30
Xabier Iñaki de Arza Blanco musikari argentinarra familia euskaldun batean jaio zen. Gaztetan hasi zen musika ikasten Buenos Airesko Cervantes kUdal Kontserbatorioan, berehala biolontxelo-jole bihurtzeko. Musikaren beste arlo batzuetan ere murgildu zen Arza, abesbatzen zuzendaritzan esaterako. 2007an 'Asociación Cultural Denak Bat' elkartea sortu zuen Buenos Airesen eta ordutik hona musika tailerrak eta kontzertuak eskaini dizkio euskal kolektibitateari. Zuzentzen dituen abesbatzen artean, “Coral Todos los Santos” da gaur egun bere proiektu nagusia eta eurekin aurkeztuko da bihar, uztailaren 1ean, Alemaniako Hanburgo hirian, 'Hamburger Orathorienchor'ek luzatutako gonbite bati esker. Beethoven-en “Meza Do Maiorrean, op. 86” obra zuzenduko du hiriko St. Michaelis Basilikan.
2010/06/30
Boiseko 'Amuma Says No' euskal bandak gonbidapena hartu du uztailaren 14ean bere euskarazko errepertorioarekin Estatu Batuetako hiriburuan bi emanaldi egiteko, Kongresuaren Liburutegiko aretoetako batean lehena, eta Kennedy Center-en bestea. American Folklife Center-ek antolatutako emanaldiak dira, Estatu Batuetako musika aberastasuna bildu eta erakusteko helburua duten ekimenak. Eguerdiz egingo da AEBetako Kongresuko Coolidge Entzutegian izango dena, eta ordu batzuk geroago, seietatik aurrera, Kennedy Center famatukoa, biak Washington DCn.
2010/06/29
Ehun urte ari da betetzen aurten Argentinan, bertako Cordoba probintzia barnealdean dagoen Idiazabal herria. Inguruetan presentzia nabaria izan zuten euskaldunekin lotutako sorrera duen herri honek senidetza harreman berezia dauka Gipuzkoako Goierrin dagoen jatorrizko Idiazabal herriarekin eta, izan ere, bertako ordezkaritza bat ere partaide izango da datorren irailean mendeurreneko ospakizun hauetan. Gaiari buruz, eta Idiazabal argentinarrari buruz artikulua eman berri du argitara Asier Zaldua kazetariak Noticias de Gipuzkoa egunkarian.
2010/06/29
Atzean geratu dira, Buenos Aires probintzia hegoaldean kokatzen den Olavarria herriko 'Gure Etxe Maitea' Euskal Etxearen mugimendurik gabeko egunak. Izan ere, duela hilabete batzuk erakundea berpizteko bildu ziren lagunak gogor ari dira lanean euskal gizataldeak bertako komunitatean dagokion lekua berreskura dezan. Apirilean osatu zuten behin-behineko batzordea eta apirilean bertan ospatu zuten Aberri Eguna Olavarriako kaleetan. Bizitasun berari jarraituz, maiatzaren 30ean herriko ekitaldi batera eraman zuten Euskal Herriaren berri Gure Etxe Maitea-koek, oraingoan 'Hogar San Jose' udal kultur gunearen inauguraziora. Janari tipiko eta dantzekin, eta etxeko txikiekin alaitu zuen jaia kolektibitate euskaldunak.
2010/06/28
Euskadiren Kolonbia, Venezuela eta Ertamerikarako ordezkaria, Iñaki Martinez, Antioquia departamendu kolonbiarreko gobernadore Luis Alfredo Ramosekin eta Nekazaritza idazkari Edgar Arrublarekin bildu zen joan den astelehenean, ekainaren 21ean, Medellinen, ikuspuntuak trukatzea eta Euskadiko eta Kolonbiako eskualde horretako enpresek gara ditzaketen ekimen posibleak aipatzea helburu zuen elkarretaratzean; zehatzago esateko, itsasoarekin eta arrantza munduarekin zerikusia zeukaten gaiak aipatu zituen, hain zuzen.
2010/06/28
Urrundik Euskal Elkarteak antolatuta, nazioarteko dantza elkarretaratzea egin da Paranán, elkarte antolatzaileko dantza taldea eta Uruguaiko Montevideo hiriburutik gonbidatuta propio ekarritako Haize Hegoa Euskal Etxeko Eusko Indarra taldea partaide. Hogeita hamar bat dantzari eta kide euskal-uruguaitarrek osatu zuten ekainaren 4 eta 5ean, larunbat eta igandez, bi eguneko bilerara Haize Hegoatik etorritako ordezkaritza, beti ere bi elkarte eta hirietako euskal komunitateen arteko loturak indartu eta areagotzearren, Urrundik elkartearen hamargarren urteurrenean, eta Argentinako Maiatzeko Iraultzaren Bigarren Mendeurreneko ospakizunen testuinguruan.
2010/06/25
Bi euskal ardo mota edo izendapen hauek maite dituztenek aukera izango dute Londresen egingo den erakustaldi eta dastaldian parte hartzeko. Ekimenaren helburu nagusia bertakoei Euskal ardoaren inguruko ezaguera eskaintzea da, izan ere, kanpoko zale askok 'Espainiar ardoen' inguruko ezagutza duten arren, gutxik daukate euskal ardoen berri. 'Seek the Sensational' izenburupean, ardo erosle, kritiko, zale, eta ostalaritza zein aisialdiko langile eta txikizkako zein handizkako bezeroak bilduko ditu ekitaldiak.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
