euskal diaspora eta kultura
2010/10/01
Zeure euskal etxean nahi dituzula? Idatz iezaiezu, bada... Wilson Saliwonzyck payadore argentinarra eta Egoitz Zelaia euskal bertsolariak urriaren 20ean hasiko dute Hegoamerikan zehar egingo duten 'bertso-payada' bira. Bapatekotasunaren tradizio desberdinen arteko hartueman honi 'Entre mate y patxaran' izena jarri diote. Argentinan, Uruguaien eta Brasilen egingo dituzte emanaldiak. Antolatzaileek 'payada-saio' hauek zuzenean gozatu nahi dituzten euskal etxeei eurekin harremanetan jartzeko gonbitea egiten diete. Urtarrila arte 'errepidean' egoteko asmoa dute.
2010/10/01
XX. Mendeko Izarren Gala deritzon ikuskizunean parte hartu eta gero saria jaso zuen Lucia Lacarrak joan den igandean Moskun: 'Hamarkadako dantzari' izendatu zuten. Berarekin batera beste hiru dantzarik ere jaso zuten izendapena: Errumaniako Alina Cojocaru eta Errusiako Svetlana Lunkina eta Diana Vishneva. Lacarra Munikeko Operako Balleteko dantzari nagusia da.
2010/10/01
Jakina da HABEk eta FEVAk elkarrekin kudeatzen duten 'Argentinan Euskaraz' proiektua 20 urte betetzen ari dela aurten. Urteurren biribil hau ospatzeko, mota askotako ekintzak antolatu dituzte euskara munduan murgilduta dauden lagunek. Hala ere, ekitaldi nagusiak Mar del Platako Bigarren Mendeurreneko Euskal Astean egingo dira. Azaroaren 4tik 7ra trebakuntza ikastaroak iragarri dira, baita 'Euskodromoa' izeneko euskara hedatzeko gunea ere eta omenaldi bat 'Argentinan Euskaraz' proiektuko lehenengo irakasle eta ikasleei.
2010/10/01
Munduko beste hainbat euskal etxeekin bat eginez, Txileko Santiagoko Euzko Etxeak ere San Migel edo hemen 'Mikel Deuna' gisa ezagutua den Euskal Herriko zaindariaren festa ospatuko du aste honetan. Euskal egutegietan festa egun tradizionala den hau, bertan ohikoa den gisan ospatu ere: meza entzunez San Cristobal Muinoko Euzko Enparantza ondoko kaperan eta ondoren euskal kantu eta dantzaz jantzitako ekitaldi bat eginez bertan dagoen Gernikako Arbolaren kimuaren aurrean eta ondoko zabalgunean.
2010/09/30
Eusko Jaurlaritzaren Txile eta Perurako ordezkaria, Ana Urchueguia, Limara bidaiatu da aste honetan, joan den otsailean kargu horretarako izendatu zutenetik bertara egiten duen lehenengo ostera ofizialean. Jakina denez, Lopez lehendakariak Euskadiko Ordezkaritzetan eginiko birmoldaketan, Ordezkaritza bakarra partekatzen dute bi herrialdeek, egoitza Txileko Santiagon. Urchueguiaren agendak Limako Euskal Etxea, espainiar legazioa, administrazio perutarra eta enpresariekiko kontaktuak biltzen ditu.
2010/09/30
Gaur abiatu eta datorren larunbata bitartean Bilboko Euskalduna jauregian nazioarteko aditu talde bat bilduko da, Migrazioen Elkarte Europarrak (AEMI) deituta, migrazioa eta teknologia berriak gaiaren inguruan gogoeta egiteko. Jaurlaritzako Kanpoan diren Euskal Herritarrentzako eta Gizataldeentzako Zuzendaritza, AEMIko kidea, izan da jardunaldien koordinatzailea. Helburuen artean AEMI Europa hegoaldeko elkarteengana irekitzea aipatzen dute antolatzaileek.
2010/09/30
Euskal Sustraiak Euskal Etxeak antolaturik, datorren urriaren 16an gauzatuko da Trenque Lauquen hiri argentinarrean Urdaiazpiko Jaiaren II. edizioa. Antolatzaileek 500 gonbite txartel egin dituzte baina eskaria ikusita, beldur daude ez ote diren nahikoak izango. Hitzordua bertako Barrio Alegre klubean izango da eta janari onenaz gozatzeaz gain, bi bidaia zozkatuko dira gonbidatuen artean.
2010/09/30
Joan den irailaren 11 eta 12an Argentinako Cordoba hiriak bere sorreraren mendeurrena eta baita Gipuzkoako Idiazabal herriarekin senidetzearen X. urteurrena ospatu zituen. Cordobako Gerora euskal kultura elkarte gazteak bere aurkezpen ofiziala egiteko probestu zuen asteburua eta hainbat ekitaldi antolatu zituen, horien artean Baietz taldearen kontzertua eta Txotx! Cordobako Euskal Dantzarien ikuskizuna.
2010/09/29
Aurrera darrai Patxi Lopez lehendakaria Txinara egiten ari den bisitak eta burututako ekitaldien artean euskal enpresen lekutzea bultzatuko duen Kunshan eta Qiandeng-eko gobernuekin akordioa aipatu daiteke. Era berean Lopezen ordezkaritzak Basque Culinary Center fakultatea eta euskal moda ezagutzera eman zituen. Gaur lehendakariak hitzaldia emango du CEIBS Negozio Eskolan eta Jiangsu-ko gobernadorearekin bilduko da. Bihar Expoa eta Shanghaiko Euskal Etxea bisitatuko ditu.
2010/09/29
Nafarroa Behereako Irisarrin euskal bertsolariek eta argentinako payadore batek saioa egingo dute gaur, Lanku eta EKE elkarteek antolatu duten kultur arteko topaketetan. Horrez gain bisitariek 'Euskaldunen Argentina' erakusketa ikusteko aukera izango dute eta 'Kultur arteko bertsu bira' bideoaren emanaldia ere egingo da. Bideo honetan bertsolariek eta payadoreek 2008an Argentina, Uruguai eta Brasilen egin zuten bira jasotzen da.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
