euskal diaspora eta kultura
2010/10/26
Obra Nafarroako Gobernuak argitara emana da eta Liliana Bocquin Moriones argentinara dauka idazle, Kasedako nafarren biloba bera, amaren aldetik. 'La colectividad navarra de Bolívar (1880-1950)' izenburupean, lanak Buenos Aires probintzia barneko Bolivarrera Nafarroatik hurreratutako emigrazioa hartzen du aintzat, euren jatorria, bertara emigratzeko zioak, bertan gizarteratzea eta gaur egun nafar ospakizun eta bestak atxikitzen daramaten lana. 500 aleko tirada egin da, eta 12 euroren truke plazaratu da.
2010/10/26
Nahiz eta elkarrengandik gertu ez egon, Kubaren eta Euskal Herriaren arteko loturak sendo dirau, hein batean behintzat irlan bizi diren euskaldunen ahaleginari esker. Kubako euskal komunitateak beti ditu ateak zabal-zabalik Euskal Herritik datozen musikari, idazle, zinegile eta beste bisitariei harrera egiteko. Azken bisitari horietako bat Ruper Ordorika kantari oñatiarra izan da. Ordorikak hiru kontzertu eman berri ditu Kuban eta lagunarteko emanaldi berezia egin zuen AthletiKuba taldeko kideentzat. Datorren hilean Edorta Jimenez idazlea espero dute irlan.
2010/10/26
Pasa den urriaren 10ean gauzatu zen Tandil hirian Arrechea Amorena anaia baztandarren ondorengo amerikarren lehen elkarretaratzea. Argentinako hiri askotan sakabanatutako 250 bat senide bildu ziren Buenos Aires probintziako hiri honetara bazkaria partekatu eta egun osoa elkarrekin pasatzeko. "Heltzeko momentua zirraragarria izan zen, gehienok ez baikenuen elkar ezagutzen", adierazi dio bileraren antolatzaileetakoa den Juan Ramon Berceche Arrachea Caminok EuskalKultura.com-i. "Zaharrenek euren oroipen eta argazkiekin asko lagundu ziguten, gure artean ezagutzen hasi ahal izateko”, azaldu du Juan Ramon Bercechek.
2010/10/26
Ordiziako Udaleko Kultura Sailak eta Victor Mendizabal Fundazioak Ordiziari buruzko ikerketak sustatzeko helburuarekin deitu dute beka hau. Ikerketa burutzeko 7.000 euro eta hamabi hilabeteko epea izango du irabazleak. Proposamenak aurkezteko epera abenduaren 1ean bukatzen da. Victor Mendizabal Gorostizu ordiziarra Argentinako euskal komunitateko kide izan zen eta hezkuntza arloko ekimen ugari bultzatu zituen XX. mende hasieran.
2010/10/25
EuskalKultura.com-ek zegokionean eta pausoz pauso islatu duenez, Euskal Herriko Oñati herriak eta Argentinako Jose C. Paz-ek euren senidetzea sinatu zuteneko hamargarren urteurrena ospatu berri dute Argentinan. Besteak beste, senidetzea berrituz, Senidetzearen Plaza inauguratuz, eta Jose C. Paz-eko Euskal Etxearen egoitza berria inauguratuz. Beste komunikabide batzuk ere oihartzun egin diote hori guztiari eta hori ekarri dugu artikulu honetara.
2010/10/25
Sareratu du bere lehenengo alea KZ euskal kultura eta literaturari eskainitako aldizkari elektroniko berriak, bere burua "Diasporatik Euskal kulturaz gogoeta egiteko aldizkari digitala" gisa aurkezturik Argentinatik 'Euskalduna' irakurle klubak bultzaturik sortua den ekimen berriak. Irakurle, irakurlegai eta publiko zabalarekin harreman berriak sortzeko ideia du buletin honek, beti ere euskal kultur zabalkundea helburu, adierazi diote EuskalKultura.com-i Euskaldunatik. Lehenengo aleko eduki dira bi elkarrizketa, hurrenez hurren, Joan Mari Irigoien eta Harkaitz Canorekin, Jose Migel Barandiarani buruzko testu bat eta Fito Rodriguez EIEko presidentearen artikulu bat.
2010/10/25
Hamahirugarren edizioa beteko du aurten Bartzelonako euskal musika jaialdiak. Hamabi urte udazkenero Euskal Herrian sortzen diren musika proposamenekin gozatzeko aukera emanez hiriburu katalanean. Aukera aparta talde eta proposamen berriak ezagutzeko eta euskal musikako artista ezagunenetako batzuez gozatu ahal izateko. Aurtengo programa musika onez, ezagutzeke dauden talentu berriez, euskal artista jada ezagunez eta beste hainbat ezusteko atseginez betea dator. 14 talde eta hamaika estilo, Iparraldeko folketik Ezkerraldeko punkera. Urriaren 30etik abenduaren 11era.
2010/10/25
2008. urtearen amaieran, Eusko Jaurlaritzak eta Argentinako Euskal Erakundeen Federazioak (FEVA) 'Euskal Herriko Baserriak' argazki erakusketa ekarri zuten Hego Ameriketara Argentinako publikoaren eskueran jartzeko. Bi urte hauetan zehar, euskal etxe askotan egon dira ikusgai euskal argentinarrek hain gustuko dituzten Pirinioetako paisaiei buruzko irudiak. Erakusketa ibiltari honekin jarraituz, joan den urriaren 4etik 16ra Bahia Blancako Union Vasca Euskal Etxeari egokitu zitzaion erakustaldia antolatzea bertako publikoak argazkiez goza dezan.
2010/10/22
Hirugarren urtez Zinevasco jaialdiak euskal zinemagileek Euskal Herrian (eta munduan) eginiko filme eta laburmetraia sorta bat erakutsiko du Caracas Venezuelako hiriburuan. Filmak Chacao Kultur Zentroan emango dituzte, astelehenean hasi eta azaroaren 3a bitartean. Jaialdiak "ekoiztetxe, zuzendari, gidoilari, aktore eta gaien ikuspegi txiki bat, euskal kultura zazpigarren artearen bitartez ezagutzeko" eskaintzen duela azaldu dio EuskalKultura.com-i zinemaldiko koordinatzaileak, Vicente Corostolak.
2010/10/22
Zine-kafe zikloa gautzen ari da La Platako Euzko Etxean bertako Unibertsitateko Gogoetarako Euskal Katedra Askea eta euskal etxeko 'Matxin Burdin' Liburutegia antolatzaile. Gaur bertan izango da zikloaren bigarren topaketa eta bertaratzen direnek txalapartari buruzko 'Nomadak TX' dokumentala ikusteko aukera izango dute. Proiekzioa arratsaldeko 7etan hasiko da, euskal etxeko egoitzaren lehenengo pisuko aretoan.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
