euskal diaspora eta kultura
2010/11/05
Kolonbiako Euskadiko Ordezkaritzak babesa eman die herrialde honetan egiten ari diren hainbat kooperazio ekimenei, horretarako Euskal Herriko eta Kolonbiako agenteekin bilduz. Alde batetik, joan den asteartean, azaroaren 2an, Iñaki Martinez Ordezkaria Kolonbiako gobernuko Gizarte Ekintza saileko arduradunekin bildu zen eta herenegun Bidasoa Activa elkarteko kideei harrera egin zien ordezkaritzaren egoitzan.
2010/11/05
Ez dira abesbatza bat, 'bi euskaldun diren lekuan, koral bat duzu' esaldia egia dela bermatzen duen euskal talde bat baizik. Ia urtero bezala, 'Euskal Argentina' Iparraldeko elkarteko lagunak argentinaratu egin dira aurten ere Euskal Astean parte hartzeko asmoarekin. Baina aurreko edizioetan ez bezala, Bigarren Mendeurreneko Euskal Aste honetan, eta Pello Mari Otaño bertsolariaren heriotzaren mendeurrena dela-eta, partaidetza berezia izango dute Diaspora argentinarraren jairik handienetan. Izan ere, gaur bertan Mar del Platan, gaueko 11etan, eta Denak Bat Euskal Etxean, kantu herrikoien ikuskizuna eskainiko dute. Hara abiatu aurretik, ahotsak berotu zituzten asteazkenean Buenos Airesko Iparraldeko Euskal Etxean.
2010/11/04
Berlingo Euskal Etxearen lehen ekitaldi ofiziala, bere aurkezpena alegia, alemaniar hiriburuko euskaldunentzat topagune bikaina bihurtu zen joan den larunbatean. Berlineko eta inguruetako lagun asko bildu ziren ekitaldira, Regenbogebfabrik-eko aretoa bete arte. Askok zutik edo lurrean eserita ikusi zituzten ekitaldiko filmeak, eta Mikel Aristegi dantzariak immigrazioaz eta atzerriratzeaz egin duen 'Euskal Herria' koreografia aurkeztu zuen.
2010/11/04
Renon, Nevadako Unibertsitateko Euskal Ikasketa Zentroak (CBS) epea zabaldu du hautagaiak aurkez daitezen 2005etik hona urtero deitzen duen 'William A. Douglass Distinguished Scholar Award' delakorako. Oraingo deialdian 2011-12 ikasturteari dagokion beka/sari hau Euskal Ikasketen alorretako batean aditu edo espezialista den ikerlari edo akademiko bati zuzentzen zaio. Urtero aldatu ohi da aukeratutako alorra eta aurtengoan kirola ikergai duen pertsona baten bila dabil CBS. Ibilbide eta curriculum sendoa eta akademikoki innobatzailea beharko du izan. Hautagaiak aurkezteko epea 2010eko abenduaren 17an bukatuko da.
2010/11/04
Sarean da jada ikusgai joan den astean 'Nick dut nik' ETBko saioak Joseba Etxarri EuskalKultura.com-eko zuzendariari egin zion elkarrizketa. Internetek Diasporari ekarri dizkion aukera berrien inguruan gogoeta egiten du bertan. Eta Diasporak atzerritik euskal kulturari (orokorrean, ez guri bakarrik!) egiten dion ekarpena ere errebindikatzen du. "Askok entzun dugu euskarak atzerrian ez duela balio. Bada, ni ibili naiz esaterako Australian eta Hego eta Ipar Ameriketan, eta euskarak balio izan dit, euskaraz egin didan jendea aurkitu dut", adierazi du.
2010/11/04
Unibertsitarientzat baina baita gai honetaz interesa izan dezakeen edonorentzat ere dago pentsatua, 2010eko ikasturteari dagokionez gaurtik aurrera Mexiko Hiriburuko UNAM Unibertsitatean hasiko den Euskara eta Euskal Kultura Ikastaroa. Gurutzne Etxeberria Etxeberria amezketarra irakasle, eskolak asteartte eta ostegunetan emango dira, bi ordutegitan, ikastaroa berez 2011eko ekainaren 9an bukatuko delarik. Klaseak doainik dira. Aukera ederra da Mexiko DFn bizi eta euskara eta euskal kulturaz argazki orokorra eta aldi berean aski osatua hartu nahi duen edonorentzat.
2010/11/04
Patagonia argentinarrean, Chubut probintziako Puerto Madryngo Gizataldeen Jaia gauzatu berri da urriaren 9 eta 10ean. Bi eguneko ekitaldia 710 zenbakidun eskolan egin zen eta hamahiru kolektibitatek hartu zuten parte, tartean, alemaniarra, boliviarra, uruguaitarra, italiarra, txiletarra, galestarra, Andes Mendikateko Cuyo herrikoa, Argentinako berezko herriena eta euskaduna. "Bi stand muntatu zituen kolektibitate bakarra izan ginen, eta esan behar da lekurik bisitatuena ere izan zela gurea”, adierazi dio EuskalKultura.com-i Puerto Madryngo euskaldunak batzea lortu duen Maria Julia Ercoreca euskal argentinarrak.
2010/11/03
1856 eta 1913 artean Guillaume Aphezak milaka euskaldunen Argentinarako bidaia antolatu zuen. Emigrazio agenteak datu guztiak zazpi kaieretan izkiriatu zituen --bidaiarien izen-deiturak, sorterria, zorrak, itsasontzia...-- eta orain Euskal Argentina elkarteak, Baxenabarreko Erakustokiaren Adixkideak eta Euskal Kultur Erakundeak sarean ezarri dituzte edonork kontsulta dezakeen datubase batean. Bilaketak izen-deitura bidez, sorterriaren arabera edo atzerriratze urtearen arabera egin daitezke. Sustrai bila direnentzat, altxor berri bat sarean.
2010/11/03
Las Flores herrian urtero egiten den 'Teatro del Borde' topaketak nazioarteko artistak biltzen ditu. Kari horretara, 2010. urte honetan eta topaketaren 8. edizioa ospatzeko, antolatzaile argentinarrek Bizkaiko 'Simulacro' antzerki taldea gonbidatu zuten. Las Floresko 'Loretako Euskaldunak' Euskal Etxeak zegokien zubilana egin ondoren eta Eusko Jaurlaritzak bira kulturalak egiteko ematen duen dirulaguntza tarteko, sei antzezlari getxoztarrak 'Mareantes' lana aurkeztuko dute gaur eta bihar Las Floresen. Bira bereko parte, San Pedroko 'Ongi Etorri' Euskal Etxearen eskutik, beste herri honetan ere arituko dira, etzi, artista euskaldunak.
2010/11/03
Lagunen Etxea Euskal Etxeak, Buenos Aires probintzia argentinarrean, Urteroko Biltzar Nagusia egin du joan den ostiralean, urriaren 29an, eta besteak beste elkartea agintealdi berrian kudeatuko duen Zuzendaritza Batzorde berria hautatzeari ekin zion, aurrerantzean Lapridako Euskal Etxea gobernatuko duen agintaritza Martin Adrian-ek gidatuko duelarik, lehendakari gisa, lagun dituela, besteak beste Tomas Fernandez de Barrera, lehendakariorde; Maria Claudia Aguerre, idazkari; Alicia Mendioroz, idazkariorde; Federico Vara, diruzain; eta Eduardo Martin, diruzainorde.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
