euskal diaspora eta kultura
2010/11/15
Tucuman probintzia argentinarrean, Tucuman hiriburuko Euskal Kultur Elkarteko kideek ondoko Yerba Buena hirira bidaia egin dute azaro honetako lehenengo asteburuan, Yerba Buenan egiten zen lehendabiziko Gizataldeen Jaialdian euskaldunen ordezkari izateko. Azokak 3.000 bisitari baino gehiago lortu ditu bere aurreneko urte honetan eta euskaldunekin batera japoniar, andaluziar, criollo, alemaniar, boliviar, mexikar, arabiar eta italiar gizataldeetako ordezkeriek ere hartu dute parte.
2010/11/12
Kirmen Uribe (Ondarroa, 1970) euskal poeta eta idazleak New Yorken egingo diren zenbait hitzaldi literariotan parte hartuko du datorren astean. Astelehenean, Iñaki Uriarterekin batera, Brown University-n eta Instituto Cervantes-en izango da eta asteazken-ostegunean NYeko '7th Annual Festival of European Literature' delako bilkuran, munduko beste zenbait idazlerekin. Orain artean poeta gisa ezagunagoa zen Uribek , besteak beste, 'Bilbao-New York-Bilbao' nobela aurkeztuko du, dagoeneko gaztelania, katalana eta galegora itzulia izan den bere lehenengo eleberria.
2010/11/12
Urtero bezala eta Euskal Asteko egitarauari jarraituz, azaroaren 6ean egin zen Mar del Platako Colegio de Martilleros-en FEVAko ordezkarien bilkura. Hitzordua goizeko 9:30etan hasi zen eta 40 bat euskal etxeren ordezkariak bildun zituen. Hamaiketako atsedenaren ondoren, Aizpea Goenaga Etxepare Institutuko Zuzendaria, Julian Celaya Kanpoko Euskal Herritar eta Gizataldeentzako Zuzendaria, Elvira Kortajarena Jaurlaritzaren Argentinako Ordezkaria eta Andoni Martin teknikaria, Eusko Jaurlaritzaren izenean bertaratu eta bildutako jendeari hitz batzuk zuzendu zizkioten. Aldi berean eta Mar del Platako Kontseilu Erabakitzaile Ohoretsuaren Liburutegian, Euskal Liburutegien XII. Elkarretaratzea gauzatu zen.
2010/11/12
'Nihon Jaia' izeneko Nazioarteko Japoniar Jaialdiak ateak irekiko ditu bihar Bilbao Arena pabilioian, asteburuan zehar Euskal Herri osoko bisitariei japoniar kulturara hurbiltzeko beta emanez. Jaialdiaren bigarren edizioa da hau, iazkoak izan zuen harrera onaren ostean. Bertara inguratzen diren bisitariek ekitaldi eta jarduera egitarau zabalaz gozatu ahal izango dute: ikebana, tearen zeremonia, Noh antzerkia, arte martzialak, gastronomia eta gaur egungo Japoniako moda berrien eta sofistikatuenak: manga, anime, bideojolasak eta cosplay, besteak beste.
2010/11/12
New Yorkeko mugimendu artistikoaren zentroa bihurtu den Williamsburg auzoan, Brooklyn-en, espazio berri bat irekiko dute gaur eta Ana Busto Basterretxea bilbotarra izango da inaugurazio ekitaldiko protagonistetako bat. Bilbo eta New York artean bizi da Busto eta 'Notes' erakusketako lanetan konbinazio basati bat aurkezten du, bizitza errealeko emakumeak kontrakoak diren bi egoeratan gainjartzen dituzten argazkiekin. 'Notes' erakusketan Ana Bustoren lanez gain Anne Chu eta Magaly Perez kubatarrarenak ere izango dira ikusgai.
2010/11/11
Joan den ostiralean, azaroaren 5ean, eta 2010eko Euskal Astearen baitan, Mar del Platako Unzué Kaperako auditoriuma euskal kantu eta abesbatzen biltoki bilakatu zen, kalitate handiko elkarretaratze eta emanaldia eskaintzeko. Hiru izan ziren parte hartu zuten abesbatzak: Villa Mercedesko Euskal Etxeko 'Camerata de la Luna', Tandilgo Euskal Etxeko 'Gure Abestiak' eta Mar del Platako Unibertsitateko 'Camerata Vocal'. Taldeok maila garaiko ikuskizuna eskaini zieten Euskal Asteko publikoari eta zaleei oro har.
2010/11/11
Mondragon Unibertsitatearen Humanitate eta Hezkuntza Zientzien Fakultateak (Huhezi) antolatuta, Literatura Eguna egingo dute gaur Eskoriatzan. Euskaldunek AEBetako Mendebaldean sortutako literatura aztarnak dira topaketaren gaia eta besteak beste, Gloria Totoricagüena boisetarra; Frank Bergon idazle euskalamerikarra eta Miel Anjel Elustondo bezalako adituak izango dira bertan, Bernardo Atxaga idazlearekin batera. Musikarik ere izango da: 'Amuma Says No' talde idahotarrak skype bidez emango du kontzertua eta Audience gernikarrak zuzenean ariko dira. Bertan izan nahiko zenukeela? Mondragon Unibertsitateko telebista bidez, 9:30etatik aurrera zuzenean ikus dezakezu interneten.
2010/11/10
Rafael Anchia euskal amerikarra Alderdi Demokrataren etorkizuneko politikarietako bat eta Texas estatuko Ordezkarien Ganbarako kidea da. Egunotan Euskal Herrian da, Biarritzeko Foroak gonbidatuta. Bere familiak Markinan ditu sustraiak eta honekin laugarrengoz etorri da arbasoen sorterrira. Deia egunkariak egin dion elkarrizketan AEBetako biltzarkide honek bere alderdiak hauteskundeetan jasan berri duen porrota aztertzen du. Guk elkarrizketa laburbildu eta euskaratu egin dugu jarraian.
2010/11/10
“Argentinan euskaraz?” galdetzen dute mundu hegoaldeko herrialde honetara heltzen diren hainbat euskaldunek. Eta bat baino gehiago hunkitu egiten da Euskal Herritik hain urrun egonda, euskaraz hitz egiteko aukera topatzen duenean. Izan ere, Argentinan mila bat euskara ikasle daude, eta nahiz eta kasu ia guztietan giro erabat erdaldunean bizi izan, euskarari gogor eusten diote. Egoera hori ez da, ordea, egun batetik bestera sortu. 1990ean hasi zen “Argentinan euskaraz” proiektuak zerikusi handia du. FEVAk eta HABEk kudeatzen duten programa honen bidez, ekintza ugari egin dira Argentinan egun hori esan ahal izateko, 'Argentinan Euskaraz'.
2010/11/10
Iparraldetik nahiz Hegoaldetik lagun mordoa argentinaratu ziren Euskal Astean parte hartzeko. Iparraldetik 'Euskal Argentina' elkarteko kideak. Hegoaldetik, besteak beste, Getxoko Itxas Argia Dantza Taldekoak. Biek partaidetza berezia izan zuten Mar del Platan burutu zen jaian. 'Euskal Argentina'ko kantuzaleek Pello Mari Otañori omenaldia egin zioten ostiral gauean, euskal-argentinar bertsolariaren heriotzaren Mendeurrenean. Dantzari eta musikari getxoztarrek, berriz, emanaldiak eskaini zituzten astean zehar.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
