euskal diaspora eta kultura
2010/11/26
Deustuko Unibertsitatea Euskal Ikasketen Institutua ari da indartzen, etorkizunean ikastetxe nagusi honetako ikasketa eta ikerketa arloan pisu gehiago izango duelakoan. Joan den astean unibertsitateak 'Euskal Ikasketak mundura eta etorkizunera begira' izeneko simposium bat egin zuen eta bertan institutua sustatzeko ekimen eta kolaborazioei buruz hausnarketa egin zuten Deustuko euskal ikasketa arloko irakasle, ikertzaile eta adituek. "Munduan euskal gaiarekiko interes handia dago", adierazi du Esti Amorrortu Deustuko Gizarte eta Giza Zientzien Fakultateko Ikerketa eta Graduondoetako dekanordeak.
2010/11/26
Argentina, Brasil, Paraguai eta Uruguairako Euskadiko Ordezkari Elvira Kortajarena Buenos Airesko Kultura ministroarekin bildu zen joan den azaroaren 17an, kultura eta turismo arloetako Euskal Herriarekiko hartuemana sustatzeko. Bilerak emaitza positiboa izan zuen eta Hernan Lombardi ministroak Eusko Jaurlaritzaren esku jarri ditu bere ministerioaren erakusketa areto, museo eta zentroak, Buenos Airesko herritarrei euskal arte produkzioa eta euskal artisten emaitzak ezagutarazteko.
2010/11/26
Julio Medem donostiarrak (La Ardilla Roja, Lucía y el Sexo, La Pelota Vasca, Habitación en
Roma) Ibilbide Artistikoaren Luis Buñuel saria jaso du ostegun honetan Mexiko DFn, hiriburu mexikarrean gaurdaino egiten aritu den Zinema Espaniarraren III. Erakustaldiaren baitan. Mexikoko Zinema Institutua da prestigiozko sari hau ematen
duen erakundea. Era berean, Roberto Castonek zuzendutako Ander izenburu euskaldunak erakustaldiko filmik onena saritzen duen Zilarrezko Klabelina irabazi du eta film horretako protagonista den Joxean Bengoetxeari aktore onenaren saria eman diote, adierazi dute ohar batez Etxepare Euskal Institututik.
2010/11/25
EuskalKultura.com-eko irakurle askok eskatzen diguzue sarean euskara ikasteko eskuragarri diren baliabideei buruzko informazioa eta guk 'Euskara ikasi' atalean era iraunkorrean jasotzen dugu informazio hori. Atal horren azken eguneraketa dakarkigu orain hona, sarean agertu diren baliabide berri batzuk gehitu eta desagertu direnak kenduta: doako ikastaroak, sarean zuzentzen diren ariketak, hiztegiak, irakurketak, eta beste materialak. Ikusmira ezazu mintzapraktika atala, munduan zehar euskara ikasi/irakatsi eta beste hizkuntzak praktikatzeko prest dauden ehundaka lagun topatuko dituzu (benetan, guk proba egin dugu eta!)
2010/11/25
Larunbat honetan Buenos Aireseko Todos los Santos abesbatzak eta Denak Bat Camerata taldeak Felipe Gorriti musikagile nafarraren 'Meza Re-n' estreinatuko dute, lehen aldiz Euskal Herritik kanpo, Xabier Iñaki de Arza Blanco maixuaren zuzendaritzapean. Felipe Gorriti (1839-1896) uharte-arakildarraren lan honen partitura Eresbil Euskal Musika Artxibategiaren bitartez eskuratu dute bi taldeek, eta estreinaldirako digitalizatu egin behar izan dute. Kontzertuaren programa Mozarten 'Vesperae Solennes de Confessore' lanarekin osatuko da.
2010/11/25
Miguel Sanz Nafarroako Gobernuko presidentea Txile eta Argentinara bidaiatuko da heldu den astean, abenduaren 5etik 10era bitartean, San Frantsizko Xabier Eguna eta Nafarroako Eguna bertako komunitate nafarrekin ospatzearren. Berez abenduaren 3an bada ere --aurten ostirala--, Sanzek Foru Komunitateko ekitaldietan hartuko du parte lehenik, ondoren 4ean Txilera bidaiatzeko eta bostean, igandez, Txileko Santiagon prestatu dioten programan parte hartzeko. Santiagon, besteak beste, duela bi aste bere gobernuak Agustin Otondo Dufurrena nafar txiletarrari eman zion Karlos III Noblearen Gurutzea ezarriko dio pertsonalki.
2010/11/24
Azaroko bigarren asteko asteazkenean Uruguaiko Salto hiriko euskaldunak izan ziren protagonista bertako Immigranteen Astea deritzon jaialdian. Asteko egun bakoitza gizatalde bati eskaini zitzaion, eta asteazkenean euskal berben oihartzunak entzun egin ziren Salton. Eguneko jarduera guztiak euskaldunen ohitura, kultura eta gastronomiari buruzkoak izan ziren, eta Saltoko Euskaldunak taldeko lagunak buru-belarri saiatu ziren herrikideei ahalik eta ikuskizun interesgarriena eskaintzeko.
2010/11/24
Euskaraz ez dakitenak ere hizkuntza honen enbaxadore egitea da Etxepare Institutuak atzo goizean Bilbon aurkeztu duen 'Euskara mundiala' kanpainaren helburua. Horretarako Euskaramundiala.net webgunean hainbat esaldi, esaera zahar eta aho korapilo jarri ditu eskuragarri eta bertan bisitariek hizkuntzarekin jokatu eta euren mezua grabatu ahal izango dute. Etxepare Institutuaren zuzendariak, Aizpea Goenagak, herritarren laguntza eskatu du kanpaina sarean hedatu eta mundu osoko euskaldun zein erdaldunei euskaraz lotsarik gabe egiteko gonbitea luzatzeko.
2010/11/23
Canal Vascok estaldura bikoiztu egingo du Venezuelan, Kolonbian eta Txilen, EITBko zuzendari nagusiak joan den ostiralean Telefonica enpresarekin Txileko Santiagon sinatu zuen akordioari esker. Telefonicak Canal Vascoren seinalea hobetu eta zabaldu egingo du eta herrialde hauetan 700.000 etxetan ikusi ahal izango da euskal katea. EITBko ordezkaritzak hainbat bilera izan zituen Argentinan ere, eta Patxi Arratibel EITBko Estrategia eta Kanpo Harremanetarako zuzendariaren hitzetan "Buenos Aires probintzian Canal Vasco ikusteko aukera zabalik dago".
2010/11/23
EITBko zuzendari orokor Alberto Suriok, eta 004Dedia Networkseko eduki-programazioko eta Telefónica-Txileko zuzendaritzako kide Peter Kothek Txileko telebistetan euskal katea Telefonicaren kanalaren bidez ikusgai izateko akordioa sinatu dute. Telefonicako harpidedunek ETB ikusi ahal izango dute 2011eko urtarrilaren 1etik aitzina. Akordioa izenpetu eta gero, Alberto Suriok eskerrak eman zizkion Ana Urchueguía Eusko Jaurlaritzako Txile eta Perurako Ordezkariari, eskainitako laguntzagatik, eta baita ere Santiagoko eraikin ikusgarrienetako bat den Torre Telefónica-ra gerturatutako euskal komunitateko bi elkarteei.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
