euskal diaspora eta kultura
2011/07/13
"Running of the bullshitters" deitzen diote eta joan den larunbat gauean egin zuten Kaliforniako San Frantziskon. Ingelesezko hitzok ez daukate itzulpen errazik, baina nolabait azaltzearren esan dezagun hitz-joko bat direla 'zezenen entzierroa' (bull hitzak zezena nahi du esan) eta 'esajeratu, gezurti, istorio-asmatzaile edo blablablazaleen entzierroa'ren artean (hori guztia esan nahi baitu bullshitter hitzak). 1996tik jende talde batek gisa berezi honetan ospatzen ditu Sanferminak San Frantziskon, bi hankako sei 'adardun' taberna batetik besterako bidean atzetik puxaka. Iruñean egiazko festa pil-pilean ari dela, Kaliforniatik beste hau asmatu dute, nostalgiaz seguruenik, nafar hitzorduarekin nolabait bat egiteko.
2011/07/12
Donostiako Miramar Jauregian 105 lagun bilduko dira etzi eta etzidamu, Etxepare Institutuak antolatu duen "Excellence in Basque Studies" ikastarora. Ikastaroaren helburua atzerriko unibertsitateetan euskara eta euskal kultura ikasteko prestakuntza ematea da, eta Etxeparek munduko euskal ikasketa alorrean eskarmentu handiko irakasleak eta adituak gonbidatu ditu, euren esperientzia partekatzeko. Etxepare Institutuak euskara eta euskal kultura nazioartean sustatu eta hedatzea du helburu eta 30 irakurletza ditu mundu osoko beste hainbeste unibertsitatetan.
2011/07/12
Xabier Lete euskal kantari eta poeta handiaren heriotzaren urteurrena ez da oraindik bete, eta euskal kulturaren munduan sortzaile oiartzuarraren itzalak bizirik dirau. Bere omenez, Gipuzkoako Foru Aldundiak Nazioarteko Xabier Lete Euskarazko I. Poesia Saria jarri du abian, eta irailaren 15a bitartean jasoko ditu partehartzaileen lanak. EuskalKultura.com-ek baieztatu ahal izan duenez, mundu osoko euskal idazleek har dezakete parte bertan. Irabazleak 10.000 eurotako saria jasoko du.
2011/07/12
Chino Kaliforniako Etienne Ybarra eta Beñat Inchauspe izango dira Estatu Batuetako ordezkari datorren urrian Euskal Herrian egingo den Munduko Mus Txapelketan, Fresnon egindako nazio mailako txapelketa estatubatuarrean garaile atera ondoren. Ohitura denez, aurreko urtean txapeldun izan den bikotearen euskal etxeak antolatzen du urtero txapelketa nazionala eta hala izan da 2011an, 2010ean txapeldun izan zen Fresnoren kasuan. Euskal Gizataldeen arteko 2011ko Mundu Txapelketa Angelun (Lapurdi) jokatuko da urriaren 8-16 artean, euskaldunek kudeatzen duten Frantziako Mus Federazioak antolatuta.
2011/07/12
Kultur jaia burutu zen joan den ekainaren 25ean San Luis probintziako Villa Mercedeseko Euskal Etxean. Urtean zehar hainbat arte arlotan aritzen diren neska-mutilek euren aurrerapenak erakusteko paregabeko aukera izan zuten tailerretako irakasleen eskutik. Kantu, dantza, musika eta zinea izan ziren arratsaldeko protagonistak eta lagun anitz bertaratu ziren euskal etxearen egoitzara kultur ekitaldian parte hartu eta euskal erakundeko arduradunek eskainitako askariaz gozatzera.
2011/07/11
Euskal Etxea dagoen herriko errealitatean erroturik, ekarpenak tokiko herritartasun hori eta elkartearen berezko euskal engaiamendua uztartuz egitea, hori da munduan barreiaturiko hamaika euskal etxek daukaten erronka. Lan eta erronka hori ongi islatzen du Argentinan, besteak beste, Tres Arroyos herriko 'Hiru Erreka' Euskal Etxeak. Azken asteburu honetan, EEak ateak zabaldu zizkien herriko sortaile gazteei, euskal egoitza erakuslehio gisa erabil zezaten. Eta hori euren ekimen euskaldunei eutsiz, sanferminak ospatzeari ez baitiote batere uko egin, esaterako, eta hori ospatzeko festara ere deitu baitute Jose Luis Artuch eta bere taldea buru duen erakundean.
2011/07/11
Euskal Diasporaren historian barrena bidaia egiteko aukera ematen du "Munduko koloreak" erakusketak, argazki eta panelen bitartez. Erakusketak Mexiko, Argentina, Uruguai eta Txileko Diaspora eta euskal etxeen sorrera jorratzen ditu gehienbat, eta joan den ekainaren 27an inauguratu zen. Irailaren 15a arte izango da ikusgai Bilbon, Bizkaiko Foru Liburutegiaren hirugarren solairuan.
2011/07/11
Chaman 2011 izena jarri dio Josetxo Silguero irundarrak Hegoamerikako zenbait herrialdeetan barrena egiten ari den birari. Ekainaren 27an abiatu zen bira, Boliviako Santa Cruzen. Azken egunetan Liman (Perun) izan da, eta gaur Arequipa hirian ariko da. Euskal saxofonista ezaguna kontzertuak eta masterclassak ematen ari da bira honetan; datozen egunetan Peruko Arequipan eta Cuscon; Ekuadorko Quiton, eta Kolonbian eta Venezuelan ere izango da bere musika entzuteko aukerarik.
2011/07/11
HABEren eskutik aurrera doan irakasleak trebatzeko Euskara Munduan programak pauso berri bat emango du Argentinan uztailaren 23tik aurrera. Euskadiko Institutua, Argentinako FEVA eta Euskal Sustraiak euskal etxea antolatzaile, Neguko Barnetegiak Hego Ameriketako sei herrialdetako ikasle-irakasleak bilduko ditu Trenque Lauquen herrian uztailaren 23tik 30era. Aurreko elkarretaratzeetan bezala honetan ere landuko dira internet bidezko ikastaroan ikasi diren gaiak, lehentasuna mintza praktikari emanez. 2008an hasia den plan hau datorren urtean bukatuko da, azterketa ofizialak Argentinan bertan egiteko aukerarekin.
2011/07/11
Joan den larunbatean hasi zen Idahoko Boisen, AEBetan, Ipar Ameriketako lehenengo euskara barnetegia 'Euskara Munduan' egitarauarekin euskara irakasle izateko euskara ikasten ari diren ikasleentzat. NABOko euskara koordinatzaile den Izaskun Kortazar antolatzaile, hamabost partaide bildu ditu Kanada eta Estatu Batuetakoak. Astebete edo gehiagoko honelako barnetegiak ohikoak dira Argentina aldean, baina hau aurrenekoa da kontinenteko alde honetan. Datorren larunbatean, uztailaren 16an bururatuko da.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
