euskal diaspora eta kultura
2011/08/19
Txileko Bosgarren Erregioan urtero egiten den Iñaki Deuna edo San Inazio eguneko ospakizunak giro eta testuinguru bereziki atsegin eta baikorrean egin dira aurten. Viña-Valparaisoko Eusko Etxeko lehendakariak data horren karietara egin ohi dituen hitzaz balantzekoak izaten dira eta aurtengoan elkartearen egoitza berria izan dute ardatz. Aspaldiko helburu zuten egoitzarena gauzatu bidean da, Jaurlaritzaren laguntza bat medio. "Zer iruditzen zaizue Inaki Deuna, 2012an, Viñako geure Eusko Etxearen egoitzan ospatzea?, galdetu zien irribarretsu Luis Archibaldo Uriartek bertaratutakoei.
2011/08/18
Abuztuaren 15ean hasitako biraren baitan, Buenos Aires probintziako Lapridako Lagunen Etxea euskal etxea bisitatu zuen joan den astelehenean Elvira Kortajarena Euskadiren Argentina, Brasil, Paraguai eta Uruguaiko Ordezkariak. Hirian barrena ibilbide turistikoa egin ondoren, herriko alkatearekin elkartu zen Kortajarena. Iluntzean, berriz, prentsaurrekoa eta hitzaldi bat eskaini zituen euskal etxeko egoitzan. Egun osoko ekitaldia bukatzeko, Lapridako udalak 'Herritar Txit Argi' izandatu du Euskadiren ordezkaria.
2011/08/18
'Elkarrekin bide bera egiten' (Juntos por el mismo camino) izenburupean egin berri da joan den ostiralean, abuztuaren 12an, Pergaminoko UNNOBAn (Buenos Aires Probintzia Ipar-Mendebaldeko Unibertsitate Nazionala) 'Euskal Herria eta Katalunia, Estaturik gabeko bi Nazio' hitzaldia, hizlari Cesar Arrondo La Platako Unibertsitate Nazionaleko Historia irakaslea eta Gustavo Capdevila legegizona, "Euskal Herriak eta Kataluniak Estatu espainiarraren eta Europaren baitan bizi duten egoera" aurkezteko.
2011/08/17
Caraboboko Euskal Venezuelar Etxeko lagunak prest daude datorren larunbatean, abuztuaren 20ean, Begoñako Amaren ospakizunei ekiteko, izan ere Ama Birjinaren euskal adbokazio hau baita, euskal etxeko zaindaria ezezik, Naguanagua hiri osokoa ere, bertan eliza eta aldarea baitauzka eskainita euskal etxerik ez zegoeneko urteetatik. Euren aldetik, Caracasko Eusko Etxekoek deia egin diete beren bazkide eta lagunei Valencia-Naguanaguara aipatu jai-egitarauan parte hartzera joan nahi badute, lehen bait lehen adieraz dezaten elkarteko Idazkaritzan, bertarako bidaia gauzatu ahal izateko autobusaren tamaina lehen bait lehen jakin dezaten.
2011/08/17
Maria Eugenia Cruset irakasle eta 'Gatazka eta Bake Prozesuak: Ipar Irlandako kasua, segitzeko adibide?' izenburupean ekimena joan den ostegunean egin zen Chacoko Kotoiaren Lurra Euskal Etxea, FEVA federazioa eta Saltako Unibertsitate Katolikoa --Resistenciako egoitza-- lankide. Ekitaldia Saltako Unibertsitate Katolikoko Resistenciako egoitzan gauzatu zen eta Kultura eta Probintzia Intereseko aldarrikatu zuen Chaco Probintziako Diputatuen Ganberak. Ziurtagiriak eman zitzaizkien bertaratutakoei.
2011/08/16
Necochea izango da aurten Euskal Aste Nazionalaren egoitza eta bertan bilduko dira Argentinako eta munduko beste herrialde batzuetako euskaldunak. Eguneroko errutinatik urrun, azaroaren 7tik 13ra arte luzatuko den jai erraldoi honetan bihotzaren hizkuntzak erabiliko dituzte lagunek elkarren artean komunikatzeko: dantza, musika eta euskara. Euskarari dagokionez, hiru lehiaketa tradizionaletan parte hartzeko gonbitea luzatu du Euzko Etxeak. Euskara klaseak iragartzeko kartelak, idazlanak eta postalak aurkeztu nahi dituztenek irailaren 30era arteko epea dute.
2011/08/13
Antxon Mercero zinegile lasartearraren 'Baserri galdua' laburmetraia aurkeztu eta eman berria dute Txileko Santiagon, 'Colectividad Vasca de Chile' izeneko euskal etxearen egoitza den Las Condeseko Estadio Español delakoan. Dokumentalak, Lasarte udalerrian geratzen diren azken baserriak hartzen ditu gai gisa. Bestalde, prentsa txiletarrak Euskadiko eta Txileko gobernu eta administrazioen artean sinatutako akordioaren berria islatu du, Andeetako herrialdeak bultzatu nahi duen deszentralizazio prozesuan lagungarri izan daitekeelakoan.
2011/08/12
Euskal Autonomi Erkidegoko Aldizkari Ofizialak atzo ostegunez eman zuen argitara Etxepare Euskal Institutuak, bere zuzendari Aizpea Goenagak sinaturik, Europa eta Ameriketako hamar unibertsitateri dagokionez, bertan Euskara eta Euskal Kultura eskolak emateko egotzi eta erabaki dituen irakurleen izenak. Erabaki honek datozen hiru urteetarako eragina dauka, 2011 urte hondarrean hasiko den ikasturtetik hasi eta 2014ko lehenengo seihilabetekoarekin batera amaitu denarekin bukatzeko.
2011/08/12
Hiriburu argentinarreko Euskaltzaleak gau-eskola edo euskaltegiak deia luzatu die bere bazkide, lagun eta parte hartu nahi duten guztiei, etor daitezen gaur gaueko 8etatik aurrera egingo duen aurtengo V. Topaketara, esan nahi baita euskara ardatz egingo den ekitaldi berrira, bere egoitzan, Independencia 1722 helbidean. Bildu nahi dutenei jostailuren bat ekartzea eskatzen zaie, Chaco-ko Quitilipi herriko 664. zenbakidun Eskolarekin garatzen ari den lankidetzari eusteko.
2011/08/12
2003tik hona urtero bezala, Euskal Herriko gazte taldetxo bat Argentinara bildu da aurten ere EHan uda eta Argentinan negua delarik, 'Hator Hona-Vení a la Argentina' egitasmoaren bidez bi herrialdeotako gazteen arteko truke eta elkar-ezagutzea bultzatzeko. Lau dira 2011ko gazteak --Jon Iraola, Ixiar Jauregi, Ainara Saez eta Urtzi Agirretxe-- eta ekimena kudeatzen duen Necocheako euskal etxean zenbait astez euskal kultura tradizional zein modernoaz dauzkaten ezagutzak partekatu ostean, beste leku eta euskal etxe batzuk ere bisitatu dituzte, tartean Tres Arroyos eta bertako Hiru Erreka Euskal Etxea. Hori biltzen du herriko La Voz del Pueblo egunkariak argitaratutako artikulu batek.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
