euskal diaspora eta kultura
2011/09/19
Jazoera albistari digitalaren azken alea, irailekoa, Caracaseko Eusko Etxea elkarteko berri eta hitzorduekin jantzita dator. Horietako bat elkarteko kideek Valencia-Naguanaguako Euskal Etxera egin zuten bidaiaren kronika da. Ia 50 lagun bertaratu zirenmhiriburutik, Caraboboko euskaldunekin Begoñako Ama Birjinaren eguna ospatzeko. Buletina gero eta osatuago dator, eta azken ale honetan, besteak beste, Cumaná-ko Eusko Etxearen sorreraren historia eta Jose Maria Solabarrieta, Caracasko Eusko Etxea-ko zazpigarren presidentearen profila datoz.
2011/09/16
Kirmen Uriberen 'Bilbao-New York-Bilbao' eleberria japonieraz agertuko da aurki. Tokioko Hakusui Sha argitaletxeak argitaratuko du, Japoniako argitaldaririk handienak. Nami Kaneko itzultzaileak zuzenean euskarazko jatorrizkotik egingo du itzulpena. Hala adierazi dute idazle ondarroarraren inguruko iturriek Uriberi buruzko azken berriak aipatzerakoan.
2011/09/16
“Programaren arrakastak pozez bete gaitu, eta ildo beretik jarraitzera animatu” hitzekin laburbildu diote Euzko Etxea euskal etxeko arduradunek EuskalKultura.com-i Hator Hona programaren aurtengo edizioa. Izan ere, aurtengoak ere oso emaitza ona utzi du, ekintza ugari garatu baitira Hator Hona-ko partaideen eskutik, batez ere gazteen arteko harreman estuak sorturik. Uztailaren 15etik abuztuaren 6ra arte luzatu den egonaldian euskara, txalaparta, panderoa, trikia eta dantza tailerrak eman zituzten Urtzi Agirretxek, Jon Iraola Trekuk, Ixiar Jauregi Loiartek eta Ainara Saez Baztan-ek. Horretaz gain, Argentinako euskal jaiak nolakoak diren barrutik bizitzeko aukera ere izan dute gazte euskaldunek, Necocheako Euzko Etxean bertan eta hiriburuan, “Buenos Aires celebra” jaialdian.
2011/09/16
Hegoameriketara ekarri dituen biraren barruan, hiru geldialdi egingo dituzte Euskal Herriko Kulunka antzerki taldeko kideek Argentinan. Europa eta Asiako zenbait herrialde bisitatu ondoren, San Nicolas, Buenos Aires eta Cordoban aurkeztuko da konpainia hernaniarra iraila eta urriko egunetan. Argentinako hiriburuan eta bertako Denak Bat Kultur Elkarteak gonbidaturik, doan ikusi ahal izango da bihar larunbata 'André & Dorine' antzerki lana. Hitzordua iluntzeko 8etan da, Scuola Cristoforo Colombo-ko areto nagusian.
2011/09/16
Iazko bazkariak izan zuen arrakastaren ostean, Euskal Herriko euskal-txiletarrek hitzordu berria egin dute igande honetarako eta Urdazubin bilduko dira Txileko jai nazionala ospatzeko. Ez da bazkarirako tokirik gelditzen, baina bazkalosteko kafe eta solasaldian egingo diete lekurik azken orduko bisitariei. Bestetik, Txileko albiste gehiago heldu zaizkigu Santiagotik, Berriketari buletinari esker. Bertan, hiriburuko Euzko Etxea euskal etxearen azken jardueren berri dator, besteak beste 'Iñaki Deuna' edo San Inazio jaiaren kronika, aurten giro aparta jarri zuen karaoke eta guzti.
2011/09/16
Bizkaia:xede elkarteak Londresko 5th NatureJobs Career Expo azokan parte hartuko du datorren ostegunean, kontratazio premia duten Euskal Herriko erakundeen ordezkari bezala. Elkarte hau Bizkaiko Foru Aldundiak sustatzen du eta bere helburua Bizkaira oso gaitutako profesionalak erakartzea da. Londresen direla baliatuz, Bizkaia:xedeko ordezkariek bilera egingo dute asteazkenean inguruetako euskal profesionalekin. Helburua: elkar ezagutzea eta lan aukerak sustatzeko balioko duen harreman sarea sortzea. London Basque Society-ren bitartez egin dute, besteak beste, deialdia.
2011/09/15
Berez Mungian (Bizkaia) jaioa eta duela hiru urtedanik Txinan bizi dena, Beñat Fuentesek Xujun bere lagun ekialdetarrarekin sortu zuen 'The tree' taldea, eta orain, taldearen izena bera daraman piezarekin astebetez izan da lehenengo postuan Txinako musika-ataririk handiena den Xiami.com-en. Horren eraginez, asiar erraldoiko zenbait hiri bisitatu ditu egin ahal izan duen kontzertu-bira batean. Bere kantu gehienak ingelesez dira, eta batzuetan tarteren bat txineraz edo euskaraz sartu izan du. Arantza Rodriguezen artikulua Deian.
2011/09/15
Jai handia prestatu du asteburu honetarako Quebec-eko Euskaldunak elkarteak, bere sorreraren 15. urteurrena ospatzen duela eta. Ekitaldi honekin batera ardura handia hartu du elkarteak bere gain, eta larunbatean Ipar Amerikako Euskal Etxeen bilkura egingo dute Montrealen, quebectarrek antolatuta. Bilkura hau AEBetatik kanpo egiten den lehen aldia izango da eta euskal etxeetatik andana bat ordezkari etorriko dira Quebec-era. Bilera egiteaz gain, Euskaldunak-eko lagunekin bat egin eta urteurrena ospatu eta gozatu ahal izango dute.
2011/09/15
Bihar bertan hasi eta igandea bitartean Bordeleko hiriak ospatuko dituen Ondarearen Egunetan parte hartuko du Eskualdunen Biltzarra euskal elkarteak. Egitarau zabala prestatu dute horretarako Bordeleko euskaldunek, musika ardatz izango duen programa batekin. Ostiralean euskal musikaren historiari buruzko hitzaldia emango du Christian Lapreriek, eta gai berari buruzko argazki erakusketa zabalduko da. Larunbatean txalaparta tailer irekia eskainiko du elkarteak eta asteburu osoan euskara, dantza, kantu eta mus lantegiak egin ahalko dira euskal etxearen standean.
2011/09/15
Hilabete bat pasatu da Maria Julia Ercoreca joan zitzaigunetik, eta Argentinako euskal gizataldean berak utzitako hutsuneak handia segitzen du; ezaugarri zeukan izpiritu alai kutsakorrak ere bizirik dirau, ordea, eta, bere irri baikor eta kuraia-emailea gogoan, omenaldi txiki bat egin diote bere dantzariek, Puerto Madryngo 'Etorritakoengatik' Euskal Etxeko gazteek, irailaren 3an Immigrante Eguneko jaiaren barruan. Hainbeste dantzari zaletu eta trebatu zituen irakasle maitakor honi omenaldi berezi bat egingo dio azaroaren 7an Gizatalde Euskal-Argentinarrak, oraingoan Necocheako Euskal Aste Nazionalaren baitan.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
