euskal diaspora eta kultura
2013/04/23
Diasporan zehar euskal etxe eta euskaldun talde askok Euskal Herrian baino geroago egin ohi dituzte Aberri Eguneko ospakizunak eta beraz oraindik ere zenbaiten berri ari da heltzen geurera. Estatu Batuetan, esaterako, Las Vegas hiriko Lagun Onak euskal etxeak hilaren 14ean egin zuen Aberri Eguneko jaia, Red Rock Canyon Parkean antolatu zuten piknik batekin. Aldiz, El Salvadorren, euskaldun talde batek Aberri Egunaren ospakizunaren baitan omenaldia eskaini zion euskaldun bati, Marta Gonzalez internazionalistari. Montevideon, Euskal Erria Euskal Etxekoek 101. urteurrena ospatu zuten Aberri Egunarekin batera.
2013/04/23
Eusko Jaurlaritzaren Gobernu Kontseiluak atzo Gasteizen eginiko bileran --astelehenera aurreratua Urkullu lehendakaria Bruselan baita gaur, europar hiribururako bere lehenenego bidaia ofizialean-- Ibon Mendibelzua Madariaga Euskadiren Ordezkaria Mexikon izendatu zuen. Izendapen honekin, Jaurlaritzaren bulego mexikarrak Ibarretxerekin zeukan Ordezkaritza maila berreskuratzen du, Patxi Lopezen gobernuarekin New Yorkeko Ordezkaritzaren menpe jarria baitzen.
2013/04/23
HABEren Ikasbil webguneak euskara ikasi eta lantzeko aukera berria jarri du eskuragarri, doan, Euskal Herriko eta mundu osoko ikasleentzat. "Gramatika gaitasuna lantzen" liburua sareratu du HABEk, eta horrez gain, hainbat ariketa online egiteko egokitu ditu. Liburu honetako teoria eta autozuzendutako ariketak 3. mailako ikasleei zuzenduak dira (hau da, C1 mailako ikasleei). Horrez gain, Ikasbilek euskara ikasleentzako irakurketa gida bat ere jarri du sarean, pdf formatuan eta irakurgaiei buruzko ariketekin (oraingo honetan, A1 mailatik hasi eta 4. maila bitartekoak).
2013/04/22
La Platako Unibertsitate Nazionaletik gogora ekartzen dute UNLPn aurtengoarekin seigarren ikasturtez segidan emango diren Euskal Historia, Hizkuntza eta Kultura Mintegian izena emateko epea gaur amaituko dela, izan ere eskolak etzi asteazkena hasiko baitira unibertsitateko Zientzia Ekonomikoen Fakultateko Graduondoko Ikasgelan. Eskolak astean behin dira, asteazkenetan, Idurre Lekuona errenteriarra lektore.
2013/04/22
Larunbatean egindako Ohiko Biltzar Orokorrean, 23 bozkak eman zioten onespena FEVAren hauteskundeetara aurkeztu zen zerrenda bakarrari. Horrela, eta Federazioko estatutuek diotenari jarraituz, Zuzendaritza Batzordeko zenbait kargu berritu dira, tartean bi lehendakariorde. Laurak Bat-en egoitzan egindako bilkuran Federazioak omenaldi berezi bat egin zien Isidro Legarreta eta Mikel Ezkerrori. Biltzarra bukatuta Eusko Jaurlaritzako Kanpoko Euskal Komunitateentzako Zuzendari berria den Asier Vallejo eta Argentina-Mercosurrerako Euskadiren Ordezkari berria den Sara Pagola FEVAko kideekin bildu eta mintzatu ziren. “Hitz egitera baino, entzutera etorri naiz”, adierazi zien Vallejok bertaratutakoei.
2013/04/22
Iragan asteazkenean abiatu zen Frankfurteko Goethe Universitäteko Eduardo Chillida katedra, Ana Maria Rabe irakasle gonbidatuaren eskutik. Katedra honen heldurua da unibertsitate-esparruan Eduardo Chillidaren obra eta, oro har, euskal artea, ikertzen eta zabaltzen laguntzea. Etxepare Euskal Institutuak sustatzen duen katedra honen baitan, Rabe doktoreak bi mintegi irakatsiko ditu astero, uztailaren 5era bitartean.
2013/04/22
Europako erakundeetako arduradun nagusiekin bilduko da bihar eta etzi Iñigo Urkullu lehendakaria, Bruselara egingo duen bi eguneko bidaian. Bihar Europako Batzordeko presidente Jose Manuel Durão Barrosorekin, Europako Batzordeko presidenteorde eta Lehiakortasun Batzordeko buru Joaquin Almuniarekin eta Barne Gaietako Batzordeko buru Cecilia Malmströmekin bilduko da. Etzi, aldiz, Europar Kontseiluko presidente Herman Van Rompuyrekin egingo du bilera. Era berean, Lehendakariak Bruselako euskal komunitateari harrera egingo dio Euskadiren ordezkaritzaren egoitzan, eta, besteak beste, Bruselako Euskal Etxea bilduko da bertara.
2013/04/19
Gaur iritsiko da Txiletik eta astelehenera arte egon go Argentinan Asier Vallejo Itsaso, Kanpoko Euskal Gizataldeentzako zuzendaria, Hegoameriketara egiten ari den bidaiaren baitan. Herenegun hasi zuen bidaia, Txilen, eta bertako euskal etxeekin bildu zen zuzendaria. Berarekin izan zen Rafael Kutz, Txile eta Perurako Euskadiren Ordezkaria. Argentinan --eta ondoren Uruguain eta Brasilen- Mercosurrerako ordezkari Sara Pagolaren laguntza izango du Vallejok.
2013/04/19
Apirilaren 25ean hasiko da eta bere baitan Juan de Garay Fundazioak, FEVAk eta Eusko Jaurlaritzak kudeatutako stand batek bermatuko du euskal partaidetza 2013ko Buenos Airesko Liburu Azokan. ‘Liburuak zubiak bezala’ leloa duen kultur ekitaldia maiatzaren 13ra arte luzatuko da, urtero bezala hiriburuko La Rural izeneko eremuan. Euskal argitalpenei dagokienez, lau liburu aurkeztuko dira maiatzaren 6an, hala nola ‘Euskaldunak Argentinan. Familiak eta protagonismoa, 2012ko urtekaria’, ‘Euskal Ikasketen Institutu Amerikarra’, ‘Martin de Alzaga’ eta 'Euskal sukaldaritza'. Standa egunero zabalduko zaio publikoari pabilioi horiko 1908. zenbakian.
2013/04/19
Quebec-eko Trois Pistoles herrian dago 'Parc de la Aventure Basque en Amerique' museoa, euskaldunek eta euskal baleazaleek Amerika iparraldean utzi zuten aztarnari buruzkoa. Aurtengo ekainean parkeak museo berria inauguratuko du eta, hori ospatzeko, hiru eguneko jaialdia antolatu du ekainaren 15etik 17ra. Egun horietan, gainera, helduko dira Quebec-era Indianoak espedizioko arraunlari lapurtarrak, Trois Pistolesetik abiatu eta Montrealeraino Saint Laurent ibaitik joango direnak. Parkeak jaialdira biltzeko gonbitea luzatu die Ameriketako euskaldunei.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
