euskal diaspora eta kultura
2016/03/11
Global Training 2016 programak atzerriko enpresetan proiektuak garatzeko aukera emango die Euskal Herriko gazteei. Une hauetan, Garapen eta Donostiako Sustapena enpresek garatuko proiektuak jasotzen ari dira eta gero horien artean onenak hautatuko dituzte gazteei eskaintzeko. Gaztea proiektua egiten ari den bitartean egitasmoak ordainduko du haren soldata.Proiektu horiek apirila baino lehen aurkeztu behar dira. "Esperientziaren emaitza oso ona izan ohi da eta gazteen %80a gelditzen da gero enpresetan lanean", esan dio EuskalKultura.com-i Garapeneko Izaskun Kortazarrek.
2016/03/11
Urtean zehar eta hainbat ekitaldi antolatuz ospatuko du Buenos Aires probintziako Maipuko Euskal Etxeak urtebetetze berezi hau. Eta lehenengo deialdietako bat urteurrenaren logotipoa diseinatzea izango da. Lanak bidaltzeko epea martxoaren 30an bukatuko da eta gonbitea Euskal Etxeko kideei dago bereziki zuzenduta.
2016/03/10
Elgoibarren duela 47 urte jaioa, aspaldi bizi da Alex Garate Cordoban. Fisikan doktore, Andeetan mendizale, musika talde bateko soinujole, bere eskola-irakasle lana bereziki maite du, eta hezitzaile definitzen du bere burua.
2016/03/10
Gaur bertan hasiko da Madrilen SGAE Fundazioak antolatu duen "Nuevos Cineastas Vascos" (Euskal Zinemagile Berriak) zikloa. Emanaldiak martxoaren 16a arte luzatuko dira eta besteak beste, honako lanak izango dira ikusgai: Ander (Roberto Castón, 2009); Izarren argia (Mikel Rueda, 2010); Loreak ( Jose Mari Goenaga eta Jon Garaño, 2013); La casa Emak Bakia (Óskar Alegría, 2013) eta Amama (Asier Altuna, 2015).
2016/03/10
Urtero ospatzen da Buenos Aires probintziako Carmen de Patagones hirian "Patagoniaren Burujabetza Jaia" (Fiesta de la soberanía patagónica) izeneko ekitaldia. Euskal gizataldea ordezkari, Patagones eta Viedma hirietako Euskal Etxeak bere ekintza programa hasten du urtero ere, jai honetako desfilean parte hartzen.
2016/03/10
Boiseko Euskal Museoak antolatuta, euskal espezia eta gozagarrietan oinarritutako sukaldaritza ikastaro berezia segitzeko aukera izango dute gaur arratsaldean, su artean ibiltzearen zaleek. Marla Gungen izango da irakaslea eta, EuskalKultura.com-i esan dionez, “gozagarriak nola erabili ikasiko dugu, jatorrizko jakien zaporea hil gabe”. Ardo pixka batekin lagunduta, bertaratutakoek, prestatutako jakiak probatu ahal izango dituzte, bai eta etxera eraman ere, errezetekin batera.
2016/03/09
Bordeleko Euskal Etxearen webguneak zabaldu du taldearen berri, nahi duen orori asteazkenero biltzen diren euskaltzale hauekin bat egin eta euskara praktikatzeko gonbitea luzatuz. Taldea euskal etxe ondoan dagoen Chez Fred tabernan biltzen da asteazkenero, zeozer hartu eta lagunartean euskaraz hitz eginez tarte polit bat pasatzeko asmoarekin. Gaur bertan hantxe izango dituzue, 21.00etatik aurrera! Bestalde, EEak aldi berri baterako izendatu du orain arteko presidentea, David Mugica, bere lan ona egiten jarrai dezan.
2016/03/09
Otsailean ekarri genuen orrialde honetara Miamiko Euskal Etxeak antolatutako I. Euskal Herri Kirol Jaialdiaren berri. Oraingoan, eta informazio haren osagarri, Euskal Etxeak berak aireak kokatutako dron batetik ateratako bi bideo dakartzagu, irudi polit eta esanguratsuak direlakoan. Mila esker Miamiko Euskal Etxeko kideei irudiak partekatzeagatik, eta segi gauzak ilusioz eta aurrera begira egiten, apreziatzen baitugu.
2016/03/09
Buenos Airesko Euskaltzaleak Euskaltegiak 2016ko eskoletako ordutegiak plazaratu ditu aste honetan. Euskara klaseak apirilaren 4an hasiko dira, aldi berean, lau egoitzatan. Beste hainbat proposamen ere martxoan abiatuko ditu, tartean Euskal Zine Zikloa. Lehenengo saioa martxoaren 18an izango da eta eskainiko den izenburua, “Amama”. Flma bukaturik, Iraia Elias protagonistarekin hitz egiteko aukera izango dute bildutakoek.
2016/03/08
Maiatzaren 1ean izango da Santa Fe probintziako Roldan herriaren 150. urtemuga eta festa erraldoi batekin ospatuko dute bertakoek. Jaialdiaren programaren baitan, euskal erakustaldi bat eskainiko du Euskel Biotzak, argazki, bideo, hitzaldi eta dantzak barne. Berri honekin batera, izaera juridikoa eskuratze bidean daukatela jakinarazi digute roldandarrek.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
