euskal diaspora eta kultura
2008/02/15
Kalifornian bizi den espainiar talde batek --Madrileko komunikabide batzuen laguntzaz-- sustaturiko kanpaina mediatikoa ezerezean gelditu zen atzo. Bost gazte espainiar ultranazionalista baino ez ziren azaldu Stanford Unibertsitatean deituriko kontzentraziora, Ibarretxe lehendakariak eman behar zuen hitzaldia zapuzteko asmoz. Mintzaldiaren aretora sartu zirenek euren galderak idatziz lehendakariari aurkezteko aukera izan zuten, beste entzule guztiek bezala. Ibarretxek ETAren biolentziaren arazoa eta 'Euskadi eta estatu espainiarraren arteko harreman arazo politikoa' desberdindu egin zituen. Ibarretxek ETAri desagertzeko eskatu zion 'alderdi politikoek arazo politikoa gainditzeko akordioa lortu edo ez lortu'. Era berean lehendakariak komunikabideen ixtea eta 'euskal gizartearen zati bat erakundeetatik kanpo uzteko salbuespen legeen erabilpena' kritikatu zituen.
2008/02/15
Charles Felix Markassuza baxenafarra Mexikora joan zen 1910. urtean, 17 urte baino ez zituela, bere osaba Carlos Markassuzak Guanajuato eta Michoacan aldean zituen etxaldeen kargu egitera. Bertan gazteak lur-jabe eta nekazarien bizitza gertutik ezagutu ahal izan zuen eta Mexikar Iraultzaren hastapenak bizi izan zituen, 1913. urtean gertatu zen erasoaldi batean hil egin zuten arte. Beñat Çuburu-Ithorotz historialariak bere gutun eta argazkietan oinarrituta erakusketa bat antolatu du Miarritzeko Mediatekan. Hilaren 29a bitartean izango da ikusgai.
2008/02/15
Iragan urrian Argentinan bira egin ondoren, Betagarri Gasteizeko musika taldeak Suitzan hiru kontzertu emango ditu datorren otsailaren 29an eta martxoaren 1 eta 2an. Eszenatokiak Chur, Zurich eta Thun-eko hiriak izango dira. Taldea 1994. urtean sortu zen eta zazpi pertsonez osaturik dago gaur egun. Urteetan zehar ehundaka kontzertu eman dituzte Euskal Herrian eta etxetik kanpo: Europan, Amerikan, Asian, etab. Bere lanetan ska eta rocka nahasten dute eta aurtengo urria arte hiriz hiri, herriz herri eta eszenatokiz eszenatoki ibiliko dira euren musika zabalduz.
2008/02/15
Euskaltzaindiak eta Bergarako Olaso Dorrea Fundazioak elkarlanerako hitzarmena sinatu zuten iragan asteazkenean. Hitzarmen horri esker, Fundazioak duen bibliografia eta artxibo ondarea (Georges Lacomberen Biblioteka eta Olaso Dorrea Fundazioaren Artxibo Historikoaren XX. mendeko atala, Telesforo Monzon eta Maria Josefa Ganuza emaztearen familiaren ondareak barne) Euskaltzaindiaren egoitzan gordeko da. Horrela, Akademiak ondare honetan biltzen diren hainbat altxorren kargu hartuko du, horien artean Leizarragaren Testamentu Berriaren bi ale.
2008/02/14
South San Frantziskoko Udaletxean goizeko hamaiketan --bertako ordua, arratsaldeko zortziak Euskal Herrian-- hasiko den ikurriña igotze ekitaldiarekin ekingo dio Ibarretxe lehendakariak datorren igandera arte AEBetara egingo duen lau egun eskaseko bisitaldiari. Lehendakariak hitzaldia eskainiko du gaur arratsaldean Stanfordeko Unibertsitatean, azkeneko egun eta asteetan aukera horren kontrako kanpaina gogorra asmatu badu ere bertako espainiar talde batek, Espainiako medio batzuen laguntzaz. Datozen egunotan lehendakaria John Garamendi Kaliforniako gobernadoreordearekin bilduko da eta South San Frantziskoko Basque Cultural Center delakoaren 26. urteurren ekitaldietan hartuko du parte.
2008/02/14
Matteo Manfredi historialari napolitarrak magna cum laude kalifikazioa eskuratu du Euskal Herriko Unibertsitatean 'La fotografía como fuente para el análisis de los procesos migratorios. Metodología, conceptualización y crítica en la Historia de la migración vasca a Uruguay (siglos XIX-XX)' izenburudun tesiarekin. Lana Oscar Alvarez Gila historialariak zuzendu du. Tesiaren proposamena argazkiak migrazio prozesuak aztertzeko tresna berritzaile bezala erabiltzean datza.
2008/02/14
Brasilen jaiotako eta 21 urterekin Euskal Herrira etorritako euskal-argentinarra. Horixe da Maite Iturre, aurtengo Arabako txakolin uztako amabitxietako bat izango denaren deskribapena. Zientzia Politikoak ikasi ditu euskaraz eta orain, Monica Castillorekin batera, Arabako Txakolina Jatorrizko Deiturako Kontseilu Erregulatzaileak larunbatean aurkeztuko duen Arabako txakolin uztaren ohorezko gonbidatua izango da. Bera harrituta dago, baina aldi berean asko eskertzen du gonbitea: «Ez nuen uste halako aitorpenik emango zidatenik Diasporako pertsona izanda».
2008/02/14
Euskalbar euskara, gaztelania eta ingelesaren arteko itzulpenak egiten laguntzen duen Firefox nabigatzailerako tresna-barra bat da. Barra honi esker, euskarazko hiztegietan bilaketak egitea errazagoa da erabiltzaileentzat. Euskalbarren 3.0 bertsioa sarean dago jada eskuragarri, tresna erabilgarri honen webgune berrian. Euskalbar 3.0k 18 hiztegi eta datu baseetan bilaketak egiteko aukera ematen du.
2008/02/13
"Sukal Leku", Juan Mari Arzak presidentea eta German Muruamendiaraz zuzendariaren gidapean, euskal sukaldaritza munduko gastronomiaren lehen postuan kokatzeko sortu den proiektua da. Egoitza nagusia Donostiako Intxaurrondo auzoko "Villa Yeyette" etxe berritua izango du elkarteak, azken urte hauetan kultur arloko hainbat ekintza bildu dituen tokia. Antoiltzaileek adierzai dutenez, datozen hilabeteetan Diasporako sukaldariekin jarriko dira harremanetan egitasmoan parte har dezaten.
2008/02/13
Octavio Cortazar Kubako dokumental zuzendari ezagun bat da eta 1960ean bere lehen lana egin zuenetik ibilbide oparoa izan du. Orain, 'El onceno maestro' filmarekin Cortazarrek bere familiako belaunaldietan atzera egiten du Bizkaiko Otxandio herrira heldu arte. Filmean zuzendariak familiaren baserria aurkituko du eta haien historia berregingo, Jose Luis Loza Cortazar lehengusua bidailagun duelarik.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
