euskal diaspora eta kultura
2008/03/06
HABE Helduen Euskalduntze Institutuak, munduko euskal etxeetan euskara klaseak eskaintzeko laguntza ematen du, urtero argitaratzen duen deialdiaren bidez. Horren bidez 2007-08 ikasturtean 75 Euskal Etxe baino gehiagok izango dute euskarazko eskolak emateko aukera eta institutuak arlo honetarako 210.000 euroko diru laguntza emango du. HABEk euskal etxe bakoitzarekin lankidetza hitzarmena sinatzen du laguntzak bideratu ahal izateko. Akordio hau sinatu duten azken euskal etxeak Bordele, Murtzia, Mallorca eta Valentziako elkarteak izan dira.
2008/03/06
Cele Otaño (1912-2003) margolari eta marrazkilariari buruzko erakusketa irekiko dute bihar Bergarako Aroztegi aretoan. Hil honen bukaera bitartean izango da ikusgai Latinoamerikako karikatura egile famatuena izan zenaren omenezko bilduma. Otañok urte asko eman zituen erbestean Venezuelan eta Nikaraguan eta euskal Diasporaren hainbat aldizkaritan marrazkilari izan zen. Grabatu, margo eta karikaturatan maixu, kolonaurreko arkeologian ere aditua zen Otaño. Erakusketak Euskal Herrian merezi zuen bezain ezaguna ez den artistaren lana berreskuratu nahi du.
2008/03/06
Atzo jaio zen AEBetako Santa Fen, behin ama ospitaleratuta munduratzeak denbora apur bat hartu bazuen ere, Rosetta 'Rose' Jonathy Pearl Uberuaga, Blas (Buber.net) Uberuaga eta Lisa Van De Graaff-en lehenengo alaba. Interneteko euskal munduan aurkezpenik behar ez duten bikotea dira Blas eta Lisa, eta ezaguna da baita ere, besteak beste, Seattle-eko zein New Mexikoko Euskal Etxeetan aitzinarazi duten lana. Biak --aurreantzean hiruak esan beharko seguruenik-- AEBetako euskal komunitateko partaide aktiboak dira. Rose bertan goizaldeko 2:40ak zirenean (Euskal Herrian goizeko 10:40ak) jaio zen, eta ongi daude, errekuperatzen egindako lan onaz, aitak EuskalKultura.com-i esan dionez.
2008/03/06
AZTI-Tecnalia Fundazioak Bermeon (Bizkaia), Matxitxako lurmuturraren ondoko uretan egindako ikerketek aipatzen dutenez, aztarnak "Bou Nabarra"-renak izan daitezke, 1937ko martxoaren 5ean matxinatu frankisten "Canarias" ontziaren aurka borrokatu zuen Euskadiko Itsas Armadaren ontzia. Dena den, datorren udaberrian, urpekariek bertara jaitsi eta lehorrera laginak ekarri ondoren jakin ahal izango da xehetasun osoarekin zein ontzia den. Eskifaia osatzen zuten 49 marineletatik 30ek galdu zuten bizia batailan. Aurten gertakari haren 71. urteurrena beteko da.
2008/03/05
Azken asteetan Lazkaoko Maizpide euskaltegian euskara hobetzen izan diren ikasle argentinarrek sagardotegian eta giro bikainean bukaera eman zioten Euskara Munduan programaren aurtengo barnetegiari. Sagardotegiko beste bezeroak apenas entzungo zuten argentinar doinurik euren euskaran, ekimenaren arrakastaren seinale. Hain da horrela, HABEk Diasporan euskara irakasleak trebatzeko programa beste herrialde batzuetara zabalduko duela 2008-2011 lau-urtekoan: Txile, Uruguai, Brasil, Peru eta Kolonbia batuko zaizkio Argentinari.
2008/03/05
EHko zortzi lurraldeetako --Diaspora barne-- 10 eta 13 urte bitarteko haurrek Udalbidek antolatzen duen 'Urbasan bagara' udalekuaz gozatu ahal izango dute bigarrenez. Urbasa-Andia Parke Naturaleko inguruan gazteek, espeleologia, eskalada, ibilaldiak bizikletaz, igeriketa, jolasak, mendi-irteerak, festak eta naturarekin harremanean egoteko aukera edukiko dute, besteak beste. Ekintzok Euskal Herriko zortzi lurraldeetako gazteen arteko harremana natura eta euskararen bidez sustatzea dute helburu. Udalekuko prezioa 100 eurokoa da eta izena emateko epea maiatzaren 9an amaituko da.
2008/03/05
Mallorca eta Euskal Herriko pilotari komunitateak omenaldia egingo dio larunbatean Paco Aguiló pilotariari. Aguiló 25 urtez irlako pilotari ezagunenetakoa izan da eta Balear frontoiaren buru bezala ere jardun zuen. Ekitaldia Inca herrian izango da eta bertara irletako pilotari ohiak bilduko dira --Ortiz anaiak, Matías, Bechi eta Coll-- eta baita ere Markina eta Durango aldetik propio etorriko diren beste zenbait, tartean Berrojalbiz, Bengoa, Kortabitarte eta Arkarazo. Miamiko euskal komunitatetik ere pilotari askok babesa eman nahi izan diote Aguiló lagunaren omenaldiari, EuskalKultura.com-i propio adierazi diotenez.
2008/03/05
Iragan larunbatean Euskal Itzultzaile eta Interpreteen Elkarteak (EIZIE) zuzendaritza berritu zuen. Gauzak horrela, Beatriz Zabalondok utzitako kargua Oskar Aranak hartuko du. 'Erantzukizun handia da kargu hau hartzea, baina saiatuko naiz ahal dudan hoberen egiten', aipatzen dio itzultzaile euskaldunak EuskalKultura.com-i. Aranak, besteak beste, George Orwell idazlearen "1984" eta Woody Allenen "Anarkia Hutsa" eleberrien itzulpenak egin ditu. Orain, zenbait itzulpenetan lan egin ondoren, EIZIEn, Itziar Otegi izango du ondoan lehendakariorde postuan. Larunbateko batzar nagusiak ItzulBaita proiektua sendotzeko ildo nagusien finkapenerako balio izan zuen ere.
2008/03/05
Hogeita hamaika urte dauzka eta doktoretza ondorengo beka bati esker Berkeleyko Unibertsitatera (Kalifornia) joan zen, lehenik, filosofia ikasketak jarraitzera. 2005ean 'Desobedientziaz ibiltzen' izeneko liburua kaleratu zuen, ekintzaile gisa zeukan eskarmentutik abiatuz desobedientzia zibilaren gogoeta teorikoa eginez. Orain, ordea, Mexiko Hiriburuko UNAM Unibertsitatean ari da ikerketan eta hausnarketan, buruari eraginez. Gaztezulo aldizkariak orain gutxi egin dion elkarrizketatik laburbildu ditugu segidakoak.
2008/03/04
Pablo Sarasateren (Iruñea 1844-Biarritze 1908) heriotzaren mendeurrena dela-eta, Madril, Biarritze eta Iruñeko hiriek euskal musikaria omentzeko hainbat kultur ekitaldi antolatu dituzte 2008rako. Urte osoan zehar kontzertuak, erakusketak, artistaren bizitzako liburuen edizioak eta Iruñea sorterria eta artistaren bizitzari buruz Panasonic Japon enpresak egindako DVDa aurkeztuko dituzte. Web orrialde batek artistaren heriotzaren mendeurrena ospatzeko antolatu diren ekintzen informazioa emango du, bere biografia eta diskografiarekin batera.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
