euskal diaspora eta kultura
2008/04/30
Eusketxe Eusko Kultur Etxeak, iragan urtean egin zuen era berean, aurten ere 200 bono kaleratuko ditu erakundearen egoitzaren mantenimendua eta 2008. urterako prestatu dituen jardueren gastuei aurre egiteko asmoarekin. Bonoak erosten dituzten partaideek Euskal Herrira bidaiatzeko bi pertsonentzako sari baten zozketan parte hartzeko aukera edukiko dute --hegazkinez, klase ekonomikoa, denboraldi baxua--. Zozketa datorren abenduaren 3an egingo da.
2008/04/29
Aitzol Aramaio euskal zuzendariak egin duen 'Un poco de chocolate' filmea Unai Elorriaga idazlearen 'S.P.-rako tranbia' elaberrian oinarriturik dago. Daniel Bruhl, Hector Alterio edo Barbara Goenaga aktoreek, besteak beste, parte hartu dute bihar Euskal Herriko zineetan estreinatuko den filmean. Irune Berrok filmeari buruzko artikulua idatzi du Berria egunkarian, guk jarraian jasotzen duguna. 'Liburuaren espiritua jasotzen du filmak, neurri batean', adierazten du Elorriagak.
2008/04/29
Kolonbiako gobernuak eta Eusko Jaurlaritzak euren arteko harremana areagotzea adostu dute. Iñaki Aguirre Kanpo Ekintzako idazkaria latinamerikar lurraldera abiatu zen iragan astean Gizarte Ekintzako Presidentzi Agentzia kolonbiarraren zuzendaria den Luis Alfonso Hoyosekin memorandum bat sinatzeko helburuarekin. Honen bidez, ekonomia, gizarte, zientzia eta kultura arloan lankidetzarako ekintza berriak sustatuko dira. Lakuako gobernuak gainera Kolonbiako hiriburuan bulego bat irekiko duela jakinarazi du.
2008/04/29
Behe Nafarroako Azkarate Jauregia Euskal Diasporako Nazioarte Zentroa bihurtzeko helburuarekin, herriko udalak eta Euskosarek auzolandegi batean parte hartzeko gonbitea egin dieta Diasporako 18 eta 35 urte bitarteko gazteei. Auzolandegiaren 3. edizioa izango da hau eta abuztuaren 1etik 23ra bitartean egingo da. Izena emateko epea ekainaren 1ean amaitzen da. Hautagaiek hegazkin bidaia soilik ordaindu beharko dute, antolakuntzak beste gastuak ordainduko baititu.
2008/04/29
La Platako Euzko Etxearen 64. urteurrenaren ospakizun ekintzen artean, ipuinez, kantuz eta musikaz osatutako Voces del corazón (Bihotzeko ahotsak) helduentzako ikuskizuna antolatu dute 'Matxin Burdin' liburutegiak eta euskal etxeak berak. Bestalde, zentroko arduradunek bazkideak eta interesa duten pertsonei Buenos Aireseko XXXIV. Liburu Azokara joateko gonbitea egin diete. Bertan, FEVA, Juan de Garay Fundazioa eta Eusko Jaurlaritzaren standari esker, euskal argentinar komunitateak presentzia du ekitaldian.
2008/04/28
Buenos Airesek euskal aktibitate bizia izan zuen joan den asteburuan. Alde batetik Laurak Baten mintzaldia eman zuten Josu Legarretak eta Andoni Martínek, Eusko Jaurlaritzaren izenean, euskal etxeetako arduradunei aurtengo diru laguntzen deialdian egin diren aldaketak azaltzeko. Egun berean, baina arratsaldez, Laurak Batek eta Argentinako beste euskal etxe askok (Laprida, Mendoza, Euskaltzaleak eta Chascomús, besteak beste) Gernikaren bonbardaketaren 71. urteurrena dela eta ekitaldiak egin zituzten.
2008/04/28
Egun hunkigarria izan zen joan den larunbata ehundaka hondarribitar, gudari ohi eta Kandido Sasetaren senitartekoentzat. Horien artean oso bereziki osabaren oroimena omentzera Mexikotik etorri berriak ziren bi hilobentzako. Kandido Saseta 1937an hil zen Asturiaseko frontean, Euzko Gudarostearen buruan borrokatzen ari zela frankotiradore batek tiro egin zionean. Bere gorpuak 71 urte eman zituen toki ezezagun batean lurperatuta, baina herenegun, Gernikako bonbardaketaren 71. urteurrenarekin batera, azkenik etxera ekarri ahal izan zuten.
2008/04/28
Rio Negro probintzia argentinarreko General Roca hiria izango da Patagoniako Euskaldunen Lehen Topaketaren egoitza. Gure Etxea Euskal Etxeak antolatzen du ekitaldia, eta maiatzaren 17 eta 18an egingo dute. Patagoniako euskaldunentzako bilgune izateko asmoarekin jaio da eta dagoeneko euskal etxe askok eta FEVAko arduradunek baieztatu dute partaidetza. Topaketaren egitaraua jakitera eman da dagoeneko eta bertaratu nahi dutenentzat voucher-ak eskaintzen dira. Guztiari buruzko informazioa, Euskal Etxeak elkarretaratze honekin batera plazaratu duen webgunean topa daiteke.
2008/04/28
Shanghaiko euskal komunitate gazteak ideia eta proposamen orijinalak asmatzen jarraitzen du, elkartearen eguneroko bizitzari gatza eta piperra bota asmoz. Azkenekoa hilabete honetan bertan abian jarri duten argazki lehiaketa da: elkarteko kideei euren argazkiak blogera bidali eta Txinako bizitzaren ikuspegi berria emateko erronka bota diete. Hilabetero argazki onenek saria izango dute eta bide batez, blogaren irakurleek Shanghaiko euskal komunitatearen egunerokotasuna eta Txinako paisaiak ikusteko aukera aparta izango dute.
2008/04/28
Argentinako Chacoko 'Kotoiaren Lurra' Euskal Etxeak haur eta helduei doan zuzendutako antzerki Tailerra hasi zuen iragan martxoaren 27an. Miguel Lurbe irakaslearen gidapean, zentroko bazkide eta lagunak antzerki ikerketara bideratutako teknika eta irakasgai ezberdinak praktikatzen ari dira. Ikastaroari bukaera emateko lantegi honen kideek euskal gaia jorratuko duen obra bat antzeztuko dute.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
