euskal diaspora eta kultura
2008/07/03
Aurten ere Nevadako Elko herriko Euskal Etxeak kolore gorri, berde eta txuriak jantziko ditu Basque Festival jaialdiaren edizio berri batean murgilduz. Jaialdia bihar hasi eta igande bitartean luzatuko da eta AEBetako Mendebaldeko euskaldun eta bisitari asko ekarriko ditu Elkora. Aurten ez dute egingo herria famatu egin duen entzierroa, baina egitarauak hamaika proposamen interesgarri biltzen ditu. Honatx batzuk.
2008/07/03
Argentinako Lapridan egoitza duen Arturo Campion Ikasketa Zentroak 'Guregandik' urtekariaren laugarren zenbakia aurkeztuko du bihar. Cesar Arrondo irakasleak aurkeztuko du ale berria, El Chaco probintziako Resistencia hirian egingo den ekitaldian. Hizlariak ale berriko artikuluei buruzko zehaztasunak emango ditu eta aurkezpena ondoren 'Gernika: La huella humana' dokumentala eskainiko da. Filme honek 1936ko apirilaren 26an Bizkaiko herriak pariatu zuen bonbardaketaren testigantzak jasotzen ditu.
2008/07/03
Mundu osoko euskal etxe askok egin duten era berean, Cañuelaseko Denak Bat-eko kide eta lagunek San Juan Gaua festa ospatu zuten iragan larunbatean. Jaiak neguari harrera egiten dio Hego Hemisferioan (udari Ipar Hemisferioan) eta urteroko tradizioa jarraituz sorginez mozorrotutako gazteek desfile bat egin zuten hiriko kaleetan zehar. Gauean, partaideek panpin erraldoi bat erre zuten eta elkarteko dantzariek Euskal Herriko dantzak eta kantak eskaini zituzten sutzarraren inguruan.
2008/07/02
Urtarrilean heldu ziren Euskal Herrira, HABEk sustatzen duen Euskara Munduan programaren baitan Lazkaoko Maizpiden euren euskara maila ahalik eta gehien hobetzeko asmoarekin. Helburuen artean EGA (Euskararen Gaitasun Agiria) lortzea zegoen, hasieran ametsa besterik ez izan arren. Gaur, sei hilabete pasa ondoren, ametsa bete dute bi euskara ikasle-irakasle hauek eta EGA lortuta etxerako bidean dira bertan ikasitakoa euskal etxeetan zabaltzeko asmoz. “Euskal Herritik kanpo, Diasporan, euskara ikastea nire ustez meritu handiko gauza da", dio Jon Urdangarin Maizpideko irakasleak. "Honelako ikasleak izatea gauza handia da guretzat".
2008/07/02
Ipar Ameriketako Urrizaga --edo ahaideetako beste batzuk idazten dutenez, Urizaga-- arnegitar jatorriko familiak bilkura antolatu du heldu den uztailaren 17, 18 eta 19an Nevadako Reno aldean (AEB), XX. mende hastapenean herri baxenabartar horretako Ondarrola auzoko Zeztaua etxetik Estatu Batuetara pasatu ziren Pierre Urrizagaren eta bere anaia-arreben ondorengo euskal-amerikarren biltzaile.
2008/07/02
Kirmen Uribe idazleak poesia errezitaldia eskainiko du bihar Madrilgo 'CaixaForum' zentroan, Mikel Urdangarin, Rafa Rueda eta Bingen Mendizabal euskal musikariekin batera. Ondarroarra espainiar hiriburuan aritu zen otsailean, hain zuzen ere, gizarte eta kultur zentro berri horren inaugurazio ekitaldian parte hartzeko. Ekimenean hiru poema irakurri zituen, euskaraz eta gazteleraz, eta txalo zaparrada polita jaso zuen. Lau euskal artistek beste erakustaldi bat egingo dute hilaren 23an Bartzelonan (Katalunia).
2008/07/02
Bihartik hasi eta larunbata bitartean Haur eta Gazte Literaturako IV. Iberiar Biltzarra egingo dute Donostiako Miramar jauregian. Biltzarrak 'Desberdin Irakurriz: Haur eta Gazte Liburua Kutura Aniztasunean' leloa darama eta bere helburua migrazio prozesuen ondorioz haur eta gazte liburuaren arloan sortzen ari diren beharren inguruan hausnarketa egitea da. Topaketan nazioarteko idazle, irakasle eta adituek hartuko dute parte, horien artean Juan Cruz Igerabide eta Patxi Zubizarreta euskal idazleak.
2008/07/02
Eusko Jaurlaritzaren Gobernu Batzordeak Misiones probintzia argentinarreko Posadas hiriburuko 'Asociacion Civil Centro Vasco Misiones' izeneko Euskal Etxea onartu zuen ofizialki atzoko bilkuran. Bertan Posadas-ko 'Euskal Jatorri' Euskal Etxea gisa ezagunagoa den erakunde onartu berriak duela hiru urte pasexe hasi zuen ibilbidea hiriburu misionistan. Bere kideak legeak Kanpoko Gizataldeetako partaideei onesten dizkien eskubide osoz jokatu ahal izango dute gaurko egunetik aurrera.
2008/07/01
Trikizio taldeak marka duen euskal musika tradizional eta rockaren arteko fusioa eramango du aurtengo udazkenean AEBetara, euskal etxeetan egingo duten biraren bidez. Taldeak Eusko Jaurlaritzaren dirulaguntza lortu du horretarako eta urriaren 16tik 27ra egingo du bidaia. Momentuz Elko, Boise eta San Frantziskoko euskal etxeekin hitz egin dute, baina taldekideek gogoa agertu dute euskal elkarte gehiagotan kontzertuak antolatzeko. Taldeak harreman estua du Diasporarekin. Bartzelonako eta Suitzako euskal etxeetan kontzertuak eman ditu eta bere kideak arituak dira dagoeneko Estatu Batuetako zenbait euskal etxetan ere.
2008/07/01
Chivilcoyko Beti Aurrera Euskal Etxeak San Juan Gauaren magia ospatu eta neguko Solstizioari harrera (Ipar Hemisferioan udako Solstizioa da) egin zion. Plaza Nagusian hasi eta Guernica Plazan eta euskal elkartean amaitzen zen ibilaldi batekin hasiera eman zitzaion jardunaldiari. Bidean dantzariek euskal dantzak eskaini zituzten eta kamioneta batetik euskal musika zabaldu zuten hiritar guztiei ekitaldian parte hartzeko gonbidapena luzatuz. Euskal Etxeko aretoan zenbait ikuskizun antolatu ondoren, partaideek 'San Juango Euskalduna' --bertako euskal komunitateko lagunek egindako panpin erraldoia-- sutzarretan erre zuten.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
