euskal diaspora eta kultura
2008/07/31
Ataungo Udaletxeak, Eusko Jaurlaritzako Landa Garapenerako Programaren babesarekin, herri gipuzkoar honetako mito eta kondaira zaharrak aurkezten dituen webgunea sortu du. Webguneak bertara hurbiltzea proposatzen du, elezaharrak gertatu ziren ingurua zuzenean ezagutzeko, baina ezin duenarentzat internet bidezko bisita egitea ere ahalbidetzen dio. Bi kasuotan, Jose Migel Barandiaran etnologo ataundarraren lana izan da eskaintzen denaren ardatza, izan ere Barandiaranek bere ikerketetan Ataunen bertan gertatu edo sortu ziren 37 elezahar bildu zituen. Webguneak bideoak, mapak, GPS sistema erabiltzen duten ibilbideak eta kondairak jasotzen dituzten MP3ak eskaintzen ditu.
2008/07/31
Aurrera segitzen dute Eusko Jaurlaritzak Kolonbia eta Venezuelarako bere Ordezkaritzaren egoitza zabaltzearren ematen ari den urratsek. Orain hilabete batzuk Ordezkari kargurako Rafael Kutz donostiarra izendatu ostean, Ordezkaritza baitaratuko duen lokala erostea baimendu du aste honetan Jaurlaritzaren Gobernu Kontseiluak. Bogotá hiriburu kolonbiarreko Calle 73-n kokatzen da, 7. errepideko 47/49/51 zenbakietan.2008/07/30
Bilboko Akordeoi Orkestra Sinfonikoak lau kontzertu eskainiko ditu Coruña eta Pontevedrako zenbait herrietan bihar hasiko duen bira galiziarraren barruan. Talde bizkaitarrak 1997tik darama ekintza udako itzuli hau egiten. Amagoia Loroño zuzendariak taldearen errepertorio zabaleko obra onenetarikoak bildu ditu bihartik igandera bitartean eskainiko duten programarako. Soinujoleek melodia unibertsalak eta obra herrikoiak eskainiko dituzte, opera eta zarzuela bezalako generoak, euskal eta galiziar kantak, eta espainiar geografiako zenbait lurraldeetako kantak ere luzatuko dizkiete entzuleei.
2008/07/30
Eguerdi honetan itxi da Nafarroako Nazioarteko Ikastaroaren azken edizioa, Nafarroako Jauregian egin den ekitaldi ofizialarekin. Nafarroako lehendakaria Miguel Sanz bertan izan da eta berarekin batera Txile eta Buenos Aireseko nafar etxeetako lehendakari ohiek ere ez dute ikastaroaren itxiera ekitaldia galdu nahi izan. Azken bi asteetan Buenos Aires, Rosario, Mar del Plata, Bolivar, Mendoza eta Txileko Nafar Etxetik etorritako 41 gaztek euren arbasoen lurra ezagutzeko aukera izan dute ikastaro honi esker.
2008/07/30
Uruguai ipar-mendebaldeko Salto herriko 'Saltoko Euskaldunen Taldea' izeneko Euskal Etxea sarera itzuli da uztail honetan zabaldu berria duen 'Vascos en Salto' izeneko bloga medio. Elkarteak izan zuen 2002an --euskal etxeak hamar urte betetzearekin batera-- lehenengo webgune bat, nahikoa osatua, denborarekin ahultzen joan zena, ez-eguneratzen alegia, berez desagertu arte. Azkeneko boladan taldea izaten ari den aldaketen baitan dator internet lehio berria, duela gutxi elkarteak egoitza aldatu eta herri erdi-erdigunera etorria baita, eta ugaldu nahi ditu bere ekintzak, bazkideak ugaltzen ari zaizkion heinean.
2008/07/29
Pintxoak jateko euskal ohitura Argentinan sustatu eta hedatzeko, Toki Eder Euskal Etxeak lehenengo pintxo lehiaketa bat antolatu du José C. Paz-en. Edonork parte hartu dezake bertan eta irabazleak ehun pesoko saria jasoko du. Euskal Etxeko hiru kidek osatuko dute epaimahaia eta euren ardura izango da pintxoak dastatu eta onena aukeratzea. Izena emateko epea abuztuaren 12an bukatuko da eta hitzordu publikoa, abuztuaren 16an, arratsaldeko 7etan izango da, Toki Eder Euskal Etxean.
2008/07/29
Txileko euskal komunitateak Euskal Herria gertuago izango du hemendik aurrera, ETBek seinale-banatzaile txiletar batekin Canal Vasco bertan normaltasunez ikusi ahal dadin sinatutako hitzarmena medio. Euskal katea ikusteko aukera berria Santiagon egindako koktel batekin aurkeztu zuten joan den asteburuan. Ekitaldirako gonbitae egin zuten José Félix Azurmendik, Nazioarteko ETBko zuzendariak; Jon Erdozia Euskadiko ordezkariak eta Alejandro Sande-k, Emprebask euskal-txiletar elkarteko presidenteak. Informazioa, kultura eta kirolak izango dira Txilen Canal Vascok eskainiko dituen edukien ardatz nagusiak.
2008/07/29
Euskal, biarnes eta Frantziako Tolosa (Toulouse) hiriko lagun talde batek Euskal Herriko dantza, musika eta kulturari buruzko elkarte bat sortzea erabaki zuen 1954an: Denak Bat Taldea. Euskal inauterietan aditua da gaur egun taldea eta kide berriak bildu nahian ateak ireki nahi dizkie gazte zein helduei, eta internetez. Taldeak aurrerapausoa eman du oraintsu eta webgune berria sortu du bere jarduera kulturalak hedatzeko. Taldearen sorrera eta historia bildu du bertara, ekitaldien agenda, argazki galeria eta elkarteko arduradunen datuak eskaintzen ditu, besteak beste.
2008/07/29
Abuztuko bigarren astean hasiko da Buenos Airesko Unibertsitatean (UBA) Euskara eta Euskal Kultura ikastaro berria, bertako Hizkuntza Laboratorioan, oinarrizko mailan, FEVAk eta Unibertsitateak berak sustaturik. Izena emateko ez da gradu akademikorik eskatzen eta bertan parte hartzen dutenek UBAren agiri bat lortuko dute. Teresa de Zavaleta irakasle arrecifestarra izango da irakaslea.
2008/07/29
Eusko Jaurlaritzako Kultura Sailak eta Euskadiko Filmategiak sustatutako Kimuak programa hamar urte betetzen ari da aurten. Euskal laburmetraiak ahalik eta gehien zabaltzea helburu duen egitasmo honek harrera ezinhobea izan du euskal etxeetan. Orain, urteurrenaren karietara, antolatzaileek 68 laburmetraia bildu dituen bilketa-lana eta edizio berezia egin dute, nazioarteko jaialdi eta telebista ugaritara iristeko asmoz. 'Kimuak 1998-2007' bildumako lanak etxeko zein kanpoko zaleengana gerturatzeko helburua dute.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
