euskal diaspora eta kultura
2008/08/20
Eusko Alkartasunaren adar argentinarra abuztuko lehenengo asteburuan bildu da Buenos Aires probintziako Chascomús herrian. César Arrondo EA-Argentinako presidentea buru, bildutakoek euren engaiamendua berretsi zuten Diasporatik lanean segituko dutela esanez, euskal arazoa ezagutua izan dadin eta soluziobideak topatzen laguntzeko, "euskal naziotasunaren lekukotasuna eskaintzen", "estatu independentea osatzeko eskubidea" aldarrikatuz, "giza eskubideen urraketa" eta "euskal presoen sakabanaketa" salatuz, "urriaren 25eko kontsultaren alde" eginez eta "indar politiko abertzale guztien eztabaida gune amankomuna lortzearren" saiatuz. Alkartetxe argentinarreko kideek "indarkeria bidetzat hartzea" arbuiatu dute, ETAk Espainiako kostalde turistikoetan hasitako atentatu kanpaina gaitzetsiz.
2008/08/20
Euskadiren Txileko Ordezkaritzak Txileko Aitasantu-Unibertsitate Katolikoaren batera antolatutako jarduera hau bere seigarren ediziora iritsi da aurten. Ekitaldiak bihar abuztuko 21etik irailaren 3ra garatuko dira. Inaugurazio ekitaldia Raul de la Fuente zuzendari iruinsemearen 'Nomadak TX' filmak protagonizatuko du eta Unibertsitateko Zabalkunde Zentroan egingo da, arratsaldeko zazpietatik aurrera, Mikel Arregi Euskadiko Filmategiko zuzendaria bertan dela, Unibertsitateko, Euskadiko Ordezkaritzako eta euskal komunitateko agintarien presentziaz. Koktela zerbitzatuko da ondoren. Inauguraziorako sarrerak Euskadiko Ordezkaritzan jaso daitezke.
2008/08/19
Nafarroan jaio edo bertan jatorria daukaten Argentinako 19 pertsonak jaso dituzte Foru Gobernuak Nafarroara behin-behingoz zein behin-betirako bidaiatzeko eginiko deialdiko lehenengo laguntzak. Lagunduko diren eskabideak Rosario, Roldán, Allen, Lamarque, Bolívar eta Olavarría herri argentinarretatik etorri dira. Laguntzok eskatu ahal izateko 15-20 urtez Europa Batasunetik kanpo bizi eta bestelako baldintzak bete behar ziren. Emandako 19etatik, 17 laguntza Nafarroara bisitan bidaiatzeko dira eta gainerako biak bertara erabat itzuli eta egoitza finkatzeko.2008/08/19
Joan den asteburuan iritsi dira Argentinara eta Mendozan egin zuten, igandean, euren itzuliko lehenengo emanaldia. Hogeita zortzi dantzari eta musikari dira, Irungo 'Meakako Adiskideak' eta Hendaiako 'Mutxiko' dantza taldeko kideak eta hil azkeneraino arituko dira herrialde australean, emanaldiak eskainiz, bertako euskal etxeen eskutik, San Juan, Córdoba eta Paraná hirietan eta Buenos Aires hiriburuan.
2008/08/19
Urtero ospatzen da Immigrantearen eguna Tres Arroyoseko Euskal Etxean. Aurten 2006an bezala, besteak beste Literatur lehiaketa batekin. Proposamena elkarrizketa bat idaztea da, benetako edo alegiazko immigrante bati egindakoa. Galderak immigranteen bizimoduarekin lotuak behar dute izan eta erantzunen bidez etorkinen bizitzari buruzko jakingarriak eskuratu behar dira. Deialdia zabala da eta hamabost urtetik gorakoek har dezakete parte. Epaimahaiak bi lan aukeratuko ditu eta irabazleek diruko saria zein diplomak jasoko dituzte urrian, euskal etxeak antolatuko duen jai batean. Lanak bidaltzeko epea abuztuaren 30ean bukatuko da.
2008/08/18
Urtebetetze data, berez, joan den ostiralean zen, baina Bahia Blancako euskaldunek datorren larunbat eta iganderako antolatu dute ospakizuna. Programak biltzen dituen ekitaldien artean, antzerki emanaldiak, Buenos Aires, La Plata, Mar del Plata, Necochea, General Roca eta bertako dantza taldeen emanaldiak, kantina eta erromeria eta, guztia bukatzeko, bazkari herrikoia igande eguerdiz, "elkarrekin ospa ditzagun 60 urteak eta topa egin dezagun datozen urteen alde".
2008/08/15
Joan den urteko Euskal Argentinar Astearen oroitzapenak oraindik bizirik daudela, aurrera doa aurtengoaren antolakuntza. La Platako Euzko Etxea antolatzaile, urriaren 26tik azaroaren 2ra arte izango da Buenos Aires Probintziako hiriburuan. Baieztatuta daude orain artean Oskorri taldearen emanaldia, urriaren 31n, eta Aretxabaletako Akordeoi Orkestraren kontzertua; Abesbatzen Elkarretaratzea ere bide onetik doa, bertako Udaletxeko Urrezko Aretoan. Horiekin batera, euskararen inguruan antolatutako lehiaketak eta jarduerak abian daude Euzko Etxeak eta FEVAk bultzatuta.
2008/08/14
Chascomús herritik, Argentinako Buenos Aires probintzian, bertako 'Zingirako Euskaldunak' Euskal Etxea bisitatu duten hiru neska euskaldunekin izan duten kontaktuaren berri eman dute, ohar baten bidez. Zarauztik heldutako Alaitz Aierza, Eider Gonzalez Etxeberria eta Edurne Urbieta Aierza dira, Chascomuseko euskal elkarteko kide den Aierza familiarekin lotura daukatenak. Bisitariek 'Zingirako Euskaldunak'-en egoitza bisitatu eta euskal etxeko arduradunekin bildu ziren, besteak beste.
2008/08/13
Karia hortara zabaldutako deialdiaren baitan, Nafarroako Gobernuak nafar jatorriko bost ikasle hegoamerikar dirulagunduko ditu, euren ikasketak Nafarroako Unibertsitatetan egin ditzaten. Dirulaguntzak 5.750 eta 8.500 euro bitartekoak izango dira, Hezkuntza Departamentuko behin-behineko ebazpen batek adierazten duenez. Onuradunak Ekuador, Kolonbia eta Venezuelakoak dira eta euretarik hiruk Nafarroako Unibertsitate Publikoan (UPNA) ikasi behar dute, beste batek Nafarroakoan (UN) eta bosgarrena dokumentazioa emate prozesuan ari da oraindik.
2008/08/12
Ikastaroa uztailaren 23an hasi zen Entre Ríos probintziako hiriburu den Paraná-n eta izena emandako ikasle kopuru altuaren karietara bi talde antolatu behar izan dira. Saioak kitorik dira da eta bertan ikusten ari diren gaiak hizkuntza eta bere jakingarriak dira, baita Euskal Herriaren historia eta kulturari buruzko gaiak ere. Euskaria Fundazioak bideratu du proiektua eta eskola emaileak, berriz, Aduna Olaizola Galardi irundarra eta Ibai Iztueta zegamarra dira.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
