euskal diaspora eta kultura
2007/05/16
Alza familiako 235 kide argentinar, eguraldi kaxkarra eta euriari aurre eginez, Buenos Aires probintziako Maipú hirian bildu dira irundar jatorriko sendi honek egin duen Lehen Topaketan. 1875. urteaz geroztik Altza deituradun irundar batzuk Argentinara heldu eta bertan geratzea erabaki zuten 'adar eta ondorengo ugari izan dituen leinuari hasiera emanez', adierazi dute ekitaldiaren antolatzaileek. Lehen topaketaren arrakastaren ondotik, finkatua da dagoeneko bigarrenerako hitzordua: 2008 apirileko hirugarren igandean. Familiako kide guztiei parte hartzeko gonbitea luzatzen diete antolatzaileek.
2007/05/16
Tres Arroyoseko 'Hiru Erreka' Euskal Etxeak Txoko Vasco (euskal txokoa) delako ekimena antolatu zuen estreinekoz joan den larunbatean, 'euskal kulturaren berri zabaltzeko bere inguruan'. Komunitate osoari zabaldutako ekitaldia da Txoko Vasco, eta zenbait ekintza baitaratzen ditu, zabalkunde asmo berarekin. Oraingo honetan euskal filme bat proiektatu zen, ondoren dantza ikuskizun bat eskainiz eta euskal osagaiak zeuzkan menu bat zerbitzatuz. Aurreikusitako sarrera kopurua aise agortu zen.
2007/05/16
Erakundearen barne araudiak dioenari segituz, 'Hiru Erreka' Euskal Etxeak, Argentinako Buenos Aires probintzian, Biltzar Orokorra deiturik, zuzendaritza berritu berri du joan den ostegunean. Emaitzek orain arteko lehendakari Jose Luis Artuch adierazi dute agintaldi berri baterako, 2009raino alegia. Berarekin batera arituko dira batzordekide, Andres Monteagudo, idazkaritzan; eta Clyde Vizzolini Azpeitia, diruzaintzan, besteak beste.
2007/05/15
2007/05/15
Errenteriako Musikaste 2007k Rodrigo Alonso de Santiago, Francisco de Madina, Hilarión Eslava, Urbán de Vargas eta Carmelo Bernaola musikagileen lanak berreskuratuko ditu. Francisco de Madina, Aita Madina, euskal Diasporako musikagile ezagunenetakoa da eta bere lanetariko asko Argentina eta AEBetan egindakoak dira. Atzo bertan Errenteriako Musika Asteak bere jaiotzaren mendeurrena ospatu zuen, Madinak bultzatutako Buenos Aireseko Saski Naski dantza taldearen musika tarteko.
2007/05/15
Buenos Aireseko Iparraldeko Euskal Etxeak bat egin zuen joan den larunbatean, Euskal Herrian igandez ospatu zen Herri Urrats ikastolen aldeko hitzorduarekin. Urtero Senperen egiten den jai euskaltzalearen bertsio porteñoa hiriburu federaleko Moreno kaleko euskal egoitzan egin zen eta bertara bildu ziren euskara ikasleak, Buenos Airesko zenbait euskal erakundetako lagun eta kideak eta, oro har, euskara eta euskal kulturaren inguruan mugitzen den hainbat jende. Egitarauak euskarazko jokoak, dantzak eta jolasak baitaratu zituen, guztia geure hizkuntzaren aldeko kontzientzia eta engaiamendu giroak bultzatuta.
2007/05/14
Ostegun honetan Tolosan (Gipuzkoa) Euskal Herriko II. Internet Eguna egingo dute, Internet&Euskadi elkarteak, Eusko Jaurlaritzak eta KZguneak antolatuta, besteak beste. Jaiaren helburua euskal hiritarrak interneten mundura erakarri eta teknologia berriek eskaintzen dituzten tresnak erabiltzen eta profitatzen ikastea da. Aurten, gainera, antolatzaileek Diasporaren parte hartzea bultzatu nahi dute eta horregatik mundu osoko euskal internetzaleei --'birtualki' bada ere-- Tolosan egoteko gonbitea luzatu diete, bideokonferentzia bidez hitzegin edota online jokoetan aritzeko.
2007/05/14
Eusko Jaurlaritzak 2007an Euskal Etxeak dauden lekuetan bira kulturalak egiteko diru laguntza jasoko duten taldeen zerrenda ezagutzera eman du. Hamaika talde eta artistak jaso dituzte eta euren lanari esker bira kultural hauek Argentina, Uruguai, Estatu Batuak, Venezuela, Italia eta Kolonbia bezalako herrialdetara helduko dira. Onuradunen artean, pianojoleak, kantariak, antzerkilariak, txistulariak, trikitilariak, abesbatzak... alegia, Betagarri bezalako taldeak, Arkaitz Mendoza edo Victoria Aja solistak, Patxo Telleria eta Mikel Martinez antzezle-bikotea edo Juan Mari Beltran musikaria.
2007/05/14
Rosarioko 'Zazpirak Bat' Euskal Etxe argentinarrak aurten hiri horretan egingo den Euskal Argentinar Aste Nazionalaren jakingarrietako batzuk aurreratu ditu, horien artean hitzorduaren data zehatzak, urriaren 1etik 7ra hain zuzen. Erakunde euskal rosarioarrak Ibarretxe lehendakaria bertan egongo denaren konfidantzan ari dela lanean adierazi du eta, besteak beste, bi erakusketa, erromeriak, folklore erakustaldiak eta datozen aste eta hilabeteotan aletzen joango den beste hainbat ekimen iragarri ditu, Argentinako zein Euskal Herriko euskal taldeak partaide.
2007/05/14
Segitzen dute iristen gure erredakziora munduko hainbat euskal etxeetan Gernikako Bonbardaketaren 70. urteurrena dela-eta eginiko ekitaldien oihartzunak. Argentinako Tandil-en kasuan, ekitaldiak urteurrenaren egunean gauzatu ziren, eta 'Gernika bakearen alde' agiria irakurri eta omenaldia egin zitzaion Gernikakotik bizirik irten zen Tandilgo EEko buruzagi Roberto Lejarretari. Uruguaiko Salton, ostera, kultur aste bati ekin zitzaion eta hitzaldiak eskaini zituzten Roberto Zunini y Ana María Sciandro irakasleek.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
