euskal diaspora eta kultura
2007/09/10
Christopher Bengochea tenore euskalamerikarrak azkenengo sasoina izango du aurtengoa San Jose Operan, Kalifornian. Arrakasta nabarmena izan du bertan azken bi urteetan, Romeo edota 'Lucía de Lamermoor'-eko Edgardo bezalako pertsonaia erromantikoekin; baina kantari bezala proiektu berriei ekiteko garaia dela uste du. Nafarroa Behereko euskaldunen semea, Bengochea Montanako arrantxu batean hazi zen, euskal musika entzunez. Opera munduan urtetan ikasi eta ibili ondoren, euskal arrastoa nabaritzen zaio kantari gustukoena aukeratzerakoan: Erramun Martikorena, jarraian laburbiltzen dugun Mercury News egunkariko artikulu batean azaltzen duenez.
2007/09/08
Azken urteotan hasitako ohiturari jarraiki, Estatu Batuetako erroibartarrek beren laugarren bilera antolatu dute gaur Gardnervillen (Nevada), ibar nafarrean sortutakoen eta haien ondorengo amerikanoen bilgarri. Ekitaldiko antolatzaile, Jose Luis Urrutia mezkiriztarra eta ibarrean jatorria daukan bere emazte Maria Retegui iruindarra, gaztetandik Kaliforniako Thousand Oaks-en bizi direnak eta Jesus Rey bizkarretarra. 75-80 bat jende espero dute. Aita Martxel Tillousek emaniko mezak abiaraziko du eguna, bazkari herrikoia izanen da ondotik eta, azkenik, dantzaldia, Jean Flesher eta bere orkestra euskalamerikarrarekin.
2007/09/08
Argentinako zortzi lekutan jendaurrean agertu eta hitzaldiak emanez egin duten bira bukatu dute Jose Migel Agirre Oar, Txema Landa eta Patxi Azparren Euskariako kideek. Bilerotan lehenengo eskutik ezagutu ahal izan dituzte toki horietako euskal etxe eta euskaldunak, eta euren sentipenak Euskal Herriaz eta euskal gatazkaz. Eskarmentu honek argiro baieztatu die 'ezinbestekoa dela Diasporaren ekarpena irtenbideak topatzerakoan', bereziki '2006ko meniaren etenaren ostean sortu den egoera konplexuaren aurrean'. Buenos Aireseko euren azken hitzaldiotan, Euskariako kideok berretsi egin dute 'Euskal Diasporaren partaidetzaren beharra euskal egoera soluziobideratzeko'.
2007/09/07
Asmoz Fundazioak eskaintzen dituen ikastaro birtualetan parte-hartu nahi duten Diasporako kideek azken egunak dituzte izena emateko. Ikastaro hauetako batzuetan, gainera, Diasporako kideentzako bekak eskaintzen ditu Asmozek: %100 Euskal Ikasgaien Ikastarorako (lehen Jakinet izena zuena) eta %50 Europar Batasuneko Zuzenbide Konstituzionaleko ikastarorako eta Giza Eskubidetan Aditua ikastarorako.
2007/09/07
Paddy Woodworth kazetari irlandarrak atzo Londonen aurkeztu zuen The Basque Country: A cultural history liburua. Euskal Herriko gizartea eta kultura barrena bidaia proposatzen du bertan 30 urtez The Irish Times egunkariko korrespontsala izan zenak. Liburua 'nik neuk garai haietan eduki nahi izango nukeen Euskal Herriaren gida da', dio egileak. Urte hauetan euskal gizartea ondo ezagutu ahal izan du irlandarrak eta irakurlea Euskal Herriko konpletasunetan zehar gidatzen du: gizarte moderno eta antzinakoa aldi berean, anitza eta plurala, bere esanetan.
2007/09/07
Elkarretaratzea joan den larunbatean gauzatu zen Lavallol-eko Euskal Echea Ikastetxean, Hiriburu Federaletik berrogei bat kilometrora. Urteroko ekitaldi jendetsu honek hamargarren urteurrena bete du aurten eta, aurreko edizio guztietan bezalaxe, ahalegin fisikoa eta kulturala uztartu zituen oraingoan ere. Bostehundik gora ume, Euskal Echea-koak zein hainbat herritako euskal etxeetatik etorriak, egun polita pasatu zuten jolasak, kirola eta elkarbizitza ardatz hartu zituen ekimenean.
2007/09/07
Isabel Larrondo Jausoro, 85 of Boise, passed quietly from the realm of family and friends to be with Our Lord on Friday, Aug. 31, 2007 at St. Alphonsus hospital. Funeral Mass was celebrated at St. Mark's Catholic Church. Burial was at Morris Hill Cemetery. Isabel Larrondo, daughter of Hilario and Maria Gastanaga Larrondo, was born Sept. 23, 1921 at Glenns Ferry, Idaho. She spent her early years with her family on their farm in the canyon country near the Snake River. Isabel completed two years of high school at Glenns Ferry before moving with her family to the Boise Valley in 1937.
2007/09/06
Arrakastaz amaitu da Argentinako Necochea hirian Euskal Herriko gazte talde bat hona ekartzen duen 'Hator Hona' programa. Laugarren urtez garatu den gazteen arteko ekimen honek harremanetan jartzen ditu Euskal Herriko eta Necocheako euskal gazteak. Euskadiko Gazte Kontseiluaren lankidetza tarteko, urtero, Europan uda denean (hemen negua), zenbait gazte hona datoz hilabeterako, euskarari buruz, euskal musika tresnez edota dantzaz dauzkaten abilezia eta ezagutzak elkarbanatu eta, aldi berean, Argentina ezagutu eta bertako esperientziaz jabetzeko. Aurtengoan, lau izan dira etorri diren gazteak, lan egin, eskarmentu ahaztezina hartu eta denbora goxoak pasatu dituzten 22tik 29 urte arteko lau neska-mutiko.
2007/09/06
Chaco probintzia argentinarreko Resistencia hiriko umeek pailazoan bisita jaso eta haien joko eta ikuskizunarekin gozatzeko aukera izan dute, 'Kotoiaren Lurra' Euskal Etxea medio. Elkarteko kide talde batek opari hauxe egin zien Juan Bautista Alberdi auzoko haur gabetuei eta hauek ederki gozatu zuten arratsalde batez. Euskal Etxeko bazkide batzuk egin zuten pailazoen papera, beste batzuk umeei askari gozoa prestatu zieten bitartean.
2007/09/06
Zingirako Euskaldunak Euskal Etxea jo eta su ari da Brazzola Antzoki Munizipalaren berrinaugurazio ekitaldirako bihar aurkeztuko duen Euskal Dantzen Gaua prestatzen. Ekitaldi honekin elkarteak jarraipena emango dio abuztuan izandako ekitaldi sortari. Besteak beste, elkarteko kideak Argentinako Mus Txapelketan eta Ranchos Hiriko Kolektibitateen jaian izan dira. Abuztuan ere, Joseba Arregi hizlariak mintzaldia eskaini zuen euskal etxean.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
