euskal diaspora eta kultura
2007/09/25
Euskal Herriko Unibertsitateak (EHU-UPV) eta Kobeko Ikasketa Atzerritarren Unibertsitate Munizipalak lankidetza akordioa egingo dute ikasle eta irakasleen trukaketa ekimenak aurrera eramateko. Lankidetzaren oinarriak joan den astean Gasteizen egin den I. Mintegi Zientifiko Euskal-Japoniarrean jarri zituzten. Topaketa hauen balioespen oso positiboa egin du Joseba Etxebeste EHUko irakasle eta Mintegiko antolatzaileak.
2007/09/25
Beasaingo Aurtzaka dantza taldeak, Kolonbian barrena egiten ari den biraren baitan, hirugarren emanaldi eguna izango du gaurkoa, eta Cundinamarca departamentuko Mosquera herrian, bertako Udal Parke Nagusian, erakutsiko dute bere dantzari eta musikariek Euskal Herritik daramaten programaren kolore eta tradizioa. Taldeko kide den Joseba Juarezek EuskalKultura.com-i adierazi dionez, joan den igandean Zipaquirá-ko Gatzaren Katedralean eginiko emanaldi arrakastatsuak eman zion hasiera bira honi, datozen egunotan Chia, Funza, Bogotá, Ubala eta Gamma herriak bisitatu dituztelarik. Euskal-kolonbiarrekin ez ezik, bertako dantza taldeekin ere harremandu nahi dute Aurtzakakoek bira honetan.
2007/09/25
Txileko Diputatuen Ganberako presidentea, Patricio Walker, eta erakunde legegile horretako ordezkaritza bat Ajuria Enean izan ziren atzo eta Juan Jose Ibarretxe lehendakariak errezibitu eta harrera hitz beroak izan zituen 'Txilek betidanik hartu izan baititu euskaldunak besoak zabalik'. Walker Kongresuburuarekin batera Gonzalo Uriarte diputatua, Union Democratica-koa, eta Alfonso de Urresti, Alderdi Sozialistakoa, bertaratu ziren bilkurara. Iraganean zein gaur egun Txile eta Euskadiren artean dauden harreman trinkoak azpimarratu ziren ekitaldian.
2007/09/25
Euskal Herrian izan da egunotan Jon Gurutz Rementeria euskal mexikarra, Bizkaiko hainbat herritan dituen familiartekoei bisita eginez. Mexiko DFtik 400 bat kilometro ekialdera dagoen Veracruz hiriko alkate hautatu zuten Rementeria azken hauteskundeetan; bertan Julen Rementeria lehengusu eta oraindik alkate denari gailendu zitzaion. Euskal jatorriaz harro dago Rementeria eta Euskal Herriarekin harremanak sakondu asmoz Iñaki Azkuna Bilboko alkatea bere kargu-hartze ekitaldira gonbidatu nahi du, datorren urtarrilean. Veracruzeko Notiver egunkariak jaso du berria.
2007/09/24
General Villegas herri argentinarreko Euskal Etxeak etzi Buenos Aires probintziako udal honetan egingo den Bakearen aldeko IV. Kulturarteko Elkarretaratzean hartu du parte, bertan toki berezia eskainiko zaiolarik Gernikari, bonbardaketaren 70. urteurrena bete den parada honetan. Eskola batek antolatua da guztia, 'Salomé Ureña de Henríquez' EPB 3 zenbakidunak, eta Euskal Etxearekin batera Villegaseko gainerako gizataldeak ere izango dira partaide. Alkateak hitz batzuk egingo ditu, 'Gernika Bakearen Alde' agiria irakurriko da eta Bakea hitza hainbat hizkuntzatan erakutsiko duten afixak paseatuko dira, tartean euskaraz, italieraz, frantsesez, maputxez, guaraniz, ingelesez, txineraz eta ketxuaz. Hori, zenbait uso aske utzi aurretik, besteak beste.
2007/09/24
Cástor Narvarte Arregui Txilen jaio zen eta zortzi urterekin hasi zen musika ikasten, etorkizunean Donostiako orkestra bateko partaide izateko ametsarekin. Ametsa egia bihurtu da eta egun Narvarte Euskadiko Orkestra Sinfonikoko (EOS) biolajolea da. Orkestrak Brasil eta Argentinan barrena bira bat egin berri du egunotan eta Buenos Aireseko azken kontzertuan biolajoleak tarte bat egin zuen EuskalKultura.com-ekin mintzatzeko. Hurrengo elkarrizketan Narvartek musika munduan Txilen emandako pausoak gogoratzen ditu eta Euskal Herrian bizitzea eta EOSeko kide izateak berarentzat duen esanahia azaltzen du.
2007/09/22
Eusko Jaurlaritzak, 2007ko irailaren 21eko ebazpenez, Euskal Etxeentzako 2007ko dirulaguntzen banaketa onetsi du. Orotara 1.359.340 euro dira banatutakoak, baldintzak bete dituzten 95 etxeren artean, herrialdeka honela sailkatuta: Argentina (55), Australia (1), Brasil (1), Espainiako estatua (8), Estatu Batuak (9), Frantziako estatua (2), Italia (1), Kanada (2), Kolonbia (1), Kuba (1), Mexiko (1), Peru (1), Txile (2), Uruguai (6) eta Venezuela (3). Euskal Etxe esleipendunek faxa bidali beharko dute dirulaguntza onartzen dutela esanez, ahal dela datorren astelehenaren aurretik, Gizataldeetako Zuzendaritzak euskal etxeentzako ohar batean adierazi duenez.
2007/09/21
Montevideoko Haize Hegoa Euskal Etxea pozik agertu da Uruguaiko Nekazaritza Azokaren 102. edizioan egin duen paperarekin. Azoka irailaren 5etik 16ra izan zen eta ia 400.000 lagunek bisitatu zuten. Haize Hegoaren standean Euskal Herriko kultura eta historiari buruzko informazioa eta Uruguaiko abizen eta deitura euskaldunen berri eman zuten. 350 lagunek euren datuak utzi zituzten informazio gehiago jasotzeko.
2007/09/21
Hamarretik bederatzik, euskara arrotz. Umezurtz da euskara Lapurdiko, Nafarroa Behereko eta Zuberoako lizeoetan. Euskararen Erakunde Publikoak 2004-2005ean egindako inkesta kuantitatiboan agertu emaitzen argira, Ipar Euskal Herriko lizeoetan ikasten duten hamar ikasletik bederatzik ez dute euskara edo euskaraz ikasten. Murgiltze ereduari so eginez, emaitzak oraindik kezkagarriagoak dira, %2,4 baizik ez direlako. Gainerakoak eredu elebidunetan ari dira (%2,3) edo euskara ikasgai gisa dute (%4,4). Kopuruak ez dira geroztik emendatu eta urte luzeak beharko dira, neurri ausartekin batera, joera hori aldatzeko. Aitor Renteriak sinatua da Berrian agertu artikulua.
2007/09/21
Gaston Inchausti aurrelari argentinarra, 17 urteko pilotaria, irailaren 6tik 15era South San Franciscon zazpi naziotako pilotareni artean jokatu den Mundu Pilota Batzarreko lehenengo txapelketako aurkikuntza izan da. Argentinak larruzko pilota paleta sailean lortutako brontzezko domina bakarrarekin konformetu behar izan bazuen ere, bertan zeuden herrialdeetako teknikoek txapelketako aurkikuntza gisa aipatu dute Insausti, bere kalitateagatik eta lanabesa erabiltzeko indarrarengatik. Batzuek esana dute jadanik Pablo Fusto berria izango dela, Bilbon profesional gisa ari den txapeldun argentinarrarekin alderatuz.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
