euskal diaspora eta kultura
2017/06/12
Ekimena asteazken honetan aurkeztuko da Donostiako Kursaal-en Munduari Begira Biltzarraren bigarren edizioan. Elkarretaratzera 300dik gora euskal enpresek baieztatu dute dagoeneko partaidetza. Eusko Jaurlaritzak, EAEko hiru Foru Aldundiek eta Araba, Bizkaia eta Gipuzkoako hiru merkataritza ganberek partzuergo hau helburu jakin batekin sortu dute: bakoitzak enpresen nazioartekotzea sustatzeko dauzkan politikak batzea, euskal konpainiek errazago izan dezaten kanpoan jardutea eta kanpo aktibtate hori abiatu, garatu edo areagotzea.
2017/06/12
Urtero legez, Hego Hemisferioko neguko eta Ipar Hemisferioko udako solstizioa ospatuko dute Iparraldeko Euskal Etxeko lagunek ekainaren 24an euren ohiko 'Sorgin Afaria'rekin. Buenos Airesen bihotzean, benetako 'akelarre' bat egingo dute, sorgin eta guzti, ongi jan-edan, dantzatu eta kantatuz. Gonbite honekin batera, euren Herri Urrats jaiaren argazkiak helarazi dizkigute Iparraldeko Etxeko Kultur Azpibatzordeko kideek, eta galeria batera bildu ditugu.
2017/06/09
Corpuseko Eusko Etxeak uztailaren 22 eta 23an ospatuko du aurten seigarren ediziora iritsiko den bere Jai Kulturala. Bi egunetan zehar mota askotako ekintzak egingo dira Eusko Etxearen egoitzan eta herrian, tartean euskal zine emanaldiak, hitzaldiak eta ikuskizunak. ‘Kontaketa Harrigarriak’ Literatur Lehiaketaren sariak ere banatuko dira Jaialdian. Berri honekin bateraEuso Etxeak igande honetarako antolatu duen Bingora gonbidatu ditu corpustarrak, etekinak jarduerak gauzatzeko.
2017/06/08
Gaur egun osoan Bilboko Arriaga Antzokitik egingo den Klasikoen Irakurketa Jarraituak Itxaro Borda baxenabartarraren %100 Basque eleberria hautatu du ehundaka jendeek zatika eta atalka ozen irakurri beharreko testu gisa. Aurtengoarekin hamargarren ediziora iritsi den ekimen honetatik makina bat euskal herritar pasatuko da fisikoki Arriagatik bere zatia irakurtzera. Urtero legez, baina, Diasporako euskaldunak ere partaide izango dira pantailen bidez, munduko 34 euskal etxe eta lekuetatik irakurle.
2017/06/08
La Platako Euzko Etxeak bere azken proposamen eta mugimenduen berri pasatu digu, tartean bere inguruko zenbait erakunderekin sinatutako akordioak, hala nola Herrialde Katalaneko Etxearekin sinatutakoa, UNLP eta UE unibertsitateekin edota bere auzo bereko haur eskolekin. Bihar bertan Paella Lehiaketa bat egingo du eta ekainean baita ere, Euskal Herriko musika tradizionala jotzen ikasteko tailerra jarriko da martxan. Euskal Etxeak Javier Clua berrautatu berria du lehendakari.
2017/06/07
2017ko San Juan eguna bi ekitaldi medio ospatuko du aurten Uruguaiko hiriburuko Haize Hegoa euskal etxeak. Joan den ostiralean San Juan jaiari buruzko hitzaldi bat eskaini zuen Enrique Poittevinek elkartearen egoitzan; ekainaren 23a, berriz, San Juan bezpera, kalean ospatuko dute gauez montevideotarrek, ohiko sua piztuz. Sua Haize Hegoaren egoitzaren aurrean piztuko dute, urtero bezala, eta komunitate osoari luzatu diote gonbitea gaiztakeria eta gauza txarrak erre eta uxatzeko zeremonian. Gogoratu, azkenik, Montevideok Euskal Sukaldaritza jaialdi batekin bukatu zuela maiatza, hiriko Cottage hotelean, oraingoan ere Haize Hegoa partaide.
2017/06/06
Euzko Etxeak eta Jorge Zorreguieta buru duen Fundazioak hitzarmen bat sinatu dute Universidad del Sur ikastetxearekin Euskara eta Euskal Kulturari buruzko Katedra bat irekitzeko. Katedra Carlos Irisarriren esku egongo da eta sei elkarretaratzetan burutuko da, eta agirirak emango dizkie parte-hartzaileei. Inaugurazioa datorren asteko asteazkenean, ekainaren 14an egingo da eta ekitaldi beran errekonozimendu bat emango diote Euskal Etxeak eta Fundazioak, Etxepare Institutuko La Platako irakurle aritu den Daniel Oiarbideri.
2017/06/05
Amaitu du Urkulluk Kolonbiarako bidaia. Itzulerako hegaldia bertan behera geratzekotan egon zen, baina Lehendakariak taldeko gainerakoekin hegazkin berean itzuli nahi izan zuen. Arrakasta politikoa, Urkullu Santos presidentearekin bildu baitzen, hasieran hala iragarri ez bazuten ere. Gaiak: enpresak eta ekonomia, eta Bakegintza. Urkullu euskal enpresekin eta Kolonbiako euskaldunekin bildu zen biadaiko lehenengo egunean. Eta egitarauz kanpo, Ruben Trincado eta Txato Etxaniz donostiarrek Bogotan zabaldu duten jatetxe mediterraneoaren inaugurazioan parte hartu zuen. Miguel Villameriel-ek El Diario Vascon sinatzen duen artikulua laburbildu dugu hona.
2017/06/05
Harreman estua egon da beti Itxaropen Euskal Etxearen eta bere komunitatearen artean. Erlazio hori ekimen konkretuetan burutzen da eta egun esan daiteke Euskal Etxearen egitarauak herri osoari begirako hainbat aktibitate eskaintzen dituela. Hilabete honetan bertan, San Juan jaia elkarrekin antolatuko dute Euskal Etxeak, Udalak eta Euskal Etxeak egoitza duen auzoko eskolak. Aldiz, gehienbat etxeko bazkide eta lagunak partaide dauzka, esaterako, joan den asteburuan jokatu zen etxeko Mus Txapeletak. Hector Altamira eta Santiago Santamarina izan zituen irabazle eta orain eurak hartuko dute parte Nazionalean Saladilloko Euskal Etxeko ordezkari.
2017/06/02
Euskal musika arloan ibilbide nabariko soinu ingeniaria izan arren, hamar bat urte dira ikus-entzunekoen arloan Diasporari lotutako proiektu honi ere ekin ziola Angel Katarainek. ‘Haziak denboran’ ekimenak euskaldunek munduan zehar utzitako aztarnak berreskuratu nahi ditu, eta Kubatik hasi da ordiziarra. ‘Habanako Zazpi Kale’ dokumental saileko bigarren emaitza, gaur iluntzean estreinatuko dute Argentinan, Buenos Airesko Euskaltzaleak-en. Kari horretara solaskide izan du EuskalKultura.com-ek Angel Katarain.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
