euskal diaspora eta kultura
2017/07/07
Errepertorioa handitzeko abesti berriak ari dira entseatzen egun hauetan ‘Zutarriak’ taldeko kideak; baina bitartean, esku artean dituzten proiektuak laster hasiko dira gauzatzen: esaterako, ‘Bagare’ ikus-entzunezko proiektua (bideoklipa) abuztuan aurkeztuko du Ignacio Esquiroz buru duen laukoteak, Majo Staffolani de Amorizak zuzendari eta Laurak Bat-en instalazioetan filmatuta. Taldearen lehenengo diskoa, berriz, 2018 erdialdean atera nahiko lukete.
2017/07/07
Ia guztia prest da Argentinako Tres Arroyos herrian, Buenos Aires probintzia hego-mendebaldean, bihar larunbata Euskal Enparantza inauguratzeko. Azkeneko pausoetako bat eman berria da, garabia handi batekin ezarria baitute parke edo plazaren buruan egongo den monumentua, Euskal Herriaren zilueta edo tankerarekin, lauburu bat erdian. Lehenago orri hauetan azaldu izan dugun legez, hiriko hiru lagunen lana da, Euskal Etxeko kide diren Horacio Jaureguibehere, Francisco Urbieta era Alejandro Cordirena. Zorionak!
2017/07/06
Euskal Telebistaren seinalea saiatu gara sartzen albiste honen gorputzean. Ea teknikak laguntzen duen eta klik egin eta segi dezakezun Iruñeko Sanferminen hasiera eta hori dela eta ETB zuzenean ematen ari den programa zure ordenagailuan. Esan digute baietz, arazo berezirik gabe ikusi ahal izango dela. Hortxe, bada. Aupa Sanfermin eta aipa Diaspora osoan hemen bertan balira bezala jarraitu eta bakoitzak bere etxean, euskal etxean edo lagunartean ospatuko duten diasporakideak! Aupa San Fermin!
2017/07/06
Bertako Euzkal Etxea (sic) elkarteak aurreratu egin ditu San Nicolasen azaroaren 6tik 12ra egingo den 2017ko Euskal Argentinar Aste Nazionalera etorriko diren lehenengo gonbidatuen izenak. Euskal Asterako prestakizunek ez dute, ordea, erakundearen eguneroko martxa moteltzen. Argi dago hori, esaterako, EEko sukaldari taldearen lan solidarioari dagokionean, uztailaren 2an herriko Karitasek, euskaldunak deitu baitzituen bere 50. urteurrenaren karietara antolatutako bazkari erraldoiaz arduratzeko.
2017/07/05
Kaliforniako udan, urtero uztaileko lehenengo asteburuan, bere piknik eta euskal festa egiten du "Southern California Eskualdun Club" euskal etxeak. Udaleku Chinon egiten denean --normalean zortzi urtero-- maiz bi aste horien erdian geratzen da piknika eta, beraz, Udalekuko haurrak, elkarretaratzeko partaide eta protagonista ere bilakatzen dira, aurten gertatu den bezala. Larunbat eta igandez, Chinoko Euskal Etxeko dantzari eta klikarekin batera aritu dira Udalekuko ehun bat gaztetxoak.
2017/07/05
Kirola da gaztelaniaz Centro Vasco Rincon Vasco eta euskaraz Euzko Txokoa Euzko Etxea ezaguna den uskal elkarte panpatarraren ekimen nagusia eta kirolen artean igeriketa gailentzen da instituzioren eskaintzan. Euskal Etxearen barruan sortutako ‘Ceriva’ izeneko eskola bi mailatan aritzen da: batetik, igerilariak trebatzen ditu lehiatzeko eta, bestetik, igeriketa teknikak eskaintzen dira bizi kalitatea hobetzeko. Bi esparruetan, gero eta arrakastatsuagoa da Euzko Txokoa-ko igeri eskolako lana.
2017/07/04
10. ediziora iritsi da eta sendo iritsi ere eskualdeko gastronomia sustatzeko helburua duen ‘Madryn al Plato’ (Madryn Platerean) jaialdia, eta 2017ko 'Baleen Denboraldia'ren hasierarekin ospatu du joan den asteburuan. Hiru ospakizun egun izan dira Puerto Madryn-en, mota askotako ekitaldiekin, tartean zirkuito gastronomiko bat, sukaldaritza klase magistralak, ekimen solidarioak eta Ekoizleen eta Diseinu Azoka. Azken honetan, izan ere, aritu da, urtero bezala jo ta ke Etorritakoengatik Euskal Etxea bere standarekin.
2017/07/03
Nafarroako Gobernuko Garapen Ekonomiko lehendakariorde Manu Aierdik eta Gansu-ko Probintzi Biltzar Herrikoiko Batzorde Iraunkorreko lehendakariorde Luo Xiaohu-k berretsi egin dute Iruñean bi eskualdeen arteko harreman instituzionalak, baita merikataritza eta ekonomia akorrekoak ere, indartzeko jarrera, duela hamabi urte sinatutako akordioa berrituz. Epe honetan truke programak bultzatu dituzte eta lankidetzarako aukerak aztertu kultura, merkataritza ta ekonomia alorretan.
2017/07/03
1877an "Asociación Vasco Navarra de Beneficencia de La Habana" izenpean jaio zen, nahiz eta gaur egun Kubako Euskal Etxea izena ere erabiltzen duen, eta Buenos Airesko Laurak Bat-ekin batera, zabalik segitzen duen munduko euskal etxe zaharrena da. Bere 140. urtebetetzea ospatzeko astebeteko ekitaldi egitaraua antolatu du, datorren larunbatetik hasita: euskal zinea, erakusketak, hitzaldiak eta musika eta dantzak, ikuskizunak tartean.
2017/06/30
Urtero uztaileko lehenengo asteburuan egiten du bere piknik eta festa Hego Kaliforniako 'Southern California Basque Club'-ek. Iaz, elkartearen 70. urteurrena zela-eta NABO Convention ere bertan egin zen. Aurten, piknikaren 71. urteurrenarekin, izango du baita ere partaidetza berezi bat, egun hauetan Chinon egiten arin den NABO Udalekuko haur eta gazteak bertan arituko baitira, eta emanaldi berezia eskainiko baitute. Asteburuko euskal festa kaliforniarreko egitaraua bildu dugu.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
