euskal diaspora eta kultura
2010/09/07
Joan den abuztuaren 27an aurkeztu da Iruñean 'Varia Palafoxiana' liburua, Nafarroako Gobernuak argitara emanik 1600ean Fiteron (Nafarroa) jaio zen Juan de Palafox y Mendoza-ren bizia eta ekarpenak 380 orrialde eta 12 artikulutan aztertzen dituena zenbait adituren eskutik. Palafox Pueblako (Mexiko) apezpiku eta Espainia Berriko erregeorde izan zen, erreformatzaile, idazle oparoa, olerkari eta editore, arte eta musika arloko mezenas, indioen babesle, legegile eta aszeta.
2010/09/07
Argentinako euskal etxe asko, batez ere berrienak, gero eta murgilberagoak dira gizarte-laguntza arloan, duela aste pare bat Mar Chiquita herrian abian jarri den formakuntza-zerbitzua horren adibide. Zerbitzu honen bidez, hainbat lan arlo ezberdinetako trebakuntza emango zaie 70 laguni, tartean osasuna, legeak, turismoa, kirolak eta enpresa ikasketak, gai horietako batzuk aipatzearren. Garrantzi handiko apustu honen inaugurazio ekitaldian, FEVAko ordezkari den Adriana Hernandorenak bat egin zuen 'Izatez Harro' Euskal Etxeko euskaldunekin.
2010/09/07
Elvira Kortajarena Euskadiren Argentina, Brasil, Paraguai eta Uruguaiko Ordezkaria emandako hitza bete eta bere lan-arlo den eremuko euskal etxe guztiak bisitatzeko egitasmoan darrai. Azken hilabeteotan Argentinako Concordia, Arrecifes, Santa Fe, Paraná, Concepción del Uruguay-en eta Uruguaiko Saltoko euskal elkarteetara ostera egin du, besteak beste. Iazko irailean kargua hartu zuenetik Argentinako 54 euskal etxetan izan da dagoeneko eta bere asmoa Argentinan ofizialki onetsita dauden 76 euskal etxeak bisitatzea da.
2010/09/07
FEVAko presidenteak eta federazioko beste agintari batzuk Argentinako euskal etxeekin egiten ari diren topaketa bira zabaldu egin dute azken hilabeteotan, Olavarria, San Nicolas, Arrecifes, General Acha, Río Cuarto eta Lomas de Zamorako euskal komunitateekin bilerak eginez, besteak beste. Bisita hauek euskal etxeek FEVAko jarduna deszentralizatzeko egin izan duten eskariari erantzuna dira eta bilera hauen bidez harremanak estutu eta FEVAk euskal etxeei eskaintzen dien baliabideen berri ematea dira helburuetako batzuk.
2010/09/06
Eusko Jaurlaritzako Kanpo Harremanetarako idazkari nagusia den Guillermo Echeniquek adierazi du Euskal Autonomi Erkidegoak bere burua kanpoan herrialde gisa aurkezten segitzen duela dio, baina, ez Ibarretxeren gobernuak egin bezala "herrialde kexati" kokatua "dagoen lekuarekiko eta Espainiarekiko erlazioekiko". Radio Euskadiri eginiko adierazpenetan, Echenique, Lopez lehendakariak hilabete hondarrean Shanghaiko (Txina) Expo-ra egin behar duen bidaiaz mintzatu da, bertan Euskadiren Eguna ospatu behar dela-eta, eta aipatu du osteraren helburua euskal enpresek Txinan daukaten presentzia sendotzea dela.
2010/09/06
Immigrantearen Eguneko ekitaldien baitan, Buenos Aires probintzia argentinarreko hiriburuko Udalak, urtero Berisson egiten den jaiaren hasierarekin bat eginez, eskualdean lanean ari diren gizataldeen elkarteek proposatutako immigranteak ohoratu ditu joan den asteburuan, horri dagokion domina eta diploma ekitaldi publikoan emanez. Ohoratuen artean, La Platako Euzko Etxeko Agustin Asensio Ariño zegoen. Immigrantearen hilabetea den irailean, bestalde, La Platako Euzko Etxeko abesbatzak datorren ostiralean kantatuko du Udaletxean; eta EEko dantzariek hilaren 15ean dantzatuko dute Coliseo Podesta-n.2010/09/06
"Laurogeita gehiago urte zituela utzi gaitu Roberto Arreguik. Nork jar zitzakeen zalantzan bere sustrai euskaldunak? Aitarengandik hartu zuen deituraren entzute hutsarekin lotura zuzena egiten da bere jatorriarekin eta, hala ere, bigarren deitura emendatuz geroz --Kantauri itsasoko hiri eta portuaren izena dena, Bilbao-- ezbairik ez zegoen bere gipuzkoar/bizkaitar lurrarengandik aldendu nahi zuen edonoren aurrean". Honela hasten da joan den ostiralean La Opinión de Pergamino egunkariak sinatu eta argitara emaniko oroitzapen artikulua, Buenos Aires probintziako herri honetako euskal etxeko sortzaile, lehendakari ohi eta kide izan den laguna gogoan.
2010/09/06
Kolonbiako euskal komunitatea bete-betean sartu da jada bertako VII. Euskal Astean eta atzoko irekiera jaialdiari Euskal Zine Erakustaldiaren lehendabiziko emanaldiak batuko zaizkio gaur. Euskal laburmetraia sorta bat eta 'Ama Lur' filma baitaratzen ditu gaurko programak eta datozen egunetan 'Euskal pilota', 'Lucía y el sexo', 'Días contados' eta 'Tasio' bezalako filmeak izango dira protagonista. Emanaldiak Bogotako Unibertsitate Nazionalean eta Euskal Etxean egingo dituzte.
2010/09/06
Bi hilabete eskas falta dira Argentinako euskal komunitatearen urteko jai handienerako. Mar del Plata hiriak izango du aurten herrialde osoko baita kanpoko euskal etxeetako ordezkariak jasotzeko ardura urriaren 25etik azaroaren 7ra. 'Denak Bat'ek antolaturik, Euskal Argentinar Aste Nazionalean hainbat euskal kultur proposamen gauzatuko dira, tartean gozagai dantzak, kontzertuak, euskara standa, pilota eta mus txapelketak eta erakusketak. Euskal Herriko zein Estatu Batuetako euskal artistak iragarri dira. Baina Bigarren Mendeurrenaren urtean, 2010eko Euskal Aste honek kutsu berezi bat izango du, Argentinan zehar ospatzen ari den urtemuga esanguratsua islatuko duten ekintzak ere eskainiko baitzaizkie bertaratuko direnei.
2010/09/06
“Euskararen alde, bideoak; euskararen alde, kartelak; euskararen alde, postalak; euskaren alde, zuek eta guztiok” dio Mar del Platako Denak Bat Euskal Etxeak eta bertako Artaburu Euskera Taldeak euskara bultzatzeko lehiaketetan parte hartzeko egindako gonbiteak. “Argentinan Euskaraz” proiektuaren hogeigarren urtemuga ere ospatzen da aurten eta kari horretara euskarak leku berezia hartuko du Euskal Astean. Erakunde antolatzaileak euskararekin lotura duten hiru lehiaketa jarri ditu abian komunitate argentinar osoak parte har dezan, bideoak, euskara klaseak iragartzeko afixak eta txikien postalak egitera animatuz, azaroaren 1etik 7ra egingo den Bigarren Mendeurreneko Euskal Asteari begira.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
