euskal diaspora eta kultura
2011/02/28
2011ko ikasturtea hastear dago Argentinan eta bertako irakasleak ziklo honetako euskara irakaskuntzaren antolakuntzan murgilduta daude oso. Buenos Airesko hainbat erakundek izen-emate prozesua abian jarri dute jadanik maila, ordutegi eta leku aukera handia eskainiz. Euskal etxeen arloan, Laurak Bat eta Euskaltzaleak dira, ohi bezala, euskara irakasteko ardura bere gain hartuko dutenak Argentinako hiriburuan. Beste alde batetik, CUI-n --Unibertsitateko Hizkuntza Gunean-- eta Buenos Aires Unibertsitateko Hizkuntza Laboratorioan ere irekiko dira oinarrizko ikastaroak. Kurtso guztiak martxoaren bukaeran eta apirilaren hasieran hasiko dira.
2011/02/25
Emeki-emeki, euskara bere lekutxoa ari da egiten Kaliforniako Unibertsitateak Santa Barbara hirian duen kanpusean. Joan den urtarrilean bertako Euskal Hizkuntza eta Kultura klaseen berri ematen genuen eta 30 bat ikasle ari dira jada euskal munduan sakontzen. Unai Nafarrate da ikastaroaren arduraduna eta Viola B. Miglio, Iberiar Ikasketen saileko irakaslea, ikastaroaren sustatzaile eta koordinatzaile. Euren lana fruitua ematen ari da jada eta joan den asteazkenean, otsailaren 23an, Unibertsitateak euskarari buruzko zenbait ekitaldi egin zituen Ama Hizkuntzaren Nazioarteko Eguna ospatzeko.
2011/02/25
Euskal literaturari buruzko webgune aitzindarietako bat da, zalantzarik gabe, Armiarma.com, eta bere ibilbidean gainera, literatura sarean doan jartzeko ahalegin berezia egin du. Orain, liburu eta irakurgailu elektronikoen iraultza honen karira, webguneak ekarpen berri bat egin die literaturzaleei: sarean jarri ditu literatura unibertsaleko eta euskal literaturako hainbat klasiko, euskaraz, e-pub eta PDF formatoan. Lizardi, Etxepare, Kirikiño, Baudelaire, Shakespeare, Pushkin... zure e-reader-ean izan ditzakezu klik bakar batekin (edo PDFan ordenagailuan).
2011/02/25
Bartzelonako Euskal Etxea Zinemaldia jaialdian buru belarri sartuta dabil egunotan, baina kultur elkartearen martxa ez da sekula gelditzen eta dagoeneko ekitaldi berriak iragarri dituzte datozen asteetarako. Adibidez, datorren astean, martxoaren 4ean, abiatuko den 'Setmana de les dones treballadores' edo Emakume Langileen Astea. Jardueren artean kontzertuak, zinema ('80 egunean' filma eta 'Nagore' dokumentala) eta txangoak Bartzelonan zehar iragarri dituzte.
2011/02/25
Otsailaren 12an hasi ziren Ayacucho herriko 'Euskal Odola'ren 7. urtebetetzeko ospakizunak. Esker-emate meza, biziarteko bazkide berri bat izendatzea, prentsaurrekoa eta afari jendetsua izan dira otsail honetan gauzatu diren ekintza nagusiak. Euskal etxeak gonbidaturik, FEVAk eta udaleko agintariek hartu zuten parte joan den 19an egin zen afarian. Argentinako euskal federazioaren izenean, Ricardo Basterra lehendakaria eta Adriana Hernandorena kidea bertaratu ziren Buenos Aires probintziako herrira. Udalaren izenean, Kultur Zuzendaria den Mirta Martinez-ek lagundu zituen Ayacuchoko euskaldunak euren urteurrenean.
2011/02/25
Berri Txarrak taldearen 'Folklore' kantua "Independent Music Awards" (IMA) nazioarteko sarietan finalista izendatua izan da 'Punk Kanturik Onena'-ren kategorian. IMA sariek, musika independentearen alorrean munduan urtero agertzen diren izen eta gertarakari esanguratsuenak saritzen dituzte. Epaimahaiaren erabakia Martxoaren erdialdean jakinaraziko da. Horrekin batera, ordea, sari horietako publikoaren saria ere erabakitzeke dago. Botoa talde euskaldunari eman nahi badiozu, garaiz zabiltza. Bitartean, Lekunberriko hirukoteak aurrera darrai Hego Amerikan eta Kanadan zehar egiten ari den birarekin.
2011/02/24
Euskal Etxeen arteko lankidetza beti da zoriontzeko moduko gauza eta halaxe behar da aipatu bihar ostiralean Andeen inguruko San Juan hirian, izen bereko probintzia argentinarrean egingo den Eguzkiaren Karrusela festa, bertako Eusko Etxeko gonbiteari baiezkoa emanez Buenos Aires probintziako Chascomuseko 'Zingirako Euskaldunak' Euskal Etxeko hamabost gazte dantzari, dantzan eta danborrada donostiarra jotzen laguntzaile ibiliko baitira Argentinako uda garaian hitzordu garrantzitsu eta arras jendetsu den San Juango Eguzkiaren Festa Nazionalean. Deia euskal partaideak txalotzeko, biharko da, gaueko bederatzietan, San Juanen.
2011/02/24
Euskal Herriko idazle, gogoetagile eta pentsalari talde batek euskal identitateari buruzko hausnarketa publiko bat egingo du gaur eta bihar Azkoitian, Forum Azkoitia izeneko jardunaldietan. Xabier Euzkitze bertsolari eta komunikatzaileak koordinatuta, "ikuspegi politikotik urrundu eta antropologikora hurbiltzen" saiatuko dira. Euskal Diasporaren ikuspuntu eta lekukotasuna ere islatuta egongo da, izan ere Joseba Etxarri Euskalkultura.com-eko zuzendaria tarteko "Euskal Herritik milaka kilometrotara euskal nortasuna nola bizi daitekeen" azalduz. Gainerako hizlariak izango dira: Jon Sarasua ikertzailea, Iñaki Egaña historialaria, Tere Irastortza idazlea, Terexa Lekunberri etnologoa, Andoni Olariaga filosofoa, Hizkuntza Politika sailburuorde izan ziren Patxi Baztarrika eta Ramon Etxezarreta, eta Joxerra Gartzia kazetaria; Azkoitiko alkate Asier Aranbarri eta Gipuzkoako diputatu nagusi Markel Olanorekin batera.
2011/02/24
Euskal hizkuntzaren irakaskuntza euskal etxeetatik kanpo hedatzea pixkanaka zabaltzen ari den joera da eta hiri askotan helburu hori betetzen duten proiektuak garatzen ari dira. Bide hori jarraituz eta Tandilgo 'Gure Etxea'ko Isidro Legarreta lehendakari ohiaren aspaldiko ametsa burutzeko, bertako euskal elkarteak euskara irakasteko proiektua aurkeztu zuen bertako UNCPBA Unibertsitatean eta proposamena martxan dago jadanik Unibertsitateko Hizkuntza Sailean. Aldi berean, euskal etxeko irakasleak 2011ko ikasturtea antolatzen ari dira. Aurten bost taldek jasoko dituzte eskolak 'Gure Etxea'ko egoitzan.
2011/02/24
Hasi dira munduko euskal etxeak Korrika 17ri ongi etorria egiteko hainbat ekitaldi antolatzen. Berlinen, adibidez, euskal elkartea jai itzela ari da prestatzen, Anari euskal kantariaren kontzertu batekin. Ondoren Lucha Amada DJ-ak goizaldeko ordu txikiak arte dantzan jarriko ditu Berlingo euskaltzaleak. Martxoaren 5ean izango da jaia. Ondoren, apirilaren 9an, Korrika Eguna egingo dute euskal etxeko kide eta lagunek, Berlingo kaleetan zehar lasterketa txiki bat antolatuz.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
