euskal diaspora eta kultura
2007/04/06
Euskal Herriko gehienek bezala, Aste Santuko bost opor egunok hartuko ditugu aurtengoan BasqueHeritage.com-en (azkenean lau baizik ez). Ez da opor kontuetan Euskal Herri osoan gauza bera gertatzen, Hego Euskal Herrian bost egun baitira, eta Iparraldean asteburua eta Bazko astelehena baizik ez. Bulego nagusia Donostian dugunez, ordea, bertako legeari segitu eta datorren asteartean eutsiko diogu irakurleekin daukagun hitzorduari. Astia emango digu horrek Diasporako zenbait Aberri Egun deialdiekin bat egiteko eta astelehenean ere Sarako Idazleen Biltzarrean egoteko. Ongi pasa egunok.2007/04/05
Aberri Eguneko ekitaldiak hasiak dira jada Argentinan eta lagun eta bazkideak bildu dituen elkarte goiztiarrena Cañuelaseko Denak Bat Euskal Etxea izan da. Hasiberriak dira Cañuelasekoak Aberri Eguna ospatze kontuetan, aurtengoa izan baita euren lehen aldia, baina ezin ukatu gogotsu hasi direla, probintziako dantzariak bildu zituen topaketa egin baitzuten Aberri Eguna ospatzeko. Topaketa joan den asteburuan zehar egin zuten eta inguruetako zazpi euskal etxeetako dantza taldeak bildu zituzten bertan, Cañuelasekoaz gain, giro paregabean.
2007/04/05
Emakumeen Futboleko Euskal Selekzioak lagunarteko partidu bat jokatuko du bihar Argentinaren aurka, Buenos Aireseko Defensores de Belgrano estadioan. Jokalariak jadanik Argentinan daude partidua izango den zelai berdinean entrenatzen. Partida hau iaz Irungo Stadium Gal-ean (Gipuzkoa) jokatu zutenaren buelta izango da. Bertan talde argentinarra atera zen garaile 2-4ko emaitzarekin. Larunbatean euskaldunak Buenos Aireseko euskal komunitateko multzo batekin bilduko dira.
2007/04/04
Europa eta Ameriketako euskal etxe ugarik, eta baita urrunagoko elkarte batzuk ere --Australia eta Shanghaiko euskal etxeek adibidez-- Aberri Eguna ospatzeko deia luzatu diete jada euren bazkide eta lagunei. Diasporan jarraipen handia izan ohi duen jaia da hau eta munduan dauden euskal etxeetako gehienek ekitaldiren bat edo beste egingo dutela esan daiteke. Gehienak asteburu honetan bertan izango dira, Berpizkunde Igandearekin bat --aurten apirilaren 8a--, baina beste batzuk, Txileko Santiagokoak eta Argentina edo Uruguaiko beste hainbat tartean, astebete atzeratuko dituzte ospakizunak. Artikulu honetan deialdion berri ematen dugu.
2007/04/04
Donibane Garaziko Herriko Etxeak Euskal Argentina elkartearen Urteroko Bilkura hartu zuen martxoaren 25ean. Bertan urtean zehar egindako ekitaldien berri eman eta 2007rako planak ezagutzera eman zuten elkarteko arduradunek. 120 lagun bildu ziren elgarreratze honetara eta besteak beste, zuzendaritzako hiru kide berri aukeratu ahal izan zituzten. Datozen ekimenen artean urtero elkarteak Argentinako Euskal Astera egiten duen bidaia eta elkartearen 10. urteurrenaren ospakizuna egongo dira, azken hau hilaren 28ean Donibane ondoko Donazaharren.
2007/04/04
Artista da José C. Paz herri argentinarreko Toki Eder euskal etxeko lehendakari hautatu berria duten Horacio Marotto, eta urteak daramatza afixak eta bestelakoak diseinatzen. Berak eginiko lanek behin baino gehiagotan iragarri izan dituzte hango eta hemengo euskara klaseak eta, oro har, Argentinako euskal ekintzak. Toki Eder-eko presidente hautatu berria izanak ez dio aitzekirik eman bere Euskal Etxeak 2007rako antolatzen dituen ekintzen afixak ez egiteko eta aurtengoan ere berak sortutako lanak dira José C. Paz-eko herritarrei euskal ekintzetara ingura daitezen gonbitea luzatzen diena [Bere estiloa gustatzen bazaizu bederen, zergatik ez berari enkargatu zure erakundeak, Diasporan edo Euskal Herrian, egin behar duen hurrengo ekitaldiaren kartela?]
2007/04/03
Pablo Malo zuzendari donostiarraren 'La sombra de nadie' filmearen emanaldiak itxi zuen joan den ostiralean Manhattanen hiru egunez egin den Basque Film and Media Arts Festival, Euskal Zinema jaialdia. Euskal zine zuzendari eta ekoizleek bilerak eta topaketak egin dituzte New Yorkeko industria independentearen kideekin eta hainbat hitzarmen eta lankidetza adostu dituzte.
2007/04/02
Iruñeko helmugara iritsi zen atzo Korrika 15, Euskal Herrian zehar hamar egun eta 2.360 kilometroko ibilbidea egin ondoren. Euria eta hotza izan dira nagusi bidean, baina Iruñeko helmugan 20.000 euskaltzaleen berotasuna zuen zain AEK-k antolaturiko lasterketak, euskararen aldeko eskabidea ozen eta argi egiteko. Iruñean ez ezik, munduko hainbat bazter eta txokotan ere izan du oihartzuna Korrika 15-ek eta Shanghai (Txina), Mar del Plata (Argentina) edo Madril eta Bartzelonak ere euren Korrika propioa izan dute.
2007/04/02
Andres Urdaneta apaiz, itsasgizon eta esploratzailea jaio zeneko 500. urteurrenaren ekitaldien prestaketak aurrera darrai bere jaioterrian, Gipuzkoako Ordizian. Herriko Udalak hainbat ekitaldi prestatu ditu eta horien artean garrantzi berezikoa da datorren urtean burutuko den nabigatzailearen inguruko Nazioarteko Kongresua. Ordiziako kultur arduradunek ahaztu samarra dagoen pertsonaiaren irudia berreskuratu eta gaurkotu nahiko lukete.
2007/04/02
Argitalpena Gaztetxulo deitzetik Gaztezulo deitzera pasatuko da. Aldaketak baina aldizkariaren beste alorretan ere eragina izango du, hala nola, teknologia eta zerbitzu berriek arreta handiagoa jasoko dute bere orrialdeetan, eta nazioarteari irekiagoa egongo da hemendik aurrera. Bihar egingo dute Bilbon eraldaketa ospatzeko arduradunek antolatu duten festa. Gainera, maiatzaren 1ean, sareratzeko jauzia emango du Gaztezulok.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
