euskal diaspora eta kultura
2007/05/07
Eguraldiak batere lagundu ez bazuen ere, Uruguaiko Colonia departamenduko Carmelo herriak aurrera egin zuen 'Eusko Jaia' izeneko euskal-uruguaiar deialdi nazionalaren hirugarren edizioarekin. FIVU (Federación de Instituciones Vasco Uruguayas) erakundeak urtero kide dituen euskal etxeen arteko batekin batera antolatua, aurtengoan bertako euskal dantzariak, Argentinakoak, artista folk uruguaiarrak eta beste zenbait osagai izan ditu, tartean zine eta kultura emanaldiak, aire zabaleko ekitaldietako batzuk, euriagatik, herriko Uama antzokira pasatu behar izan zirelarik.
2007/05/07
Lima hiriburutik, Peruko euskaldunak eta bertako Euskal Etxea Gernikako Bonbardaketaren 70. urteurrenarekin bat egin eta dei berezia luzatu zuten. EEko lehendakariorde Raúl Noblecilla hizlari, , bonbardaketa egunean Gernikan egon zen Ion Guarrotxena bazkideak 'Gernika Bakearen alde' agiria irakurri zuen, Gernikako Arbola kantatuz amatu zen ekitaldian. Bertako prentsak, hala nola 'El Comercio' eta 'Correo' egunkariek, urteurrena islatu zuren euren orrialdeetan.
2007/05/05
Euskal Herrian Venezuelako Diasporan jaio eta bizitako euskaldun ugari daude eta urtero urtero batu egiten dira Simón Bolívar Euskal Venezuelar elkarteak antolatzen duen Topaketan. Aurtengoa hamabigarrena izan da eta Galdakao egin zen ohi bezala, apirilaren 14ean. Ehundik gora lagun, gazte, haur eta familia bildu ziren ekitaldira eta une hunkigarriak bizi izan ziren, hamabi topaketa hauek antolatu dituzten kideei eginiko omenaldia kasu.
2007/05/05
Rosarioko Euskal Etxeak Gernikako bonbardaketaren biktimei omenaldi berezia egin zien joan den apirilaren 26ean, gertaeren 70 urteurrena betetzen zen egunean bertan. Euskal Etxeko kide eta zuzendariak eta Rosarioko agintariak bilduta 'Euskararen oihua' izeneko eskultura inauguratu zuten. Artelan hau Gernikako Arbola zaharraren enbor zati batekin egina da eta bonbardaketaren biktimen minaren ikurra eta gerraren aurkako irudi izango da aurrerantzean Rosarion.
2007/05/04
Mexikoko baztandar familia eta lagun talde mardul bat Euskal Etxean bildu ziren joan den asteartean, maiatzaren lehenean, 2007ko Baztango Eguna ospatzeko. Jai honen laugarren edizioa izan zen eta urtetik urtera baztandarren bilkura gero eta jantziago eta finkatuago dagoela erakutsi zuen. Aurtengo elkarretaratzeak berrehun bat pertsona bildu zituen, Xarnege talde euskal gaskoiak bere musikarekin alaitutako arratsalde gozoa eta guzti.
2007/05/04
La Platako Bakearen Lorategia izan zen Euzko Etxea elkarteak Gernikako bonbardaketa gogora ekartzeko aukeratu zuen lekua joan den larunbatean. Bonbardaketaren 70 urteurrena dela eta Euskal Etxeak Gernikako Arbolaren kimu bat landatu zuen bertan, bakearen ikur bezala. Gauean euskal elkarteko kideak bertako egoitzan bildu eta Aberri Eguna ospatu zuten, Euzko Etxeak euskararekin duen konpromezua berrituz.
2007/05/03
Sao Pauloko Eusko Alkartasuna Euskal Etxeak bat egingo du datorren igandetik aurrera Gernikako bonbardaketaren oroimenezko ekitaldiekin, erasoaren 70 urteurrena betetzen den honetan. Euskal elkarte brasildarrak ekitaldi egitarau mardula prestatu du, mintzaldi, mahai inguru eta zine emanaldiekin. Oroitzapen eta hausnarketa ekintza hauek hilaren 20an bukatuko dira, Aberri Egunaren ospakizunarekin.
2007/05/03
Gernikako Arbolaren hazi batetik jaiotako haritz kimu baten landaketa eta The Mark of Men: Survivors' Memories of the Bombing of Gernika dokumentalaren emanaldia izan ziren Estatu Batuetako Oregon estatuko Ontario Basque Clubek Gernikaren bonbardaketaren 70. urteurrenean antolatutako ekitaldien gakoa. Euskal Etxe estatubatuarrak bakearen aldeko eguna bizi izan zuen horrela. 'Euskaldun gehienek --eta guk, euskal amerikar lehengusuek ere-- Euskal Herrian konponbidea eta bake iraunkorra lortzeko esperantza mantentzen dugu', esan zuten elkarteko kideek.
2007/05/02
Egoitza ofiziala Izuran (Baxenabarre) duen Euskal Argentina elkarteak bete berriak ditu bere lehenengo hamar urteak eta kari hortara egun berezi bat antolatu zuen joan den larunbatean Donazaharren, ehundik gora lagun partaide. Ekitaldiak arratsaldeko lauetan hasi ziren Donazaharreko Mendy ostatuan, elkartearen hamar urteotako irudiak biltzen zituen erakusketa baten irekierarekin. Jarraian, zazpiak aldera, afaria egin zen ostatuan bertan, eta bederatziak aldera hitzordua herriko elizara pasatu zen, parropian aritu baitzen, Lapurdiko kostaldetik etorria, 'Sueño Milonga' talde instrumentala, Filipe de Ezcurra bandoleonjolea zuzendari, Argentina eta Río de La Plata aldeko aire eta doinuak maisutasunaz eskaintzen.
2007/05/02
Erakundearen araudiak dioenari segituz, Buenos Aires probintzia argentinarreko Cañuelas herriko 'Denak Bat' Euskal Etxeak bere Zuzendaritza Batzordeko kideak berritzeko pausoak eman ditu, 2007. urteko ekitaldirako agintariak hautatu. Euskal Etxeak berak plazaratu duen idazki batean azaltzen duenez, Margarita Teresa Mathieu izango da beste agintaldi batez 'Denak Bat'eko lehendakari, Francisco Javier Sancholuz lehendakariorde, Verónica Zulaica idazkari eta Jorge Juan Iraola diruzain, beste zenbait kargu berrituren artean.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
