euskal diaspora eta kultura
2007/05/10
'Patrimonio Tresarroyense' edo 'Ondare tresarroyostarra' saria emateko ideia 2004an sortu zen, anonimotasunean eta ezagunak izan gabe herriko kulturaren edo ongizatearen alde lan egiten duten pertsonei omenaldia egiteko. 'Ohartu ginen jende asko dagoela gizartearen toki desberdinetatik ingurukoen eta komunitatearen alde gogor ari dena lanean. Gure asmoa pertsona horiei errekonozimendua eskaintzea, euren ekarpen solidarioa eta gure herriaren alde egiten duten lana sarituz', azaltzen du José Luis Artuch, Hiru Erreka Euskal Etxeko lehendakariak. Aurten, Euskal Etxean jaio baina Tres Arroyos osorako den sari honek herriko bost bizilagun saritu ditu: Miguel Ángel Sandez, Claudia Adelina Cinalli, Miguel Zotarelli, Honorino Pellitero eta Mirta Bertide. Agian beste euskal etxe batzuk bilduko dute idea euren komunitateetara egokitzeko.
2007/05/10
Segitzen dute iristen gure erredakziora mundu osoan zehar hamaika euskal etxek Gernikako bonbardaketaren 70. urteurrenarekin bat antolatutako ekitaldien berriak. Argentinakoak dira honako biak: Pergamino hirian, 'Lagun Onak' Euskal Etxearen eskutik, meza eta ekitaldi nagusi bat egin ziren, azken hau Merced Plazan, Gernikako Haritzaren kimuaren aurrean, alkatea eta Euskal Etxeko zuzendariak bertan zirela. José C. Paz herrian, berriz, 'Toki Eder' Euskal Etxeko bazkide batek Picassoren 'Guernica'z eginiko erreprodukzio bat inauguratu zen.
2007/05/09
Euskarazko hitz horietxekin zoriondu zuten Nevadako Estatu Batzarreko kideek Renoko Unibertsitateko Euskal Ikasketa Zentrua-Center for Basque Studies bere 40. urteurrenean. Zentruko ordezkari taldea izan zen Estatu Batzarraren asteleheneko bilkuran, eta Gloria Totoricaguena CBSko zuzendariak hartu zuen errekonozimendua jasotzen zuen ebazpena. Alta, Totoricaguenak William A. Douglass-i, CBSren sortzaileari, pasa zion dokumentua, Douglassek zentruaren sorreran eta garapenean izan duen garrantzia aitortuz.
2007/05/09
Nafarroako Artaxoa herrian astebeteko kultur ekitaldiak egiten ari dira egunotan, Jimeno Jurio Sarien 3. edizioa dela eta. Sari hauek Artaxoan jaiotako Jose Maria Jimeno Jurio etnografo eta historialariaren omenez antolatuak izan dira, eta aurtengoa Juan Antonio Urbeltz dantza aditu eta antropologoak jasoko du. Sariak Artaxoako udaletxeak eta Nabarralde aldizkariak sortu dituzte, besteak beste, Artaxoa eta Nafarroako kultura, historia, hizkuntza edota tradizioaren alde lan egin duten pertsonak omentzeko.
2007/05/09
Arrakastaz bukatu zen apirilaren 27an 'Euskal Aztarna Argentinan' erakusketak Eusketxen, Buenos Aireseko Eusko Kultur Etxean, eman duen denbora tartea. Apiril osoan izan da ikusgai Argentinako euskaldunen historian zehar eginiko ibilbide sakona eta hunkigarria eskaintzen duen erakusketa. Eusketxek, gainera, mintzaldi eta ekitaldi osagarriak antolatu ditu erakusketa dela eta. Horietako bat Maria Elena Etcheverryk eman zuen mintzaldia. Bertan, abesti eta poesiak oinarri hartuta Argentinako euskaldunek sentitzen zuten herrimina aztertu zuen.
2007/05/08
Euskal Gizataldeen IV. Mundu Biltzarrera deitu du datorren uztailaren 9tik 13ra Bilbon Eusko Jaurlaritzak. Biltzar hau lau urtean behin legeak hala finkaturik egiten den elkarretaratzea da eta Jaurlaritzaren aurrean ofizialki erregistratuta dauden mundu osoko euskal etxeetako ordezkariak biltzen ditu. 160 dira gaur egun izaera horretan dauden etxeak. 'Zubigintza' da aurtengorako hautatu den eslogana, 'gizabanakoen, elkarteen, enpresen eta gobernuen arteko komunikazio era berriak irekitzeko eta bultzatzeko', 'Euskal Herriaren eta bere diasporaren arteko lotura sendotu' eta 'norabide askotako zubiak' eraikitzeko. Behin-behineko programa ekarri dugu hona.
2007/05/08
Etzi osteguna bukatuko da datorren uztailaren 9tik 13ra Bilbon egingo den Euskal Gizataldeen IV. Mundu Biltzarrerako partaidetza agiriak aurkezteko epea, Eusko Jaurlaritzatik adierazi denez. Euskal Etxerik duen herrialde bakoitzak hiruna ordezkari bidaltzeko eskubidea dauka. Ordezkariek, gonbidatuek eta laguntzaile gisa parte hartu nahi dutenek euren datuak bidali behar dituzte e-mailez heldu den osteguna baino lehen. Eskabidea, jarraipideak eta loturak, artikulu honen hondarrean.
2007/05/08
Atzo itxi zituen ateak Buenos Aireseko XXXIII. Liburu Azokak. Argentinako euskal komunitateak Gernikako bonbardaketan hil eta zauritutako biktimak gogora ekarriz hitzaldia eskaini zuen bere baitan apirilaren 27an. Berrehun bat lagun bildu ziren eta Aitor Alava dantzariak aurresku bat dantzatu zuen Gernikan hildakoen omenez. Ondotik Teresa de Zavaleta irakasle eta Euskaltzaleak elkarteko lehendakariak mintzaldia eskaini zuen, gertakariak azalduz.
2007/05/08
Mundu osoko hainbat lekutako hamaika Euskal Etxeen antzera Mar del Platako Denak Bat Euskal Etxeak Gernikako bonbardaketaren 70. urteurrena gogoratu zuen, astebeteko ekitaldi egitarau batekin. Astean zehar gertakariaren historiaren inguruko ikastaro eta mintzaldiak izan ziren entzungai Mar del Platako Euskal Etxean. Ekitaldi nagusia apirilaren 26an Gernikako Arbolaren kimuaren aurrean eginiko omenaldia izan zen.
2007/05/07
Estatu Batuetan artzain ibilitako sunbildarrek euren 21. elkarretaratzea egin dute joan den asteartean, egun osoko elkarretaratzea egin ere, urtero bezala deialdia goizetik hasi baitzen --meza batekin bertako parrokian--, bazkari batekin segitu herriko Ulibeltzak elkartean, eta arratsaldez jarraitu baitzuen, ohiko bisita mendi aldera eta afaria berriz ere Ulibeltzak-en eginez. Hogeita hamabi 'amerikano' bildu ziren bertara, garai batean Bidasoaldean --eta Euskal Herriko beste hainbat eskualdetan-- oso garrantzitsua izan zen Ameriketarako emigrazioaren lekuko bizidun, ez baita ahantzi behar Euskal Herria emigranteen herria izan dela duela oso denbora gutxi arte.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
