euskal diaspora eta kultura
2007/05/15
Buenos Aireseko Iparraldeko Euskal Etxeak bat egin zuen joan den larunbatean, Euskal Herrian igandez ospatu zen Herri Urrats ikastolen aldeko hitzorduarekin. Urtero Senperen egiten den jai euskaltzalearen bertsio porteñoa hiriburu federaleko Moreno kaleko euskal egoitzan egin zen eta bertara bildu ziren euskara ikasleak, Buenos Airesko zenbait euskal erakundetako lagun eta kideak eta, oro har, euskara eta euskal kulturaren inguruan mugitzen den hainbat jende. Egitarauak euskarazko jokoak, dantzak eta jolasak baitaratu zituen, guztia geure hizkuntzaren aldeko kontzientzia eta engaiamendu giroak bultzatuta.
2007/05/14
Ostegun honetan Tolosan (Gipuzkoa) Euskal Herriko II. Internet Eguna egingo dute, Internet&Euskadi elkarteak, Eusko Jaurlaritzak eta KZguneak antolatuta, besteak beste. Jaiaren helburua euskal hiritarrak interneten mundura erakarri eta teknologia berriek eskaintzen dituzten tresnak erabiltzen eta profitatzen ikastea da. Aurten, gainera, antolatzaileek Diasporaren parte hartzea bultzatu nahi dute eta horregatik mundu osoko euskal internetzaleei --'birtualki' bada ere-- Tolosan egoteko gonbitea luzatu diete, bideokonferentzia bidez hitzegin edota online jokoetan aritzeko.
2007/05/14
Eusko Jaurlaritzak 2007an Euskal Etxeak dauden lekuetan bira kulturalak egiteko diru laguntza jasoko duten taldeen zerrenda ezagutzera eman du. Hamaika talde eta artistak jaso dituzte eta euren lanari esker bira kultural hauek Argentina, Uruguai, Estatu Batuak, Venezuela, Italia eta Kolonbia bezalako herrialdetara helduko dira. Onuradunen artean, pianojoleak, kantariak, antzerkilariak, txistulariak, trikitilariak, abesbatzak... alegia, Betagarri bezalako taldeak, Arkaitz Mendoza edo Victoria Aja solistak, Patxo Telleria eta Mikel Martinez antzezle-bikotea edo Juan Mari Beltran musikaria.
2007/05/14
Rosarioko 'Zazpirak Bat' Euskal Etxe argentinarrak aurten hiri horretan egingo den Euskal Argentinar Aste Nazionalaren jakingarrietako batzuk aurreratu ditu, horien artean hitzorduaren data zehatzak, urriaren 1etik 7ra hain zuzen. Erakunde euskal rosarioarrak Ibarretxe lehendakaria bertan egongo denaren konfidantzan ari dela lanean adierazi du eta, besteak beste, bi erakusketa, erromeriak, folklore erakustaldiak eta datozen aste eta hilabeteotan aletzen joango den beste hainbat ekimen iragarri ditu, Argentinako zein Euskal Herriko euskal taldeak partaide.
2007/05/14
Segitzen dute iristen gure erredakziora munduko hainbat euskal etxeetan Gernikako Bonbardaketaren 70. urteurrena dela-eta eginiko ekitaldien oihartzunak. Argentinako Tandil-en kasuan, ekitaldiak urteurrenaren egunean gauzatu ziren, eta 'Gernika bakearen alde' agiria irakurri eta omenaldia egin zitzaion Gernikakotik bizirik irten zen Tandilgo EEko buruzagi Roberto Lejarretari. Uruguaiko Salton, ostera, kultur aste bati ekin zitzaion eta hitzaldiak eskaini zituzten Roberto Zunini y Ana María Sciandro irakasleek.
2007/05/12
Lapurdiko Senpere herriak beste behin hartuko du Herri Urrats, Iparraldeko ikastolen jaia, joan den astean izandako uholde larriek eragin dituzten kalte eta hondamendiari aurre eginez. Zazpi herrialdeetatik heldutako euskaldunek bat egingo dute jaiarekin eta bildutako dirua ikastolen elkartearentzat eta zati bat uholdeek kaltetuentzako izango da. Diasporan, Buenos Aireseko Iparraldeko Etxeak gaur bertan egingo du jaia eta datozen asteetan Pariseko Eskual Etxea eta Mar del Platakoa ere bilduko dira.
2007/05/12
Aurrera darrai Brasilgo Sao Paulon, bertako Euskal Etxeak antolaturik Gernikako Bonbardaketaren 70. urteurrenaren karietara garatzen ari den kultura asteak. Gaurkoan 'Emakumeak gerletan: gogoeta bat' izeneko mahai-inguruaren txanda izango da, eta ondotik 'Libertarias' filmea ikusi ahal izango da. Biharkoan, dokumental eta mahai-inguru berri bati ekingo zaie. 1936ko gerlari buruzko testigantzak eta zenbait proiekzio eta debate biltzen dituen programa hau datorren asteko asteburuan amaituko da, Julio Medemen 'Euskal Pilota' emanez larunbatean, eta Aberri Egunaren jaia eginez igandean.
2007/05/11
Berdintasun politika, emakumeen lidergoa eta bake prozesua izango dira Izaskun Bilbao Eusko Legebiltzarreko presidenteak Argentina, Paraguai eta Txilera gaur hasiko duen bidaiaren ardatzak.
Hamaika eguneko iraupena izango du birak eta Bilbaok gai horiei buruzko mintzaldiak eman eta bilerak egingo ditu. Euskal komunitateekin ere bilduko da eta bidaia bukaeran Michele Bachelet Txileko lehendakariaren gonbidatua izango da Iquiqueko Itsas Guduaren urteurren ekitaldian.
2007/05/11
Boiseko Ikastolak, 'Euskal Herritik kanpo murgiltze sistemari jarraiki euskara hutsean klaseak ematen dituen eskolaurreko zentru bakarrak', bere irakasle taldeko kide izan nahi duten hezitzaileei zuzenduriko lanpostu eskaintza argitaratu du. Lanpostua lanaldi osokoa da, 40 ordu astero, datorren abuztutik hasita 2008 ekainerarte. Interesatuek Mara Davies Boiseko Ikastolako zuzendariari bidali behar diote kurrikuluma.
2007/05/11
Pare bat aste ez dira orrialde hauexetan aipatu genuela Arrecifeseko Euskal Etxe argentinarrean apirilaren 21ean egin zuten Batzar Nagusia 2006ko txostena eta kontuak onartu eta bertako Zuzendaritza Batzordearen zati bat berritzearren. Bilkuraren ondotik, afari herrikoi batek agertokia ipini zien Aberri Eguneko ospakizunei (ikus hemen ). Hona Buenos Aires probintziako herri honen Zuzendaritza Batzorde berria osatzen dutenen izenak.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
