euskal diaspora eta kultura
2007/07/11
Surik izeki ez zuten arren, musikak, janariak eta irudimenak ehun bat lagun bildu zituen Buenos Aireseko Iparraldeko Etxean akelarrearen inguruan. Guztia goitik behera oihal ilun, puxika beltz eta paperezko sagu zahar eta Aker erraldoi batekin apaindu zuten. Hau gutxi balitz, zurrakapote izeneko edabe 'magiko' bat ere banatu zuten bertaratutako sorgin eta aztien artean. Ikusitakoak ikusirik, inor ez dadila harritu Buenos Aireseko zeru goietan sorginen bat irrintzika ikusten badu.
2007/07/10
Guggenheim Museoan eginiko ekitaldi batek abiarazi zuen atzo Bilbon Europa, Amerika eta Australiako 18 estatutako euskal etxeetako ordezkariek datorren ostiralera arte garatuko duten IV Mundu Biltzarra. Ibarretxe buru zela eginiko irekiera saioak urteurrena ospatzen zuten munduko bost euskal etxe omendu zituen lehenik: AEBetako Gooding (25 urte) eta San Frantzisko (25), Madril (25), Paris (50) eta Mexiko (100 urte). Hitzaren aldetik, Iñaki Agirreren aurkezpen hitzek Ibarretxe lehendariaren ongi-etorri hitzaldiari eta Gloria Totoricaguenaren hitzaldi gogoetatsu eta aholkuz beterikoari eman zioten tokia. Amaia Zubiria kantariaren saio txiki batekin amaitu zen Euskal Gizataldeen IV. Munduko Bitzarraren inaugurazioa markatu zuen atzoko ekitaldia.
2007/07/10
Joan den apirilaren 12an hasita, Euskal Kultura ikastaroak eman ditu Mar del Platako Euskal Etxeak, astean bitan. Azken klasea uztailaren 5ean izan zen eta ikasle zein irakasleek ekimenaren balorazio oso ona egin dute. 'Berrogei bat lagunek parte hartu duten klaseetan: euskal etxeko kideak, zuzendaritza batzordekoak, dantzariak, euskara ikasleak...', azaldu dio BasqueHeritage.com-i Verónica Domingok, ikastaroko arduradunak. Ikastaroaren helburua euskal kultura zabaltzea izaki, arduradunek klaseetan emandako ikasgaiak eta apunteak interesa duen edonori e-mailez bidaltzeko eskaintza egin dute. Apunteak eskatzeko, e-maila bidali hona .
2007/07/09
Berrehun bat pertsona --tartean zenbait dozena amerikano-- bildu ziren atzo goizetik Bidarraira Frederic Fuldain euskal amerikarrari eskainitako omenaldira. Bidarrai bereko Herriko Etxea, Euskal Kultur Erakundea (EKE), San Franciscoko Euskaldunak eta herriko Otxaldetarrak elkartea antolatzaile, omenaldi xinple bezain polita izan zen, lagunek lagunari eginikoa. Bertan zirenetako batzuk egun bereko bigarren saio batean ere parte hartu zuten, Bidarraikoaren ondotik Bilbora mugitu baitziren arratsaldez, gaur gauean hasiko den Euskal Gizataldeen IV. Mundu Biltzarrean parte hartzeko.
2007/07/09
Euskal Herriko Unibertsitateak (UPV-EHU) Ikerketa Masterrak edo Doktorego Programak egin nahi dituzten ikasleentzako laguntza deialdia argitaratu du. Euskal Autonomi Erkidegoko zein atzerriko ikasleek eskatu dezakete laguntza hau. Master eta Doktorego Programa bakoitzeko bost laguntza emango dituzte eta laguntzak bi motatakoak izango dira: urtean 3.000 eurotako laguntza Euskadin bizi diren ikasleentzat; eta 4.500 euro urtean atzerriko ikasleentzat. Laguntzak eskatzeko epea uztailaren 30ean itxiko da.
2007/07/07
Ehunda berrogeita hamar bat pertsonek hartuko dute parte astelehenetik aurrera Bilbon, Euskalduna Jauregian eta ostiralera arte egingo den Euskal Gizataldeen IV Mundu Biltzarrean. 'Zubigintzan' da lau urtean behin antolatzen den bilkura honen aurtengo edizioaren eslogana. Honako herrialdeetako ordezkariak bilduko dira Bilbora: Argentina, Australia, Brasil, Kanada, Kolonbia, Kuba, Txile, El Salvador, Espainia, Estatu Batuak, Frantzia, Italia, Mexiko, Peru, Erresuma Batua, Dominikar Errepublika, Uruguai eta Venezuela.
2007/07/07
Igande arratsaldez hasiko dira Bilboko hotelera heltzen Euskal Gizataldeen IV. Mundu Biltzarrean parte hartu behar duten ordezkari eta kongresistak. Bilkurako egitarauak Euskal Herriko leku ikusgarri batzuetarako bisitak baitaratu ditu bilera eta ekitaldi trinko bati uztartuta. Astelehenean, Lehendakaria bertan dela, irekiera ekitaldia egingo da Guggenheimen eta Ibarretxek berak eskainiko dio azkeneko egunean, Ajuria-Enean, Biltzarrari amaiera formala emateko inguru egokia. Bi egun horien artean, egitarau osatua. Hona, azken orduko aldaketa txiki batzuk erantsita, lerro hauek idazterakoan indarrean dagoen programa.
2007/07/07
Euskal Herriko gazteen nahiak, kezkak, joerak eta bizimodua ezagutu nahi dituenak badu leiho zabal eta gardena Gaztezulo.com-en. Duela zazpi urte Donostia aldeko Irutxulo aldizkariko gehigarri gisa sortu zenak erronka berriak lantzeari ekin dio. Apirilaz geroztik garai berri bati hasiera eman zioten paperezko aldizkaria berritu eta web gune oso bat kaleratuz. Paperezko aldizkariari dagokionez, 6.500 harpidedun dauzkate eta hilabetero orotara 10.500 bat ale inguru banatzen dituzte. Orain, webgunea jadanik plazan, Euskal Herri geografikoko gazteengana ez ezik, mundu osoko gazte euskaldunengana iritsi nahi dute Gaztezulokoek. Horregatik euren mezua: 'bisita ezazu gure webgunea'.
2007/07/06
San Fermin da doaike munduko nafar etxeek urtean zehar antolatzen dituzten besten artean ospatuena. Munduko euskal etxeetara biltzen diren nafarrek ere ospatzen dute, Estatu Batuetan esaterako Elkon, non bertako lesakarrek, Basque Clubeko gainerako bazkideekin batera, entzierroa eta guzti korritzen duten. Historikoki, AEBetako Mendebaldera iritsitako emigrazio nafarra euskal etxeen inguruan antolatu izan da. San Franciscoko Euskal Etxeko nafarrak, adibidez, zurigorriz jantziko dira heldu den asteburuan eta 'sanfermin giroko poteoa' iragarri dute hiri kaliforniarrean. Beste toki batzuetan, hala nola Argentinan, Txilen eta espainiar estatuko hiri batzuetan, nafar etxeek gogor ekingo diote besta ospatzeari.
2007/07/06
Momentu bereziak biziko dira hain segur heldu den igandean Bidarrain, bertako Herriko Etxeak, Euskal Kultur Erakundearekin (EKE), San Franciscoko Euskaldunekin eta Bidarraiko Otxaldetarrak batasunarekin bateginik, Frederic Fuldain herriko semeari eginen dioten omenaldian. Iaz San Franciscon hil zen Fuldain gazterik joan zen AEBetara --Bakersfieldera eta fitexko San Franciscora-- eta lan ederra egin zuen Kalifornian San Frantziskoko euskal komunitatearen eta Euskal Etxearen alde. Omenaldiko partaideetako multxo bat Ameriketatik etorriak izanen dira, Frederic lagunaren ohoratzeko.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
