euskal diaspora eta kultura
2007/09/11
Etienne Rousseau-Plotto historialari eta musikari baionarra da. «Stravinsky Biarritzen» ondoren, «Ravel, euskal jatorriak» liburua argitaratu zuen 2004an. Andoni Agirre 23 urteko pianista baionar gaztea da. Lucien Alfonso biolin-jotzailearekin, Ravelen gutun eta konposizioetan oinarritutako kontzertua sortu du. Musikari ziburutarra zendu zela 70 urte bete diren urte honetan, hainbat omenaldi biltzen ari da han-hemenka Ravel, baita 'Musika euskal kostaldean' jaialdiarena ere. Eneritz Zabaletak egin die gaiaz elkarrizketa Garan Etienne Rousseau-Plotto eta Andoni Agirreri.
2007/09/11
Biak Argentinan bertan, baina mila kilometroko tartearekin, amankomunean daukate euren bizilagun eta herritarrek 'Miss Atsegin' hautatu dituztela San Luis probintziako Villa Mercedeseko Immigrantearen Eguneko lehiaketan, eta Entre Ríos probintziako Concordiako bere parekoan, hurrenez hurren. Noelia Diaz Etxepare eta Gimena de Ibarra dira euren izenak, eta biak ohore handitzat hartu dute honelako agertoki batean euren euskal etxeko eta euskal gizataldeko ordezkari izatea, soin gaineko xingolan 'Euskal Herria' eramanez.
2007/09/11
Puerto Ricoko Euskal Etxeak Juan Jose Ibarretxeren bisita jaso zuen joan den asteburuan eta elkarteko kideak oso pozik agertu dira, hauxe baita lehendakari batek herri karibear honetara egiten duen lehen bidaia. Lehendakaria euskal komunitatearekin bildu zen eta euren bizimodu eta egoerari buruzko galderak egin zizkien hango euskaldun eta euskaldunen ondorengoei. Lehenago Ibarretxe Dominikar Errepublikan izan zen eta bilerak egin zituen bertako agintariekin eta euskaldunekin ere.
2007/09/10
Kanpo Harremanen arloan eta Mexiko, Txile, Argentina, Venezuela eta AEBtako Euskadiko ordezkaritzetan lan egin nahi duten gazteek aukera polita dute Jaurlaritzak aurkeztu duen espezializazio beken deialdi honetan. Sei beka dira guztira. Horietako bat Gasteizeko Kanpo Harremanetako Idazkaritza Nagusian bete beharrekoa da eta beste bostak Eusko Jaurlaritzak Mexikon, Txilen, Argentinan, Venezuelan eta AEBtan dituen ordezkaritzetan. Eskaerak aurkezteko epea urriaren 4ean itxiko da.
2007/09/10
Christopher Bengochea tenore euskalamerikarrak azkenengo sasoina izango du aurtengoa San Jose Operan, Kalifornian. Arrakasta nabarmena izan du bertan azken bi urteetan, Romeo edota 'Lucía de Lamermoor'-eko Edgardo bezalako pertsonaia erromantikoekin; baina kantari bezala proiektu berriei ekiteko garaia dela uste du. Nafarroa Behereko euskaldunen semea, Bengochea Montanako arrantxu batean hazi zen, euskal musika entzunez. Opera munduan urtetan ikasi eta ibili ondoren, euskal arrastoa nabaritzen zaio kantari gustukoena aukeratzerakoan: Erramun Martikorena, jarraian laburbiltzen dugun Mercury News egunkariko artikulu batean azaltzen duenez.
2007/09/10
Ia laurehun jende bildu ziren Viña del Mar hiri txiletarreko Arte Zineman 'Kutsidazu bidea, Ixabel' filme euskaldunaren emanaldira, Bosgarren Erregioko Euskal Etxeak entolatutako ekitaldian, lankide Txileko Euskadiko Ordezkaritza, Euskal Filmategia eta baita ere Viña del Mar-eko Udala eta Kultura Partzuergoa. Saiora bertaratu ziren besteak beste Txileko Euskadiko Ordezkari Jon Erdozia eta Viña-Valparaísoko Euskal Etxeko lehendakari Archivaldo Uriarte Araya.
2007/09/10
'Diasporaren Herri Kirolak 2007' izena --halaxe, euskaraz-- daraman egitasmoaren lehenengo saioak OHOko1, 31 eta 16 eskola publikoetako 70 bat ikasle bildu zituen Argentinako San Nicolás herrian, Buenos Aires probintzian, bertako Euskal Etxeak antolaturik. Egunean zehar partaideek Lihue Qimlu-ren baserria bisitatzeko aukera izan zuten --arazo fisiko eta sikikoak edo gaisotasun terminalak dauzkaten neska-mutikoekin lan egiten duen elkartea da berau--, baita ere euskal herri kirolak egiteko eta Euskal Herria, bere kultura eta hizkuntzari buruzko jakingarriak eskuratzeko, horretarako propio ateratako orrialde batzuk medio.
2007/09/08
Azken urteotan hasitako ohiturari jarraiki, Estatu Batuetako erroibartarrek beren laugarren bilera antolatu dute gaur Gardnervillen (Nevada), ibar nafarrean sortutakoen eta haien ondorengo amerikanoen bilgarri. Ekitaldiko antolatzaile, Jose Luis Urrutia mezkiriztarra eta ibarrean jatorria daukan bere emazte Maria Retegui iruindarra, gaztetandik Kaliforniako Thousand Oaks-en bizi direnak eta Jesus Rey bizkarretarra. 75-80 bat jende espero dute. Aita Martxel Tillousek emaniko mezak abiaraziko du eguna, bazkari herrikoia izanen da ondotik eta, azkenik, dantzaldia, Jean Flesher eta bere orkestra euskalamerikarrarekin.
2007/09/08
Argentinako zortzi lekutan jendaurrean agertu eta hitzaldiak emanez egin duten bira bukatu dute Jose Migel Agirre Oar, Txema Landa eta Patxi Azparren Euskariako kideek. Bilerotan lehenengo eskutik ezagutu ahal izan dituzte toki horietako euskal etxe eta euskaldunak, eta euren sentipenak Euskal Herriaz eta euskal gatazkaz. Eskarmentu honek argiro baieztatu die 'ezinbestekoa dela Diasporaren ekarpena irtenbideak topatzerakoan', bereziki '2006ko meniaren etenaren ostean sortu den egoera konplexuaren aurrean'. Buenos Aireseko euren azken hitzaldiotan, Euskariako kideok berretsi egin dute 'Euskal Diasporaren partaidetzaren beharra euskal egoera soluziobideratzeko'.
2007/09/07
Asmoz Fundazioak eskaintzen dituen ikastaro birtualetan parte-hartu nahi duten Diasporako kideek azken egunak dituzte izena emateko. Ikastaro hauetako batzuetan, gainera, Diasporako kideentzako bekak eskaintzen ditu Asmozek: %100 Euskal Ikasgaien Ikastarorako (lehen Jakinet izena zuena) eta %50 Europar Batasuneko Zuzenbide Konstituzionaleko ikastarorako eta Giza Eskubidetan Aditua ikastarorako.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
