euskal diaspora eta kultura
2007/12/20
Euskal tradizioarekin bat eginez Madril, Bartzelona eta Valentziako Euskal Etxeetan txistorra izango da abenduaren 21eko protagonista. Santo Tomasak, Euskal Herriko plaza ugaritan ospatzen den festa, euren egoitzetan egingo dute, animalia azokarik gabe eta pintxoak eta bokadiloak erosteko dezente postu gutxiagorekin baina bertan izango dira txistorradako osagairik garrantzitsuenak: giroa, jana eta edana.
2007/12/20
Argentinako Castelli herriko 'Oneratu' Euskal Etxe gazteak Chascomuseko Zingirako Euskaldunak elkartearekin duen harremana bikaina da eta horren adierazgarri euren arteko lankidetza aktiboa. Orohar, euskal etxeen arteko lankidetza eta elkartasuna sustatu beharreko balioak dira eta, izan ere, izpiritu horren baitan kokatzen dute euren lana munduan zeharreko hainbat eta hainbat elkarte euskaldunek. Horren eredu izan zen abenduaren 9an Oneratuk egin zuen Urte Bukaerako jaia. Zingirako Euskaldunak-eko dantza taldea aritu zen bertan dantzari eta Zuzendaritza Batzordeko ordezkaritza batek ere bat egin zuen Castelliko euskaldunekin jai honetan.
2007/12/20
Gabonak gainean daude eta horren ohitura daukaten euskal familia gehienek prest izango dituzte egun berezi hauetan jango dituzten otorduetarako mokauak. Hala ere sasoi honetarako opari berezi baten bila dabilenak badu oraindik astirik kutixi sorta ederra eskuratzeko. Euskal Pack enpresak, adibidez, euskal mozkinez osaturiko Gabonetako saskiak eskaintzen ditu bere webgunean. Pierre Oteizak, aldiz, bakoitzak bere otzara osatzeko aukera ematen du. Biek ala biek mundu osora zerbitzatzen dituzte euren produktuak.
2007/12/19
Talde baxenabartarra da Kantiruki eta Sylvie Brust, Terexa Goicoechea eta Sylvie Cherbero kantariek eta Mikel Erramouspe musikariak osatzen dute. Diasporarekin harreman estua duen taldea ere bada, Cherbero eta Brust Los Bañosen jaiotako euskalamerikarrak baitira. Igandean familiarekin elkartzera eramango dituen bira hasiko dute, Kaliforniako Chino, Los Baños eta San Frantziskon kontzertuak eskainiz, 'Amodioz Bizi' lana aurkezteko.
2007/12/19
Denak Bat Euskal Etxeko txiki eta gaztetxoak Gabon Gaua noiz iritsiko zain daude, Olentzeroren etorreraren esperoan. Etxeko lanak aurretik eginda dituzte, denek idatzi eta bidali diotelako gutuna Gabonetako jeinu onari. Euskal Etxeak postontzi berezia prestatu zuen eta Olentzerok bertan jasoko ditu gutunak eta urtean zehar txintxoak izan diren umeei opariak ekarriko dizkie Gabon Gauean. Bihurriak izan direnek, ordea, ikatza topatuko al dute oparien ordez biharamunean?
2007/12/19
Eusko Jaurlaritzak Ordezkaritza berri bat zabalduko du 2008an, Frantzian hain zuzen ere, egoitza Parisen, Amerika eta Europako zenbait herrialdetan dauzkan sareari katebegi garrantzitsua emendatuz, beraz. Neurri honek orain arte Jaurlaritzaren politika frantseserako bitartekari izan den Frantzia-Euskadi Institutua funtziogabetuko luke. Datorren urterako Aurrekontu egitasmoak bi milioi euroko diru kopurua egokitzen dio Ordezkaritza sortu berriari. Zazpi ziren orain artean kanpoko Ordezkaritzak, honako hirietan: Brusela, Madril, Txileko Santiago, Mexiko hiriburua, Buenos Aires, Caracas eta New York.
2007/12/19
Joan den larunbatean egin zuen Buenos Aires probintzia argentinarreko Eusko Aterpea Euskal Etxeak, General Rodriguez hirian, elkarteko agintaritza berritzea xede nagusi zeukan Ohiko Biltzar Orokorra. Aurkeztutako zerrenda adostu eta bakarra atera zen, bertara bildutako berrogei bazkideek aho batez onetsia. Orain arte lehendakariorde izandako Raul Taretto izango da, beraz, presidente berria, lehendakariorde Enrique Mauregui duela. Lehendakari zena, Juan Itcea, berriz, zuzendaritza batzordekide izango da aurrerantzean. Kargu berrien hartzea, ordea, datorren martxoko Ohiko Biltzar Orokorrarekin bat etorriko da.
2007/12/18
Ttartalo argitaletxe donostiarraren eskutik plazaratua, Juan Carlos Morak idatzitako Manual de genealogía e historia de la familia en Euskal Herria euren arbola genealogikoa osatzen hasteko interesa daukatenei eskainitako oinarrizko liburu praktikoa da. Euskal Herritik zein Diasporatik langintza horretan hasi nahi dutenentzako jakingarriak eta metodologia azaltzen ditu, baita ere lagungarri gerta daitezkeen webgune eta euskarriak, beti ere zazpi probintzietako bilaketei dagozkienak. EuskalKultura.com-eko irakurleek, liburu honen hiru aleren zozketan parte hartu ahal izango dute doanik, abenduaren 31 aurretik e-mail soil bat bidali ezkero. Ikus artikuluan parte hartze arauak.
2007/12/18
Deialdiak atzo argitaratu zituen agerkari ofizialak. Euskal Herrira bidaiatu eta Gaztemundu trebakuntza programaren 2008ko edizioan parte hartu nahi duten Diasporako gazteek otsailaren 4a arte izango dute eskabideak bidaltzeko epea. Egonaldia uztailaren 1etik 15a bitartekoa izango da eta oraingoan musika lan bat eskatuko du. Bestetik, euskal etxeak dauden lurraldeetan bira kulturalak egiteko asmoa duten artistek Eusko Jaurlaritzak ematen dituen laguntzak eska ditzakete jada. Epea otsailaren 4ean itxiko da.
2007/12/18
Euskal Herriarekin alderatuz aste batzuetako aurrerapenez --pipa hortzetan duenari lana pilatu ez dakion omen-- baina Olentzerok egin berria die bisita Sydney-ko haurrei. Hiri australiarreko Gure Txokoa Euskal Etxeak prestatu zuen harrera ekitaldia bertako Centennial izeneko parke handian eta aire zabaleko piknik eta barbakoa batez errezibitu zuten ikazkina haur eta heldu euskal australiarrek. Sasoin honetan bero egiten du hemen eta bertaratutakoek mahuka motzetan ospatu zuten Olentzeroren festa, opariz, kantuz, jolasez eta ilusioz. Egunean zehar jasandako beroaren aringarri, azken orduan bota zuen euria zinez eskertu zuten. Euriak ez zuen Olentzeroren pipa itzaltzea lortu.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
